السلام عليكم
انا متزوجة صارلي 3سنوات ونصف وعندنا طفل ..
فالبداية راح اعطيكم ايجابات زوجي:- طيب حنون، كريم ،اسرته اهم شئ عنده
سلبياته:-
غير اجتماعي،،عصبي ،لايقيتنع بأسلوب تربيتي
المشكلة:-
صارلنا حلال هالسنوات مواقف كثيرة وف لحظات الغضب ينسى نفسة يسبني بالفاظ ابشع منها ماتتخيلوا ويقولي اني ما انفع ولا في خير ولا همي غير اهلي ...وبالامانة والله أنا إذا غلطت بمرة اجي ركض اعتذر واكره الزعل والله ما مقصرة معه بشئ بالعكس قايمة بواجبي عأكمل وجه معه ومع اهله.
يكره ابات بيت اهلي ..بس والله في ظروف تجبر الواحد يبات عند اهله امي مرضت ونوموها بالمستشفى وطلبت اجي البيت مع اخواني لان اختي الكبيرة متزوجة بعيد وعندها دوام وانا مسافة 10 دبالسيارة وكنت اجازة تخيلو ترجيته ابات قالي غيبي تراك شغالة يريدوك ؟؟؟قلتله انا راضية اكون شغالة فبيت اهلي...وطول ذيك اليلة جلس يسبني ويلعن علي واني مقصره معه وما همي غير اهلي ..بدل لايوقف معي بزيارته وبكلامه الطيب..عموما جات الخميس وجات اختي ورجعت البت اول ما دخلت مسك شعري وبصق فوجهي ..جلست ابكي وابكي اقول بدل لاتكونلي سند تزيد همي هم..عموما بعد يوم جى واعتذر وقال مشكلتله ما يتحمل ابعد عنه حتى يوم..بس ياربي انا رايحة لظرف ما رايحة العب والله من تزوجت ما بت فبيت اهلي الا ثلاث ايام يمكن ..بس جرحني واجد اذا الواحد يحي ما يضر الثاني ويقدر ظروفه ما يزيده بسب وشتم...عموما نسيت وسامحته
بعدها بكم شهر توفت جدتي وكانت عايشة فبيت اهلي ونفس الموال رجع سب وشتم واتهامي بالتقصير
والله تعبت تعبت
ولدنا عدواني شوي وشقي يجلس يضارب وبنصحة مرة واثنين وبعدين اعصب بس اذا نازعته قام يغلط علي وانتي ما فيك بارض يعني بالله عليكم يطلع دمي باظافره واسكت طبيعى بنازعه بدل لا يوقف بصفي بالعكس يتفل فوجهي ويسب ...وفالنهاية بزعل وبصيح بالليالي وبعدها يجي يعتذر
بس والله هذا موال ما ينتهي صرت اتمنى ما تصير ظروف لاهلي تجبرني اجلس عندهم عشان بس ما يجرحني ...واكره اسلوبه الوقح الوسخ برددوده على اذا نصحت او وجهت ولده
ياريت تنصوحني ...شو الحل

وعليكم السلام ام زياد
الله يجمع بينكم على خير ويخلي لكم زياد
اختي مشكلتكم ان شاء الله سهله
انا ماراح احلل المشكله الا من ذكرك لسلبياته
طبعا انتي قلتي انه غير اجتماعي وعصبي وما يقتنع بتربيتك
وطبعا المشكله هذي من ضمن مشاكل عده اذا كانت هذي طبايعه
صح
اولا زوجك لازم تتحملين طبايعه لأنها طبايع وصعب تتغير
ثانيا لازم تحاولين تخففين منها بطرق كثيره صعب ذكرها
ثالثا يمكن ولا تزعلين انتي لك اثر في المشاكل معه يعني لازم تراجعين نفسك
الله يسهل اموركم
واسف على اي شي يضايق

