السلام عليكم
مادري منين ابدء متلخبطة افكاري حيل انا خايفة ان زوجي يروح من ايدي لاني قاعدة اطفشة مني من غير ما اقصد بس والله مو بيدي احبة زوجي جدا محترم وعاقل وخايف ربة حيل وبار بوالدينة وبأهله وعلاقاتة الإجتماعية حيل طيبة مع الناس والكل يحبة وهو دمة خفيف حيل والمشكلة انه حيل حلو وكلة البنات يطالعون فيه لما نروح اي مكان وهالشي ينرفزني حيل وودي ان لما اطلع معاه كل البنات يختفون وحتى لما تصير مناسبة بعايلتنا الكل يتكلم عنة وعن جمالة والمشكلة يتكلمون قدامي من غير مايحترمون حتى شعوري قمت اخاف اني راح افقدة لانه متفوق علي بكل شي وما اقدر اوصل للمرحلة اللي هو فيها حتى لما يتكلم معاي استانس علية وودي اني اونسة مثل مهو قاعد مايونسني بس ماعرف
شكثر شكيت فيه قلت مو معقولة ماعندة علاقات بالوقت هذا او بنت ترمي بلاها علية واخذت تلفونة وخليتة عندي وهو شاف هالشي وادري انه حس بشكي لانه حيل ذكي وماشفت اذكى منة فتركلي التلفون ومشى وقضى يومة كلة من غير تلفون ومالقيت علية شي والحمدلله حتى هو حيل واضح معاي ولامرة كذب علي بس انا طفشتة ماعرف اسولف معاه ما اعرف افتح موضوع وهو فاهم هالشي فيني ويقعد يدربني وانا اعاندة عشان ابي ابين له اني اعرف وانا ماعرف
حتى كذب قمت اكذب علية عشان اخليه يستانس علي وينسجم معاي ويميل لي وادري انه يحس ان كلامي مو صدق ويطوفلي ولما يزعل مني ماخلي كلمة ما اقولها واطلع كل اللي بقلبي انت ماتبيني ادري كل الناس يحبونك ويتمنونك ومو مفتوحة نفسك لكلامي وطبعا اقوله وانا ابكي وهو يسكت ومايرد علي وهذا اللي ينرفزني ولما يرد علي يبي يحول الموضوع ضحك ولما اعاندة وابيه يكون جدي بالكلام معاي يطلع برا ويخليني بروحي لين اقعد ابكي بكل حرقة من اللي فيني
ادري انا غبية بس والله خايفة افقدة ومو عارفة استقر معاه حتى صرت ماعرف انام وحتى لما يجي ودي اجي اعتذرلة بس احس انه راح يفتحلي محاضرة او يضحك علي وانا ابيه يكون جدي معاي ومايطول الموضوع ويريحني من اللي قاعد ياكل قلبي وما اعتذرلة انطرة يجي ويكلمني وحتى لما اكون زعلانة وساكتة ابيه يتكلم القاه عادي وكانه مو مهتم ويفتح التلفزيون ويبتسم ولا كان فيه انسانه محترق قلبها
اهله حيل طيبين معاي ومحد يدخل بحياتنا ابد لان زوجي له هيبتة بين اهله ولو انه حيل ماخذ عليهم وماخذين علية ومداخل معاهم لدرجة كبيرة وانا اخاف منة مادري ليش اخاف منة مع انه ولا مرة مد ايده علي او سبني بس احس ان فيه رجال قدامي هيبتة مثل هيبة ابوي واحس اني خايفة منة حتى اهتمامة بنفسة هو حيل يهتم بنفسة بنظافتة وشكلة ولبسة وعطورة وهالشي يحرني حيل مابيه يهتم بنفسة ويطلع ويشوفونة بنات ودي اخليه يطلع من عندي مبهدل ودايما اقوله خف على نفسك شوي ويبتسم ويطلع واحس ان ابتسامتة بعد اتحرني شسوي اشلون اخلية يستانس علي واستحوذ تفكيرة وعقلة وكل شي فيه خايفة اني افقدة بغباءي