السسلام عليكم ~

انا فتاة غير متزوجة لكن هالجمله دايما ترن بأذني
لأن وحده قالتها لي " عزي نفسك " ومن قلت لها كيف ؟ ماردت
ومرا قريت بمنتدى وحده منزله مشكله وردت عليها عضوه من العضوات
اختصرتها بهذي الكلمات فقط

" عزي نفسك يعزك زوجك وأهله "



انا دايما يشبهوني بخالتي هي طيبه مررررا
لكن من جد مااحس لها قيمه وتقدير مع انها حبوبه لكن اذا قالوا فيك منها اتضايق
وربي مو كبر بس لأنهم يقولونها باحتقار كذا ويكشرون ويأشرون بيدهم بإشاره سلبيه
وبعضهم يقولون مسكينه فيها دباشه

خالتي من تزوجت وزوجها مايعطيها اهمية قد زوجتة الثانيه << مع انها الأولى
طبعا هو يحبها ويحب اطفالها كثثيير لكن مددري لييه ؟ ايش المشكله ؟
زوجته الثانيه بس يروح لها ويخلي الجو كله لها
لكن خالتي ما يجمع الناس الا عندها
يعني مثلا يجيب الذبيحه وهي تطبخها بسم الله عليها
او يجيب الذبيحه هي تقطعها لها ولزوجته وهيك

يعني عادي اي وقت يدخل عندها ضيوف مالها شور
مالها تقدير , ومو بس زوجها حتى اهل زوجها وكل مجتمعنا

مرات اذا اجتمعنا مع اخوالي هي الي تطبخ وتجيب لخالاتي الي اصغر منها
واحيانا يقولون والله ودنا بقهوه وو كذا وكذا .. الخ وتجيب لهم مثلا تقول رحمتهم , خليهم يستانسون ,
واحيانا تشكي تقول انا سويت وسويت وهيك

حتى بناتها مو مثلنا احنا وبنات خالاتي نسوي لأمي كل شئ حتى بدون ماتأمرنا
لدرجة اني اقول لأمي مره يمه احنا لنا حق بعد
نبي منك اهتمام صحيح انك امنا ولك حق اننا نقوم فيك ونلبي طلباتك
قالت ايه انتم مثل الشغالات << هنا تحطمت زياده ههه


خالتي اطفالها احيانا ماتعطيهم اهتمام قد اهتمامها للناس

فـ مره طبخت فطور فـ بيت اخوالي ومعانا اولادها المهم كنا انا واختي بنرفع لنا فطور بلحالنا
لأننا مانقدر نفطر مع اولادها , لكن جت نادتنا وقالت تعالوا
من جلسنا ع السفره قالت لي انا واختي " شفتوا بديتكم ع اولادي لاتنسون تقولون لأمكم لأني احبكم وابيكم تفطرون معنا


يعني مدري المشكله لأنها حبوبه ؟
بس انا لي زوجة خالي حبووبه لكن لها قدر كبير وانا عن نفسي احترمها واحسب لها كم حساب
رغم انها اصغر مني
وحتى خالي ذاك اليوم يقول وربي اخاف منها .
وهل البنت اذا تنازلت عن حقها تكون رخيصه ؟
وحده قريبتي بالمرره تأخذ حقها بكل القوه وبلسان طويل وربي كلن يعطيها عشان يفتكون من لسانها ولا أحد يحبها !
من جد احس ذهني مشوش كيف أكون محبوبه وبنفس الوقت مااتنازل عن حقي ويكون لي تقديري واحترامي


لأني قريب بتزوج وابدا مابغى اكون زي خالتي
انا ابي احد يفهمني حته حته لأني لازم شرح << هه معليش تحملوني


انا مااعرف اذ هالشئ له علاقة بالموضوع لكن انا بأي مكان استحي اجلس كذا
مثلا اقوم اروح للمطبخ واشيل مع ربة البيت او اشيل القراطيس من ع الأرض
لدرجة مره جهزت القهوه مع وحده عازمتنا لأول مرة
ومن جاء وقت العشاء قلت لها تبين اساعدك بشى ؟ قالت غسلي المواعين ؟!
صحيح اني سألتها لكن معرف شعرت بنوع من الغرابه ؟!
لاتفهمون اني اتمنن بالشئ هذا لكن ماعرف خانني التعبيرر