والله انا ما اقصر معاه اتمنى يمضي اسبوه من غير تجريح او سب..تخيلو احيانا اكون مداومة وهو اجازة يبدأ يسب بس كذا بمسجاته من الصبح انتي رايجة ورامية ولدك عامي وفلوسك بس لاهلك والشقا لامي..والله يقول كلام جلرج كثير مع اني والله اعطية نص راتبي تقريبا نحوشهم لبيت العمر وامه ما مقصرة معها ابدا هدايا في كل المناسبات واذا طلبت شئ ما اردها وعلاقتي معها ممتازة ..بس هو كذا طبعه كذا يجن اذا طلعت مكان وهو جالس بروحه بالبيت او شاف ولده متنكد...عطول يرسل ويسني كأني رايحة اهوت ما كان تعبي عشانه هو وولدة بعد ..
من يتحما هالكلام الجارح من...احاول اسايره بس والله في ظروف تجبر الواحد ..طفشت احيانا اندم واتمنى ما تزوجته اقوله ما اريد بس فلوس وطلعات وهذايا .. انا مامحتاجة او انت ماتقصر فالهشئ بس ارييدك تحترمني قبل كل شئ تراعي ظروفي تقدر شغلي وتعبي تراه فالنهاية لنتا كلنا

الله يعينك يا ام زياد
عموما
أنا هنا أخاطبك انتي علشان كذا ماراح احلل المشكله بين الطرفين
لكن بعالج المشكله من ناحية اخطائك رغم اني اعترف ان زوجك اخطائه كبيره والله يعينك عليه
بتكلم في نقاط ومن ناحيتك فقط:
1- انتي ذكرتي ايجابيات زوجك وهذا يعني انك تقدرينه كزوج مقبول وراضيه فيه واتوقع اذا هذي صفاته فقليل من الرجال اللي عنده هذي الصفات يعني زوجك رجل جيد رغم العيوب اللي فيه يعني من خيرة الرجال
2- سلبيات زوجك ذكرتي ثلاثه اثنتان منها بسيطه جدا اللي اهي غير اجتماعي وما يقتنع بتربيتك فخليهم على جنب
لكن كونه عصبي لازم زي ما قلت لك تتأقلمين او تحاولين تعالجينها او تخففينها
3- زوجك اذا عصب حاولي انك ما تردين عليه ابدا يعني الزمي السكوت ولا تقولين حتى الله يهديك ولا جزاك الله خير الا في نفسك ولا حتى تبتسمين لانه يمكن يفهم غلط
4- صدقيني زوجك اذا غضب وعصب اكيد فيه سبب مقنع مهما كان السبب كبير او صغير يعني اكيد فيه منك تصرفات تضايقه واتوقع انتي تعترفين بها والدليل انك دايما تراضينه يعني حاسه بغلطك ومع كذا انتي احسن منه في النقطه هذي
5- مسألة ان ولدك عدواني هذي مسأله كبيره معناها انك مقصره في تربية الولد او كلكم مقصرين ولازم ترجعين للمختصين وتتثقفين كيف تربين ابنك وتعيدين تأهيله لأنه طفل ومسكين ويمكن عدم اتفاقكم على طريقه التربيه اهو السبب ولازم تتحملين تدخل زوجك لأن الكلمه الاخيره له وانتي تحملي وحاولي تتعاملين مع الموقف بسياسه لأن زوجك غلطان بالتدخل
6- صدقيني فيه مشكلتين في حياتكم لازم تلقين لها حل اللي هما الدوام واهلك صدقيني
7- أنتي مأجوره من ناحية تحمل طباعه السيئه ومساعدته الماديه والاحسان لأهله
8- لا تقولين تمنيت اني ما تزوجته لأنه اذا انحلت المشكله بيكون زوجك ممتاز بس مسألة وقت وترى اكثر الرجال كذا فيهم سوء
9- زوجك والله اعلم متضايق من شي ربما زحمة الحياة وظروفها او شي ثاني ويمكن نفسيته تعبانه فلازم تساعدينه في تخطي الوضع هذا انتي اقرب انسان له
10- صراحه انتي في وضع صعب مع زوجك يهين بالكلام والبصق وشد الشعر ويمكن الضرب
الله يعينك الله يعينك الله يعينك
لكن لازم تصبرين صبر جميل وتتحملين وترى مأجوره وحاولي تحلين مشكلتكم عن طريق المختصين
11- أخيرا تذكري رضا رب العالمين ونتيجته انه بيرضا عليكم سبحانه وبيوفقكم لكل خير وبتكونون سعيدين وبدون مشاكل
يعني خليكم متعلقين برب العالمين خليك متعلقه برب العالمين وما راح تواجهين اي شي تندمين عليه
الله يوفقكم ويسعدكم

