السلام عليكم

والله ماني عارفه ايش أسوي حاسه نفسي ملخبطه تماماً، في الفتره الأخيره صارت مشاكل كثيره بيني و زوجي
مافي مشكله كبيره ولكن سوء تفاهم و مشاكل بسيطه تراكمت و صاروا جبل من المشاكل

المسأله كلها بدأت لما نقلنا لبيتنا الجديد و صارت عندي علاقات اجتماعيه و صرت أختلط مع البنات في المسجد و تجمعات الأمهات و الحمدلله حسيت إنه نفسي رجعتلي من جديد
قبل عشنا في منطقه صغيره شبه معدومه و أنا كنت جديده في البلد و ما أعرف أي أحد ولا أعرف اللغه، فكنت أحس باكتئاب فظيع و بعدي عن أهلي أمي و اخواتي كان صعب علي
استمرينا كدا لمدة 4 سنوات و خلالها انجبت بنت و و ولد، و كانت حياتي كلها تتمحور بين عيالي و زوجي و بس، مافي طلعات، مافي فسح، لازم زوجي يكون معاي لو محتاجه أخلص إموري
و أنا انسانه تعودت على تحمل المسؤولية من صغري، اجتماعيه جداً جداً، ما أحب أعتمد على أحد، و أبداً مش بيتوتيه
كنت جداً حزينه و زوجي كان دائماً يحتويني و يقدر وضعي و دائماً يقولي إنه بس فتره و تعدي و راح تتعلمي اللغه و راح يكون لك صديقات و راح تشوف الحياة كيف حلوه هنا بس اصبري و إتحملي شوي

و طبعاً الحمدلله اتغير الوضع و صارلي صديقات و طلعات و لكن مع ذلك مهتمه جداً ببيتي و زوجي و عيالي و هم اهتمامي الأول و هم جزء مهم من حياتي ولكن ليسوا حياتي كلها
طبعنا زوجي ما عجبه الوضع و ولا عجبه أي من صديقاتي، كل يوم و الثاني مطلع أشياء سلبيه في فلانه و علانه، و دائماً يردد و يقول ياريت ما نقلنا و حياتنا كانت أحسن هناك

لما الواحد يتعرف على أشخاص فأكيد العلاقه راح تتعمق أكثر و راح تعزمون بعض و تطلعون مع بعض، بس كالعاده زوجي ما عجبه
وافقت على طلبه اني ما أطلع مع البنات في الأماكن العامه مثل المقاهي و إلخ، ووافقت إن ما أحضر أي حفلات زواج، وافقت إني لو طلعت ما أتاخر بعد الساعه 8
وافقت إني ما أروح الجيم و إني استعمل الجهاز في البيت، وافقت و وافقت على كل طلباته بس عشان ما يحس بالغيره و عشان اسايسه

إلي صار بعد كل هذا، اني تعرفت على جاره طيوبه و متزوجه و عندها عيال و صغيره مثلي، زوجي ما إرتاح لزوجها بدون سبب و قلت عادي مو كل الناس ترتاح لبعض
طلب مني بصريح العباره اني أقطع علاقتي بالصديقه هذي تماماً، سألته ايش ألسبب و اني ما شفت من البنت إلا كل خير و هي محجبه كويس و كل شي تمام
سألت عنها بين البنات و قالو انها إنولدت في البلد هذا و عاشت كل حياتها هنا و يعني ما كانت كويسه من ناحية الدين و زوجها نفس الشي و انهم إتعرفو على بعض في الثانويه و إتزوجوا و هم صغار
قلت الحمدلله الله هداهم و إتزوجوا و الحين عندهم طفلين ما شاء الله،، بس زوجي يقول إنه سمعتهم كانت سيئه سابقاً و إنه ما يتشرف بمعرفتهم و عشان كدا مصر و مصمم اني أقطع علاقتي بالبنت هذه
أمري لله و وافقت عشان ارضيه و فعلاً قطعتها بدون معرفتها يعني ما اتصل فيها أبداً و لو اتصلت ما أرد عليها، لو عزمتني ما أروح و اتعذر بشياء تافهة إلخ إلخ إلين العلاقه قلت تدريجياً

ما تكلنا صارلنة يمكن شهر و قبل يومين اتصلت فيني و هي تبكي و كانت تمر بمشكله جديه مع زوجها و انهم على وشك طلاق، طبعاً حزنت عليها و طلبت مني نطلع على مكان لأنها محتاجه تتكلم و البيت ما يسمح لوجود الأطفال
طلعت معاها ولكن ما قلت لزوجي قلت بس اني رايحه السوق اشتري اغراض و راجعه مشوار ساعتين بس (صحيح غلطانه في هذه ولكن اضطريت أسوي كدا لأنه ما كان سمح و البنت فعلاً محتاجه تكلمني)
اليوم كان زوجي في البيت و كان بس يلعب بتلفون و ما أدري كيف ولكن شاف انها اتصلت أكثر من مره و بدأ يصارخ و يقول إنه وثق فيني اني راح أنهي علاقتي معاها و اني ما احترم رأيه و لا أطيعه
أنا وقتها خلاص ما قدرت اتحمل أكثر وانفجرت فيه أصارخ و أقول، أنا إلي ما أطيعك؟ كل إلي تنازلت عنه عشانك، المهم ألكلام كثر و كل واحد يرمي على الثاني

و في الأخير قال كعقاب لي اني ما راح أروح حفلة اليوم (كنت معزومه على الحفله من شهر و هو عارف و اشتريت و إتجهزت عشان الحفله هذه) و قال و هو يهدد و يتواعد لو طلعت من البيت ما راح يصير خير و اني راح اندم كثير

الحين هو طلع للمسجد لصلاة الظهر و أنا والله ماني عارفه كيف اتصرف و من وين أبدأ و ايش أسوي
فهموني كيف اتصرف؟ زوجي إللي اتغير ولا أنا زي ما يقول؟ مين الغلطان؟

زوجي إنسان جداً طيب، و يحبني بشكل جنوني، و أب ممتاز و كل شي فيه جيد، و لكن تصرفاته تزعجبني، يحاول يتحكم فيني حتى في اموري الشخصيه
يحب يعرف بالتفاصيل مين صديقاتي و مين أزواجهم و فين أروح و ليش و متى أرجع بالتمام و يتصل أكثر من مره
و أنا انسانه كتومه، ما أحب أقول كل شي يخصني لو أنا عارفه إن معرفته ما راح تفيد شي، ما أسأله مع مين طالع ولا متى بيرجع، ما أسأله عن مشاكل عائلته و بالتالي ما أقوله مشاكل عائلتي
مع كل مشاده كلاميه يردد نفس المقوله إنه ندمان إننا نقلنا و اني تغيرت، و أنا أقوله إنه هذه هي شخصيتي الحقيقيه و سابقاً كنت بمرحله مختلفه و الحياة و الوضع السابق هو إلي فرض علي أكون بيتوتيه و تكون إنت الوحيد إلي أتكلم له و أفضفض له
مع إنه سابقاً كان جداً يكره اني متعلقه فيه و دائماً أنا إلي اطلب منه إننا نطلع نغير جو و إلخ و كان يقول آه متى بس بتعتمدي على نفسك و تسيبيني لحالي

بالله عليكم إنصحوني، أنا والله خلاص ما أقدر اتحمل أكثر من كدا ولا راح أقبل إنه يتحكم فيني أكثر
هل اتصل بأهلي ولا أكلم أمه؟ ايش أسوي، أفكاري ملخبطه و أنا جداً حزينه

__________________

الامومة هي ان تضحي بكل شيئ جميل ليكون في اطفالك الاجمل