السلام عليكم يا دكتور احمد
كنت عايزة اسأل حضرتك عن نقط الانف المزيله للاحتقان زي الاوتريفين و غيره هل هي ضارة و تسبب انقباض الاوعية الدموية في المشيمة ولا لأ (دة كلام الطبيبه هنا) عشان انا عندي برد و احتقان شديد جدا في الانف و مش بعرف اتنفس منها الا لما استعمل النقط دي و ده بيكون تقريبا مرة خلال اليوم و مرة قبل النوم عشان اقدر انام و انا بستعمل تركيز الاطفال 0.05% و الف شكر ليك مقدما و جعله الله في ميزان حسناتك

ممنوعة في الحمل لأكثر من سبب

ممكن تستخدمي مياه فاترة نظيفة لغسيل الأنف كاملا هاتساعدك شوية او زوري طبيب الانف والأذن للمساعدة

__________________

الف شكر يا دكتور احمد على استجابتك السريعة بس انا مش بعرف ادخل اي سائل داخل الانف زي مثلا النيزال ووش وبشرق وبيسببلي كحه وحرقان في الانف... و محلول الملح زي البيبي سالاين بتاع اوتريفين مش بيجيب نتيجة. لأن المشكلة مش في عدم القدرة على اخراج الافرازات و لكن الاحتقان الشديد اللي مش بيخللي الهواء يدخل. هل النقط دي بتمتص من الاغشية المخاطيه وتوصل للدم؟؟طيب عدم قدرتي على التنفس بصورة كاملة دي مش برده ليها اثر على امداد الجنين بالاكسجين الكافي ؟؟ على كل حال انا هاحاول الاقي معاد عشان اروح للطبيب ولو انهم هنا ما بيوصفوش دوا الا لما خلاص الواحد يجيب اخره وفي الاخر يطلع محلول ملح بحري ..
والف شكر يادكتور على سعة صدرك

المحلول ده ممتاز جدا بس بياخد وقت

ايوة الادوية دي بتمتص طبعا والأغشية المخاطية امتصاصها سريع جدا كمان

الجنين بيحصل على الأوكسجين كويس جدا ماتقلقيش

__________________

انا بشكرك جدا يا دكتور و ربنا يجعله في ميزان حسناتك و ان شاء الله اروح للدكتور لأني حاسة ان الحكاية قلبت بالتهاب في الجيوب الانفية و ربنا يستر
ليا سؤال تاني يا دكتور... انا كنت سألتك قبل كدة عن الصداع النصفي وحضرتك قلت ان الباراسيتامول اامن بس انا عندي بنادول و ده فيه كافيين مع الباراسيتامول ياترى ممكن استعمله ولا لأ لأن القهوة و الراحة ما نفعوش المرة دي و ليا يوم و نص في صداع مستمر بيزيد من اقل حركة فممكن حضرتك تفيدني لاني جربت البارامول و لسه ما فيش نتيجة

البنادول كويس مافيش مشكلة

__________________

شكرا يا دكتورعلى النصائح القيمة
انا النهاردة رحت لطبيب الانف و الاذن و الحمد لله لا يوجد التهاب و لكن احتقان شديد شوية
لكن انا كنت بشتكي كمان من حكة في الاذن و كنت شاكة ان فيها عدوى فطرية لانها كل حمل بتحصل و طلع شكي في محله فأخذوا مسحة للمعمل للتأكد وكتبلي الدكتور على نقط للاذن اسمها castellani loesung و انا كنت استعملتها مرة من زمان و هي عبارة عن ميكونازول و بعد بحث على موقع الشركة المنتجة قال الدكتور انها ممكن تستعمل وقت الحمل بدون مشاكل فهل فعلا مفيش مشكله منها على اساس انها لن تمتص و لو ما ينفعش اتصرف ازاي
و الف شكر للمرة....اكيد كتير جدا و ربنا يجعله في ميزان حسناتك

اه مافيش مشاكل منها لو فترة بسيطة اهم حاجة ماتدخليش مياه للأذن خالص الفترة دي

__________________