مشكورة اختي..بس انا متأكدة من شئ واحد فيه بعد هالعشرة انه ما يقدر عني يوم وحدة اكون بعيدة عنه ولو في ظروف تجبرني بمجرد بعدي عنه يتحول انسان ثاني عصبي يسب يحاول يستفز لانه يبقى بروحه اقوله اطلع روح غير جو استمتع بوقتك يقول مالي نفس وبعد الزعل بيجي يراضيني واحيانا يبكي انه ما قصده بس ما يقدر يعيش عني بعيد...وان كلامه وقت غضبه مجرد استفزاز لي عشان احس فيه ..بس ياناس معقولة في كذا انانية انا إذا احب بحب الخير لزوجتي بقدر شغلها وظروف اهلها ما بكون عليه فرعون..ما أقصد ولدي عدواني اقصد شقي جدا يعني انا اعتبر اسلوب تربيته غلط بالمره ما عنده غير الدلع وكل طلباته مجابه واذا غلط بدل لا يادبة يقول هذا طفل وما يفهم مع انه يفهم كل شئ تو يمشي فالثلاث..
غير كذا هو طيب معي جدا حنون جدا ما ينسى مناسباتنا الخاصة يهديني يمشيني واذا طلع مكان لازم يجيبلي حاجة...بس مشكلته حب التملك يريد اكون ملكه وحده ما يحب طلعاتي واجد لاهلي لأو للناس يحب بس مقابلتنه بس والله في ظروف ما يقدرها يكون اناني يسب ويسب لحد ماانهار وبعد ما اتعب يجي ويعتذر وهذا موال حياتنا
اريد حل جذري اريد احترام وتقدير منه لظروفي وعملي

لازم تاخذين موقف جدي وحازم من اهانته لك وسبك انتِ زوجته كيف مايحترمك؟و بما إنك واثقه من حبه وإنه مايقدر يستغني عنك استغلي هالشي لصالحك يعني لما يسويها مره ثانيه سبك او شد شعرك او سوى من حركاته اللي دايما يسويهااسكتي ولا تكلمينه وقومي بكل واجباتك بدون كلام معاه واستمري على هالحال فتره واذا جاء واعتذر على طول قوليله ما ابغى اتكلم الحين رجاءً..وسكري الموضوع على طول وراح يجي مره ثانيه يابعده بيوم او اكثر وقوليله انا بنهي هالمهزله مو حاله هذي تضربني وتهيني وتجي تعتذر من اول ليه تحط نفسك بموقف الاعتذار من اول لا تمد يدك ليه ماتحترمني مثل ما انا احترمك واعطيه كم كلمه جامده خليه يصحى شوي ولا تقبلين بسهوله ومره على مره بيتعدل وبيقدر يمسك اعصابه بس هو اتمادى لانه حصلك عادي على طول ترضين وبعدين ولدك صغير الحين يعني يمكن مايستوعب شي بس لو جلس زوجك كذا اكيد ماراح يقدر يمسك نفسه يضربك حتى قدام ولدك وبيصير موقفك جداً صعب ..وبالنسبه لولدك وانه عند اهله بما ان علاقتك بأمه ماشاء الله تمام المفروض يحمد ربه وبعدين هو مو عند احد غريب عند جدته ليه يكبرها
الله يهديكم ويسخركم لبعض يارب

خليكي على مسايرتك له و وتحملي الإهانات والتجريح لأبعد الحدود , وابتعدي عن أي شيء يزعجه مهما كان صغير ام كبير ,,,, ثم وكلي امرك لله واصبري عسى الله ان يصلح الحال ويهديه . من ساع إلى ساع يغير الله من حال إلى حال . مع دعاؤنا لك بالفرج .

أختي انصحك بالدعاء بالليل ان ربي يحنن فلب زوجك وتاكدي ان ربي بيساعدك
وكثري دعاء واستغفار والله يهدي زوجك ويسخره لك يارب

__________________
اللهم فرج همي