مقارنة أختي بي وغيرتها مني - منتدى عالم الأسرة والمجتمع

24-08-2011, 06:35 AM

غيركم

عضو نشيط

تاريخ التسجيل: Jul 2011

المشاركات: 190

مقارنة أختي بي وغيرتها مني

السلام عليكم ورحمة الله

اختي الله يهديها تقارن نفسها بي ولافيه اي وجه للمقارنه بيني وبينها هي متزوجه وانا لا , يعني لو
انا متزوجه كان اقول يمكن ..!
بكل شي تقارن نفسها بي واحيانا تغار مني وكانت قبل ماتتزوج اذا شريت شي او سويت اي شي تقول
يوم انا كبرك ما اخذت وش معنى انتي ؟
والمصيبه انها الحين تقول لزوجها اختي شرت وانا ماعندي اختي سوت وانا لا .. وعلى هالحاله
يعني مثلا طلعت انا قبل فترة رقم جوال جديد باسمي ويوم دريت انهبلت كيف طلعتي باسمك ؟ ووشلون قلت
وش فيها رحت مع اخوي وطلعته قالت ( باسم الله اللي تبينه تجيبينه ) طبعا هي قالت كذا لان زوجها اصلا
رافض يحط رقمها باسمها لانه شكاك وموسوس وطبعا راحت وقالت لزوجها عن الرقم انه باسمي وزعلت لما
جاب لها رقم وتقولي انه يوم جاب الرقم عطان اياه وقال - الحين صرتي أحسن من أختك - ؟؟!!!!!!!!

ومره كانت بطاقة الصراف حقتي اللي من الجامعه كانت مع ابوي وطلبتها منه وقلت له ابغى بطاقتي
واعطاني اياه لما دريت اختي قالت ماشاء الله وانا درست وتخرجت ولا مسكتها وشلون عطاك اياه قلت
عادي طلبته وعطاني اياه انتي ماطلبتيه كيف تبينه يعطيك اياه واسكتت ..

وقبل امس طلعت هي حساب بالانماء باسمه وطاااايره من الفرحه كانه مالكه الدنيا ومرسلت لي حضرته
بالواتس اب ومصوره الهديه اللي عطوها يعني تعلمني انا ماميزت الهديه ولا ادري وشي اصلا لان الصوره
كانت مو واضحه وهي كاتبه كم تبين احولك وانا سيدة اعمال ومن هالكلام وبما اني مافهمت وش السالفه
ماعلقت والله كنت اظن انه برودكاست ومشيته ويوم جت عندنا وجايبه معه الهديه وانا توي ادري انه فتحت
الحساب عقب ماشفت الهديه وسالتها المهم انه قالت ليش امس مارديتي قلت ما ادري وشي ماكانت واضحه
قالت ايه انه ابلشن يقول الا صوريه وارسلي له وطلعت منها غصب هالكلمه ( واقهريه ) تقهرن على
ايييييييييييييش .. وش انا شايفه عشان انقهر ياحسرتي حساب بدون رصييييد وش الفايده ههههههههه انا
بصراحه تضايقت وقلت لها تتفقون علي تراه كله مجرد حساب طبعا بمزح وقلت له الحمد لله ربي حافظن
ولا حقق لكم اللي انتم ناوينه وووو , قالت انه بلش كل شوي يسأل ردت عليك او لا وليش ماردت ..
وقلت لامي السالفه وانهبلت امي وعصبت وش هذي ماتفهم الرجل مايحب ان مرته تمدح احد عنده
ولو كانت اختها او اخوها وووو ..

انا صراحة متضايقه جداااا لييييش تسوي كذا .. وليش تقهرن او تفتخر انه احسن مني .. هو فيه مجال
تقارن نفسها بي والله انا كل اللي اجيبه واحصل عليه مو ببساطه اجي من هنا ومن هنا لما اخذ اللي اريده
وهي تدري بهذا الشي ..

