السلام عليكم اخوان انا قضيتي بسيطه ولها الف حل

لاكن ماني عارف اخذ الحل الانسب .... وسبق شرحت لكم القضيه لاكن بغموض ,,, والان ابي اشرحها لكم بكل وضوح ....

انا مملك على وحده تسكن في نفس مدينتي وعمرها 17 سنه ...

والأن انا مملك ولي 9 شهور ..... وبصراحه زواجي مطول الى سنه ونصف تقريبا,,,,
في البدايه كنا نتكلم جوال ,, ورسائل شبه يومي من الطرفين ... ونتكلم كل يوم وسمن على عسل الحمد لله ... ونتقابل تقريبا في الاسبوع مرتين او مره ,,,, بما انه اهلها يقربون لي وبعض الاوقات اوصل اهلي عندهم واشوفها ونتكلم وزي كذا ..... سار لقائنا في الاسبوع مرتين او ثلاثه.. ومثل نطلع نتمشى وهم معنا وهي معنا لازم ^_^,,,,
المهم ......
الحين بصراحه الي ملاحضه منها ,,, انها ما صارت تدق ,, ولا ترسل مثل اول ,,,, جوالها على الصامت

24 ساعه ... يا مشغوله او نايمه او ما ترد الى بعد طلعة الروح ,,, حسيتها ملت ,,,
ونا بعض الاوقات ادق فوق 5/ 4 نرات ما ترد وربي يجيني ضيق ..صرة اتصل على امها واسال عنها بس بي احتراف هههههههه مثل كيفك وكيف حال..... تقولي طيبه ونايمه ,,,
تصحى من النوم ما تدق هي لازم انا ابادر واتصل ,,,
وسبق وصارحتها وقلت لها انتي متغيريه وش فيك ومن ها الكلام الحلو والله ,,, قالت انا اسفه وزين وانت قلت لي .. وما كملة يومين الى رجعت حليمه لعادتها القديمه
...ويشهد الله علي علي اني ماني مقصر معها لا فلوس ولا جوالات .. شحن وربي يوميا اشحن لها بـ10 او 20 في اليوم ,,, كلام رومنسي حب ضحك فله كله موجود والحمد لله ,وما قصرة معها بها الكلام ,, ولو زعلتها وربي انا اروح اتاسف لها حتى لو هي زعلتني انا اتاسف ,,,,
وصرة اعاتبها اقولها ليش وليش .. بعدين شفتها سكتت تقولي كل مره تقولي ليش وتعاتبني وربي حزنت وقلت لها اسف معد تسمعين ها الكلمه لاكن بداخلي وربي اني زعلان بس مابي ابين لها زعلي
بلاك بيري اشتريت لها قلت تتواصل مع صحباتها عن طريق الببي بما انه مافي عندهم كمبيوتر ,,
واشتريت لها جوال ثاني برضو فخم وتستاهل ,,,
والبارح رحنا منتزه وكانت معي نمشي ,,, شوي مطلعه بلاكها وتسولف مع صحبتها وانتضرتها لين خلصت ما قلت لها شي ومشينا ,,,,,,
ونا من النوع الي طيب لدرجه محد يتوقعها ...
قلت اطنشها اسبوع . شهر ما اشحن لها ما اكلمها ما ازورها ؟؟ . بصراحه انا ما احب التطنيش لازم اكلمها واخذ علومها



تكفون عطوني حل لي انه وربي بجد تعبت ؟؟؟؟ بعض الاوقات اعصب ودي اخاصمها ليش كذا بس امسك نفسي واكلمها بكلام حب وانسى عشان لا ازعلها .. بس مهما كان الانسان عنده طاقه ونا احسها نفذت ها الطاقه
...؟؟ ويش اسوي معها في ها الفتره ؟؟؟
وما طرحت لكم ها المشكله الى اني ابي مكم الفائده ولا تبخلون على اخوكم