بكتب لكم قصتي مع خطيبي من اول يوم عرفته فيه وانتو احكموا..لاني تعبت من التفكير..راسي بينفجر أحياناً أحط اللوم عليه وأحياناً اقول يمكن ظالمته..

أنا انخطبت قبل سنة ونص من واحد مشهود له بالدين وبر الوالدين..لكن العيب الوحيد فيه انه خجول شوي..قلت بس هذي دعواتي بالتوفيق..ربي استجاب لي..صليت استخارة ووافقت..ملكنا قبل سنة.. ومن ذاك اليوم بيننا مكالمات..بس المشكلة ان مو هو اللي طلب يكلمني..اخوي كلمه وقال اذا تبي تكلمها ماعندنا مشكلة..وهو وافق..وكان متحمس على كلام اخوي..بس ماحسيت بهالشي لما كلمته..بالبداية كنت اتثيقل عليه وكان مثل العسل معي..وكان دايما يرسل لي ويكلمني..بس لما بديت اهتم فيه واسأل عنه..سحب علي
صار مايرد علي الا بعد يوم او يومين.. ويتحجج بالشغل ..والرسايل بالحسرة يرسلي..وحتى اذا كلمني نبدأ اخبارك وعلومك واذا فتحت معه موضوع نتناقش فيه..اما انه يضل يسلكلي وباله مو معي او يصرفني..لدرجة صرت دايم ساكتة معه..ماأحب اسولف معه..لان اول ماافتح معه موضوع يصرفني ويتحجج بالنوم او انه مشغول..ودايم يقولي سولفي ليش ساكتة!! عجزت افهم عليه يبيني اسولف واذا تكلمت معه حتى لو موقف صاير معي اقوله عنه يصرفني ويسكر..لدرجة صرت احاسب ع كلامي قلت يمكن اقوله شي يزعله بدون ماادري!
قبل تقريباً 6 شهور ارسلت له رسالة بالوتس..اني ماوافقت عليك الا لاني اعرف انك شاب خلوق واتمنى اعرفك اكثر واكثر بس انت مو معطيني مجال اتعرف عليك لأني احسك مو مهتم للمكالمات..واذا تبي نقلل مكالمات بس تكون مكالمة اسبوعية طويله نسولف فيها ع راحتنا ع رواق ونفرغ انفسنا لهالساعة..
بعدها كلمني كم مرة مارديت لاني كنت في الجامعة ورجعت متأخرة ونمت وكلمته بالليل..بس كنت طول المكالمة ابكي لاني كنت مقهورة من بروده معي وحاسة انه مغصوب علي! لاني اعرف ان امه شخصيتها قوية ماشاءالله ( بس من الناحية الايجابية)..فقلت يمكن هي غاصبته علي..لانها تصير بنت خالي..
طبعا قالي انا متحمس اكلمك وانا فهمت شخصيتك وحبيتها(هنا انا بغيت اقوله من وين عرفت شخصيتي وحنا مكالماتنا ماتتعدا دقايق وكلها اخبارك وش سويت بالدوام؟!!!!)
وعشان اكون منصفة هو خلووووق معي وعمره ماسمعني كلمة تضايقني ومافيه عيب الا التطنيش..يعني حتى لو كلمني مااحس ان كلامي مهم..يعني ممكن في نص السالفة يصرفني او يتثاوب وانا اسولف او يكلم احد عنده..ومايحسسني ان كلامي مهم..هنا انا اسكت واتحجج اني مشغولة واسكر..
وقبل فترة شهرين ارسلتله رسالة ثانية قلتله خلينا نوقف مكالمات لفترة..ومارد علي..ارسلتله بعدها بيوم ماتوقعتك تطنش رسالتي..بعدها رد علي برسالة فيها كلام كثير وقالي ليش انتي زعولة..وقال اذا فاضية بكلمك..
انا رديت برسالة وضحكت يعني مو زعلانة وقلتله انا مشغولة الحين اكلمك اذا فضيت..كلمني بالليل..وقعدت اتناقش معه عن البيوت..وش تفضل البيت يكون صغير او كبير..وهو مو متحمس..وانا اسولف هو يتثاوب! مع العلم اننا مانسولف مع بعض الا مرة في الشهر بالكثير..وباقي مكالماتنا كلها اخبارك واخبار الدوام بس ونسكر..