والله ماتصدقون وشلون انا اراعيها ولا عمري جرحتها ابدا لاني افكر بالكلام مليون مره قبل اقوله ..
ولا عمري فكرت اني اتباهى حتى اني والله احاول اهون عليها لان حالة زوجها الماديه مو مره ..
واهون عليه اذا زوجها سوا لها شي مع اني اكرهه الا انه ماتسمح لي نفسي اني احرضها عليه مع اني
اقدررر لانها تاخذ بكلامي كثييييير ..

هي تقول اني اقول لزوجي كذا عشان يدري اني يوم انا ببيت اهلي موفر لي اللي ابغاه .. قلتله
وانا الضحيه هااا ؟

اللي ابغى افهمه وش سويييييييت لها انا ؟؟؟؟ طيب اذا بعدين تزوجت وش بيصير فيها ؟؟؟

انا قاهرن زوجه ابو عقل صغير وتاااافه وساااااذج , ومرييييض .. وش هالعقل له وشي اقهريه !!
والله اني دايما ادعي يالله يارب تزوجن باحسن واروع رجال بالدنيا عشان تعرف ان الله فوق كل شي ..

من وانا صغيره وهي ما ادري وش فيها علي حتى والله كانت تحرض اختي علي وانا اطننننش و كنت اكذب
نفسي اقول حنا خوات وما بيننا شي .. بس هالحين اشوفها زادت ..

والله اني معها عسسسسسل تخيلوا اذا بغت فلوس اسلفها ومره تبغى تحول فلوس وحولت لها انا من حسابي
وزوجها قايل لها اصبري علي ماعندي فلوس هالشهر واناااا اللي ساعدتها وقلت لها لاتنظغطين متى
مارجعتيه هذا غير اللي انا مسلفتها قبل يمكن سنه ولا عمري قلت لها عطين اياه مراعيتها لاني ادري
بظروف زوجها وما ابغاها تنحرج او شي ..

وش اسوي معها انا كنت اتجاهل كلامها بمثل هذي الاشياء مع اني ادري انها تخبي عني اشياااء وادري انها
تقول لزوجها عني ..
واتذكر باول زواجه تقول انه عقب ماطلعنا منكم قالي زوجي منهي اللي صوتها صغير ووو عاد هي تقول ما
ادري من يقصد وتكذذذب تدري انه اصلا بس انا وياها اللي كنا موجودين ما ادري يمكن عشان كذا حقدت
علي .. بس انا وش ذنبي اذا صار هو يتصنت هالمريض اللهم لا شماته ..

والله المواقف كثيره مثل يوم شريت جوال ووو ... وهي ترا ماتقول هالاشياء ع طول بس انا اجيبها من هنا
ومن هنا لما تطلع اللي عندها ..

والله كرهتهاااا ومالي خلق تجي عندنا او اشوفها واليوم اتصلت العصر وقالت تعالو افطروا عندي لان ابوي
مسافر وامي بتروح عند جدتي قلت لها لا مايمدينا ابسوي الفطور و اصلا اخوتي مااايحبون زوجها وادري
انهم بيرفضون بس صرفتها وقلت مايمدينا وانا مشغوله ..

وش افضل اسوي معها اطقها بوجهها عشان تتأدب امي تقول قولي لها لاتتكلمين عند زوجك عني ما اسمح
لك .. ولا اسكت وامشيها كالعاده مع انه طفح الكييييل ..

ادري طولت عليكم بس معليش استحملوني بس والله جد منقهره منها .. وشكرااا لقرائتكم فضفضتي واستماعكم لي ..

وشرفوني بارائكم ولا تقولون انتي حساسه تراي متعقده من هالكلمه .. وهذا شي مايمكن اسكت عنه ..

ودمتم بخييير

..

التعديل الأخير تم بواسطة روح المساء ; 25-08-2011 الساعة 09:30 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه