السلام عليكم ورحمه الله وبركاته
كيف حالكم جميعا
عندي استفهامات كثيره كل يوم اشوف واسمع واعيش تجربه الزوجه الثانيه
نفسي اعرف الى متى هالنظره للزوجه الثانيه ليش ياكلون الناس لحمها وهم مرتاحين
ليه يذلونها بكل مكان في المجالس في المستشفيات في المنتديات
دايم اذا احد بيواسي الزوجه الاولى يقولون بيروح لها وبيمل منها ويمكن يطلقها وتراه متزوجها شهووه ومن هالكلام
انا ماادافع عن الزوجه الثانيه فيه زوجات دخلو ع البيوت ودمروها سواء كانت الاولئ ولا الثانيه
بس يحز في خاطري اللي يصير لي بحكم اني زوجه ثانيه
يعني زوجي صار متفتح اكثر بعد زواجه مني ودلع عياله وخلاهم بكيفهم وكل شي كان ممنوع صار مسموح وهم معترفين ان الفضل لله ثم لي لاني غيرت تفكيره وصار يستوعب ويسمع لهم كثير
ومع ذلك يوم تناقشت انا وزوجته في موضوع قالت انه كان ظالمني ومعذبني ومن يوم ماتزوجك ولله الحمد وهو طيب ومتغير معاي وماعاد يضرب عيالي بس ياليته اخذ وحده حاره وغيور وعصبيه كان يمديه طلقها
والله صدمتني قدامي وبوجهي وبكل وقاحه تتمنى طلاقي طيب انا ماضريتك بشي لي ثلاث سنين معاهم من تزوجت وعيالها يبون مدارس اهليه وهو رافض وانا ماتدخلت واتصلت بنته علي قالت تكفين اطلبي ابوي ينقلنا انتي تعرفين له وهو يحترم رايك وطلبته وجلست شهر ازن عليه وازعل منه عشان ينقلهم ونقلهم ورحت ودفعت رسوم مدرسه بنته وفرحتها
وبالاخر امها تتمنى طلاقي
وتتكلم فيني من وراي اني خبله وهبله واضحك معاهم وانهم مايحبوني
واني ماغيرت زوجها لاني مافيني زووود ولانه تزوج وتحسف وانه صار طيب معها لانه جربني وطلعت شينه وبزر وماعجبته
وكل مااجلس معها وزوجي فيه تجلس تقوله بزوجك وبنت فلان جميله وبنت فلان موظفه وفلانه صغيره وتزوج وقسما ان زواجك علي واني لادفع مهرها؟؟
انا اذا قالت كذا اسكت وماارد الا اخر مررره قلت لها لاتتحديني تراك مو قدي واذا انا ساكته
ترى بمزاجي ساكته وعموما بررررد ع كبدك يامقهور
وزعلت مرره علي بس مليت منها تستفزني بكل مجلس
حتى ولدي الصغير مررره حلو بسم الله عليه وكل ماجلست وفيه حريم قالت هذا الولد مو لنا ماادري ولد مين اكيد انه من قبيله ثانيه واكيد جايه عرق غير
انا ادري انها ترمي لبعيد بس للحين ماسكه نفسي وكل الحريم يقولون لي علمي زوجك عشان يربيها ع كلامها ذا
وانا مابي اخلق مشاكل احيان تسيطر علي الغيره واقول هي ماتستاهل ليش ماافتن بينها وبينه واخليه ماعاد يعطيها وجه واقلبه ع عياله وبدال مااحببه فيهم اكرهه واحرضه
واتذكر انه حرام واتعوذ من ابليس واقول انا اكبر من كذا وانا متعلمه وفاهمه وعندي اولاد وودي انشغل فيهم عن الحرام والفتنه والكذب
تعبت من نظره الناس الدونيه لي بكل مجلس يتفاخرون بان فلان تزوج وطلق او تزوج ثانيه وراح تزوج ثالثه عليها او تزوج ورجع ودلع زوجته الاولى وكانهم يقولون لي مصيرك كذاا
المشكله ان زوجه زوجي وحريم عيالها وخوات زوجي وعياله الكبار كلهم يسعوون يزوجونه علي بدون سبب بس عشانهم غيرانين وزوجي مو مفكر بالموضوع هذا ولاهمه كلامهم بس انا مليت من وقاحتهم يتحدوني ويجيبون طاري بنات كثير له ويشاورونه وانا جالسه
لو اي وحده مكاني كيف ترد ع التفاهات كيف اخلي كلا يلتزم حده
نظره الناس لي اني حشره تطفلت ع حياه انسانه منسجمه هي وزوجها والواقع اني شمعه نورت حياتها هي تحلف انها ثلاثين سنه في نكد واني من دخلت عليهم بطل يهاوشها ويذلها ومع كل هذا تتمتى طلاقي وماتبيني احمل تقول يكفونك هالولدين لاتجلسين تجيبين ويبلشون عيالي يربون عيالك يعني ع اساس ان ابوهم كبير
تجررررريح من كل جهه الحمدلله ع كل حال