هذا اسلوبه معي مايفضي نفسه عشان يكلمني..يكلمني وفي باله مليون شغله غيري..مع العلم ان زواجنا باقي عليه سنة..يعني لسا ع تجهيزات الزواج اللي ممكن تكون مشغلة باله..والله اني فكرت انفصل عنه اكثر من مرة وصارلي شهر كل يوم استخير بالطلاق..ماابي اتزوج واحد واقعد ساكتة انا وياه..ابي واحد ياخذ ويعطي معي..مو معقولة حاطني بآخر قائمة اهتماماته..معطي اهله واصحابه وشغله وزملاءه وحتى جيرانهم من وقته وانا لا..ليش طيب..انا مو جدار..

واللي مخليني اتردد بالانفصال انه طيب معي وعمره مازعلني بكلمه..بس مطنشني لأبعد حد..
تعبت والله من البكاء لوحدي..وعمري ماكلمت احد بهالموضوع..حتى خواتي.. تكفون شوروا علي الله يجزاكم الجنة..والله اني اكتب وانا ابكي..الله يأجرني بس..

قبل كم يوم كلمته رد علي وع طول انقطع بيننا ..قام ارسلي (طالع المدينه مع خوياي اكلمك اذا رجعت) ارسلتله ترجع بالسلامة..ومن يومها مادق ولا ارسل..

فيه اشياء كثيرة ماذكرتها..
اولها ان تأجيل الزواج من جهتي لسببين اولها..اني ادرس وباقي لي سنة وبين مدينتي ومدينته 7 ساعات..ولو حاولت انقل لجامعتهم راح تضيع علي سنوات كثيرة لان الخطط الدراسية تختلف اختلاف كبير جدا..
والسبب الثاني انه مو جاهز للزواج..مع انه دايما يطلب التعجيل بالزواج..
هو مدرس بقرية في الشمال ويبغى نسكن في الغربية عند اهله وانا دراستي في الوسطى..يعني مستحيل نقدر نستقر..! وبيكون بيتنا السيارة نتنقل من مكان لمكان!
وانا مو من النوع المتعود ع مسكة الخطوط كثير..يعني بداية زواجي اللي مفروض تكون راحة..راح تروح تعب في تعب من الطريق..

مرحبا اختي

اول شي بقولك على شغله وخليها حلقه باذنك
((طبع الرجال مايعرف يتصنع للامور يعني لو مغصوب عليك بيلمح اذا كان مره خجول يعني شيلي هالفكره من راسك))

وبعدين مافيها شي انتو الحين بفترة ملل طبيعيه جدا ,, ماتقاربت افكاركم حتى تتناقشو بموضوع ورا موضوع

بس مشكلتك انك خلاص حاطه ببالك هذا خطيبي ولابد يكلمني ويتفاهم معي ويونسني وا وا وا

اسمعي الكلام من اخ لاخته..,,
كلكم توكم بعالم جديد مافي شي يجي من باب للطاقه , تعوذي من الشيطان , ولاتحمليه فوق طاقته هو لسى ماعرفك حتى يدخل لك من الباب الي يستلطفك فيه

واقولك هي بصراحه دام يقولك سولفي واخرتها يصرف او يتثاوب مايبغالها كلام (( ماعجبته سالفتك او مو هي الي تستلطفه وتخليه يتحمس لسوالفك))
فعشان كذا عادي خذي الامور ببساطه كل الي بينكم تلفونات وتبغي تتفاهمو وتاخذو على بعض ويكون بينكم حماس بمواضيع وشغلات وكذا ,,, بدري وانا اخوك ,, ترا الرجل له اهتمامات وعلى حسب الي يعجبه يرتب اهتماماته

وانتي ماعجبتيه بسوالفك بس لما يكون معك ويجلس يمك بتتغير المفاهيم وبيشوف مفاتنك ويبدء بتغير فكره وحياته بشكل عام وبتكوني الاولى بتفكيره

واوضحلك اكثر الوصول لقلب الرجل عن طريق .... افهميها انتي عاد.. والمرأه العكس

وانا ضد ان المرأه تجري ورا الرجل وكيف اخليه يهتم فيني وا وا وا

لا يالغاليه خلك على راحتك وخله على راحته بس تفكيرك بالموضوع بيزيد المشكله ,,بس اركدي دام في شخص عندك وغيرك تتمنى شخص
انتي فكري لبعيد خلك على طبيعتك واشنغلي بحياتك مثل ماكنتي قبل الخطبه وبتلاحظي الفرق

