السلام عليكم ورحمة الله وبركاته
الاخ الكريم مشكلتي زوجتي و البليغ
الله يسعدكم دنيا واخره ابيكم تشوفون حل لمشكلة انسانة يهمني أمرها وانا متابعة لردودكم من فترة طويلة ولفت نظري عقلانيتكم وحكمتكم الله يكمل بكم دين ودنيا ويجعل ما تقدمونه لاخوانكم في ميزان اعمالكم ..
يمكن تشوفون الموضوع من زاوية اخرى وتشوفون حل ينفعها .

اختي موظفة شخصيتها قوية جدا ماشالله تزوجت هالرجال اللي اصغر منها بسنتين هو انسان معروف وشاعر يطلع في قناة الساحة بعد الملكة الرجال ما سلم المهر كامل وكاتب في العقد انه يكمله ووعد الوالد بكذا وللحين ما كمله من ايام الملكة لاحظنا عليه عدم اهتمامه بالمكالمات والرسايل قلنا يمكن عشان طبيعته هو من قرية وتربى وعاش فيها ويمكن مع العشرة والزواج بيتغير اللي صار انه تزوج الآدمي وهو مثل ما هو سافهها ولا يتصل ولا يسال وكتوم معها جدا عن أتفه التفاصيل واكبرها يعني حتي الأساسيات لحياتهم ما يخبرها
طبعا نسيت اقول انه يعمل خارج المنطقه ووعد اهلي انه بيكون فيه نقل قريب خلال سنة بالكثير بعد خمس شهور من الزواج جاه نقل بمدينة تبعد عن منطقتنا 3 ساعات هالكلام العام في شهر رجب وفرحنا كثير بس باءت الفرحة بالخيبة لانه انسان عديم المسئولية الى الان ما تحرك ولا شاف بيت يعيشون فيه ولا أخذ زوجته تعيش معه . واعذاره بايخة جدا مرابط في العمل ومرة مريض تعبان ومرة رصيد إجازاته خلص
طول الفترة اللي فاتت كان يجي يأخذها أربعا وخميس مرة مرتين بالشهر وع هذا الحال وبرضو نفس الشي اخونا في الله مكالماته قليلة جدا في حدود انه بيجي يأخذها ويقول لها تجهزي او يسال عن حاجة مهمة للوالد او شي من هذا القبيل.
يا ناس اختي ذبلت تماماً ونفسيتها زفت ماغير راقدة في سريرها وساكتة شاردة ماهي معنا ابد ماعاد هي ذيك الانسانة الفرفوشة الأنيقة المهتمة كل ما تكلمت معها وجبت لها فكرة تقول سويتها معه وما نفع اخر شي قلت لها اقفلي جوالك ولاعاد تردين عليه قالت لا كذا غلط بكره لين نقلت أعيش معها بيردها لي لكن خليني تمام معه وبكسبه باللين ان شالله.
هو انسان عديم المسئولية لا مبالي اتكالي بس انا مستغربة الاخ شاعر وشعره يقطر رومانسية وهو اصلا من جنبها ما يتاثر ولا في شي ومن ناحية المصروف برضو يتكل عليها وعلي وظيفتها هي كانت شارطة عليه انها تكمل وظيفتها بس لما شافته كذا قالت ابيه يحس بمسئوليتي واستقالت وبرضو الرجال ما جاب خبر هو مثل ماهو اناني ما يفكر الا بشهوته يتصل فيها عند باب البيت ويقول انا برى اطلعي اخوي عصب وتكلم معه سأله بحترام وش وضعك وكيف ووعد بعد اسبوعين يكون استاجر شقة ونقل العفش لانه طول ما كان ياخذها يروحون شقة قريبة من بيتنا وفيها عفشهم واشياءهم اللي جت هدايا . وقال انا بعطيه هالفترة بس اذا ما شاف لك بيت في نفس مقر عمله اتفاهم معه بطريقتي . قبل شهر جا اخذها ولما نزلها قالت تعال ادخل سلم على اهلي دخل قابل امي واخوي والوالد اخوي سلم عليه بكل برود وصاد عنه والوالده برضو اما ابوي ساله عن الشغل والبيت قال ان شالله يا عم في الاسبوعين الجاية انقل العفش لاني استاجرت ووعده خير وقام من عندهم . خرج من هنا وراح اتصل بي اختي انتفض من الخوف وزعلان يقول لها اشفيه اخوك احسه بخاطره شي انتي اشتكيتيني عنده قالت لا بس هو دايم يسال لين متي وضعكم كذا الحين الشهر خلص وجا قبل اسبوع أخذها ورجعت البارح قلت هاه بشري وش صار عليك قالت ابد أخذني وحطني عند امه في قريتهم ورجع لعمله وبعد يومين جا وجلس معنا يوم كامل واليوم اللي بعده رجعني عندكم يعني يوهمنا انه المرة هاذي غير وجا اسبوع مو مثل المرات اللي قبل يوم ويردها . طبعا سألتها هاه يا وخيتي بشري وش سوا الرجال حجز لك بيت استأجر تحرك قالت يقول دور وما لقي للحين وان شالله حول هالاسبوعين بيلقى يعني ما ادري هو ليه يتصرف كذا مو خايف من اهلي ولا حاسب حسابهم ولا عنده ضغوط محد داري عنه طيب واحد زي كذا شلون يا جماعه الخير تتعامل معه . انسان استفزازي لأبعد درجة لا ويكون بعلمكم ترا لما سألو عنه اهلي بداية ما خطب انمدح كثييير الآدمي لدرجة حسينا انها افضل زيجة من بين أخواتي من سمعته ماشالله ملتزم وقارئ يقرا على الناس المرضى واشتغل كم سنة موذن مسجد ودارس علم شرعي لكن ليش تعامله زفت مع زوجته محد يدري .
وش تنصحونها وش رايكم فيه وش ينفع معه

