السلام عليكم
أتمنى منكم المساعدة
مشكلتي يمكن تلخيصها بالتالي:
متزوجة منذ ستة أشهر بعد عقد قران لمدة ستة أشهر..زوجي ماديا على قده راتبه4000فقط..أنا معلمة وراتبي دبل راتبه عدة مرات ..اشترط عليه الوالد في الخطبة وكما هو من عاداتنا قاعة زواج بسيطة وعشاء بالاضافة إلى المهر..وافق بدون اعتراض..طلب عمل ملكة وافق الوالد على ان تكون في بيتنا ويتحمل زوجي العشاء..تمت الملكة .. اقترح زوجي عدة مرات عدم عمل زواج في قاعة والاكتفاء بعشاء بسيط .. رفضت لأن الشرط واضح من البداية.. اعتذر زوجي بأن ليس لديه إمكانيه .. عرض علي ان اسلفه المبلغ .. رفضت .. كادت الامور تنتهي بيننا إلى الطلاق..لولا تدخل أمي واقتراحها أن المبلغ الذي سيشتري به العفش يعمل به الزواج وأنا اساعده لاحقا بالعفش .. تم الزواج .. استأجرت زوجي شقة من عينية الزواج من بعض اقاربه .. وساعدته في فرش الشقة .. مرت حياتنا بين مد وجزر عشنا اياما حلوة واخرى مرة..كانت كل مشاكلنا تدور حول المادة .. زوجي يذهب ثلاث ارباع راتبه اقساط وانا مقدرة هالشيء وساعدته كثير حتى في شراء سيارة مستخدمة بدلا من سيارته القديمة التي تعطلت مؤخرا..المشكلة ان زوجي كل مايصير بيننا مشاكل يذكرني بطلبات أبي وانه تحمل الديون من اجل ارضائي وارضاء ابي وينسى كل الوقفات التي وقفتها معه مع اني ماني مجبورة .. اليوم صار بيننا خلاف .. وصار نفس الشيء..مشكلة خلاف اليوم ان عقد اجار الشقة اللي مستأجرها انتهى ولن نجدد في نفس المنطقة .. واقترحت سابقا على زوجي نجدد في المدينة التي يعمل بها لان عندي اجازة لمدة وقلت اظل معه بدل ما يظل يسافر .. طلب سلفة من عمله وقالوله بتطلع له غدا .. اليوم اتصل بي يقول إنه لقي شقة ممتازة بس سلفتي مابتطلع إلا بكرة ويبون مقدم.. بس انا شفت انها كبيرة علينا وغالية وحاولت اناقشه في الشيء ذا وان ورانا مصاريف نقل عفش..قعد يعصب في الكلام قلت له وش فيك معصب احنا قاعدين نتناقش..قال نتناقش في ايش..وقال مع السلامة وقفلت الخط..رسل رسالة بعدها قال خلك في بيت اهلك الين مايصير معي فلوس وما احتاج احد..رديت عليه قلت له انا استاهل اللي يجيني ..هذا بدل ماتحطني في عينك وعلى راسك وعلى ايش عشان ناقشتك..بعدإا رسل لي وقال نتناقش في شيء مفروغ منه بس انتي تحسبين انك بتدفعين الاجار انا الغلطان اني تحملت ديون عشان ارضيك انتي وابوك والناس وحتى اقاربك ما احد جاء منهم وانا اقاربي جو من اخر الدنيا وقالي إذا تبي شيء من العفش خذيه لاني بوديه عند اهلي يخزنوه الين الله يسهلها .. قلت له العفش ببيعه وباخذ حقي وباقي لي عندك قيمة السيارة ..قال ابشري كنت عارفة انك بتقولي كذا .. قلت اكيد بتكلم تحسبني بقفد ساكته وانت كل شيء تتكلم وتتندم بتكاليف زواجي .. قال انا ماني ندمان على المهر انا قاعد اتكلم على التماليف اللي تدينت عشانها ومالها فايدة .. قلت له بس انا الحمارة والا المفروض ما احط ريال بس قلت زوجي مالي ماله وبوقف معاه ماكنت اظن انك بتحسب كل ريال حطيته بزواجي .. وقلت شوف زوجات اخوانك كيف يدلعونهم اخوانك ويعطونهم .. قال مالنا دخل بالناس ... قلت الا لنا دخل هذا انت تتكلم عن الناس ..

وش رايكم .. كيف اتصرف .. كيف اتعامل مع هذا الزوج .. هل اطلب الطلاق .. ولا اغير معاملتي معه .. وش اسوي ساعدوني

__________________
اللهم أسألك أن تحقق لي ماأتمناه عاجلا غير آجل .. وأن تحقق لأختي "المنسية" راحة وسكينة وعافية ..

ابنتي الكريمة :
بارك الله لكما وبارك عليكما وجمع بينكما في خير
صار المال محور العلاقة وصارت بقية الأمور روابط لهذا المحور وكلمة محور أي أنه أساس العلاقة وإذا جعلتما حبكما لبعضكما هو الأساس أصيح المال رابط من روابط الحب
راتبك ثلاثة أضعاف راتبة وهذا أشعرك وأهلك بطمعة وبنيتم كل تصرفاته على هذا الأساس ورد بالمثل هذا في أول الطريق فكيف بعد العيال
المخرج من هذا إما أن تقبلي بدخله وصرفه وفق ما هو عليه الآن وتوفري مالك وإما أن تتنازلي معه إما بالهبة أو السلف حتى يتيسر له السداد لك
فأنظري له بشكل متكامل سلبياته وإيجابياته هل يناسبك لتكملي الحياة معه وهل سلبياتك وإيجابياتك تناسبه ليكمل معك الحياة فتجاوزي التفاصيل للوصول للهدف وهو أسرة كريمة تهيئ العش الجميل للأطفال القادمين
وموضوع الطلاق ليس مخرج فالحياة ليست محل فساتين أعيد هذا وأستبدله بهذا فقد يكون القادم أغنى وأبخل أو أفقر وأسوأ وغير ذلك.
أما تغيير سلوكك معه فهو الأولى فلا تنظري لهدف بسيط من ينفق على من وكيف سأتصرف اليوم وغداً بل أنظري لوضعك معه بعد ثلاثين سنة كيف ستصنعين السعادة خلالها.
أسأل الله لك حسن الرأي والرشد والتيسير ولجميع المسلمين والمسلمات.

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.