ترا مشروع الزواج مثله مثل اي مشروع البدايه تبغى تفهم المشروع من جميع النواحي وبعدها تشوف ايت ناحيه تفيدك وا وا وا

وكل الي تمري فيه عائق بسيط يبغاله صبر منك

اما على بالك في خلطه سحريه نقولك سوي كذا وكذا خلاص يرجع زي ماتبغيه لا طبعا

بس وسعي مدارك تفكيرك شويتين وبتشوفي كل خير باذن الله

واسف عالاطاله

اختي زهر مشكورة ع الرد..
مابيننا زيارات ابداً..اللي بيننا بس مكالمات

اخوي الهدوء عنواني مشكور ع الرد..
بس عندي كم ملاحظة
والله احياناً احسه لغز صعب الفهم..اكلمه في اهتمامته بس ماياخذ ويعطي..هو يحب الشعر كثير..فصرت اكلمه عنه..واسأله كيف تعلمه ووو..وقلتله ليش ماتحاول تطور نفسك بالشعر لان انت عندك موهبة وحرام تهملها..فقالي انتي ماتفهمين بالشعر..!
واحاول قد مااقدر اخليه هو يفتح المواضيع..عشان يكون من اهتماماته..واذا بدينا نتكلم يروح بعالم ثاني..مهما كان هذي شخصيتي وحتى لو سواليفي مملة مثل ماتقول ماراح اقدر اتغير بس عشان ارضيه..!

طيب كيف اتصرف الحين..انا افكر اقوله نوقف مكالمات نهائي الى يوم الزواج..لاني بصراحة طفشت من هالوضع..

ومسألة ان مافيه رجال ينغصب أختلف معك فيها..لأن عندي اخوي (مغصوب) ع بنت خالي وماقدر يقول شي..لأن شخصيته ضعيفة قدام أمي..

تعوذي من ابليس يا قمر
وضعك عاادي جدا لأي زوجين مملكين طولت ملكتهم
احمدي ربك ما جات مشاكل بينكم ترى الملكة الطويلة سلبياتها أكثر من إيجابياتها
وانا اشوف انو زوجك كويس جدا ماشاء الله عليه فحرام تنفصلين عنه لمجرد انو ماياخذ ويعطي معك
لنفترض ان شخصيته من النوع الخجول والحياوي وماياخذ على الواحد من التلفونات
لازم زيارات و عشرة حقيقة عشان تاخذون على بعض يا حلوة
ولا تصدقين اللي يقولك فترة الملكة لازم تكون سوالف كثير مو شرط بعضهم ما شافو بعض
و حياتهم كانت ولا احلى ..
الحل من وجهة نظري انك لا عاد تعاتبيه ولا عاد تزعلي عليه , ان دق حياه الله و ان طنش الله معاه
يعني حاولي تفكري في دراستك وبس
شيليه من قائمة تفكيرك لانو عندك هدف ولازم توصلين له كملي دراستك بدون ما تنشغلي فيه
هو مبين عليه ما راح يتجاوب معك من الجوال ابدا ... الييين ما تصيرون في بيت واحد
فيه ناس كذا ما تعرف تسولف للجوال ولا تبدع فيه ولا هي براعية رسايل
و أظن زوجك من هالنوع , وصدقيني انا متأكده بعد الزواج يطلع عسسسل و تفرحين فيه وفإهتمامه
لأنه من الأساس خلوق وذوق على كلامك

الله يوفقك ياعسل

__________________

‏
الوعي هو الملاذ ..

أستغفر الله العظيم ؛
( الفردوس غايتي )

اللي فهمته من كلامكم ان الموضوع طبيعي جداً ومايستاهل الزعل..وانا بالنسبة لي مجرد الكلام في هالموضوع ريحني كثير..
شكراً ع اهتمامكم وردودكم

زوجك يمكن مثل زوجي

طيب و حنون بسسسس بااااااااارد و صاااااااااامت و مايحب الكلام
و لو سكتت، ما عجبه .. يبغاني أتكلم على طبيعتي بس هو يجلس ساكت