__________________

‏
الوعي هو الملاذ ..

أستغفر الله العظيم ؛
( الفردوس غايتي )

*باختصار نستطيع القول:
1) دعي أختك تكسبه بحلاوة اللسان، وتكثر من مدحه فهو شاعر.
2) تسأله وتشعره بالجدية عن موضوع استئجار البيت.. وتعطيه مهلة أسبوعين لإصلاح الأمر.
3) إن لم ينفع فهنا يجب تدخل والدك بالأمر من حيث الجلوس معه، والحديث معه بصراحة عن وضعه المادي وخلافه.. ويسمع منه ما لديه حتى تتضح الصورة قربما يكون لدى الرجل بعض الظروف القاهرة.
لكن إن لم يظهر شيء من هذا فيجب أن يُعطى فرصة زمنية محددة لإصلاح وضعه.

اولا اسف على التأخير لاني من النادر تواجدي بهذا القسم الذي يسكنه قامات المنتدى ولست اظنني منهم
ثانياً لايُفتى ومالكٌ في المدينة.. فما قاله البليغ مركز وهو عين العقل وعليك به
ثالثاً.. يبدو لي انكم تصورتم لهذا الشاعر هالة من تفاصيل هو يقولها شعراً وادركت اختك بسجيتها الفطرية
انه الفارس على الخيل الجواد الابيض.. بينما الشعراء هم من يقولون مالا يفعلون..
انا لا اقدح فيه ولكن حالة الوصول لذروة المعنى وطلاوة التراكيب الشعرية المبهرة لا تتأتى الا في حالات معينة
وليس في كل وقت.. وهو بذلك يكون جيد في حالات وغير جيد في حالات وهذا هو تفسير التخبط الذي يعيشه
رابعاً
الظروف المادية والمعنوية لها دور.. والرومنسية تري بالافعال وشوية اقوال.. هو الان يملك تلك الاقوال ولكن يجب ان يحفز الافعال.. بتحفيز المسؤلية لديه مثل قدوم اول مولود.. ولكن يجب ان يعلم الاحراج اللي هو مسببه لكم.. احرجوه بسمعته لان الشعراء خيلائيون .. خل اخوك يلمح له ان سمعته وش بتصير لا دروا الناس عن وضعه بس لا يجرحه خله يقول له من بين السوالف فلان سولفت معه ويسلم عليك ويسألني عنك( بشرط ان يكون فلان هذا واحد يستحي منه ويقدره ويغليه) وهو بيفهمها ويستحث جهوده..اذا اختك تمون على وحدة من خواته تجيب لها طاري من ضمن السوالف انتي كم جلستي في بيت اهلك قبل لا تستقرين مع زوجك بعدها لازم ابوك يجلس معه ويتبين منه كل شيء بهدوء وروقان..
بس ابيك تعرفين شي.. ان بعض المناطق بالذات العسكرية تكون ايجاراتها جداً مرتفعه حسب منطقته فبالتالي كشخص معروف من الصعب عليه استئجار شقة صغيرة قد لا تتناسب مع علاقاته مع الاخرين ومع طبيعة مجتمعنا النهم لكل ماهو كبير وضخم والمريض باساليب التفنن في البهرجة الكذابه






والا علميني عنه وانا سأستقدح قريحتي الشعرية واهجوه بمعلقة عصماء
اعبر فيه عن امتعاضي .. واصبح انا وهو مثل جرير والفرزدق...!!!

__________________
ان انت اكرمت الكريم ملكته.. وان انت اكرمت اللئيم تمردَ!!