السلام عليكم و رحمة الله وبركاته ,
اسعد الله ايامك



انا صارلي متزوجه ثلاث سنوات بالضبط و ربي رزقني ببنوته عمرها 11 شهر ’ في رمضان رح تكمل سنه ..
مشكلتي ان زوجي يخوني ,
مو مره ولا مرتين ولا ثلاث ... كثير و تعبت معاه
كل ماكشفته قلبي ينحرق وربي يعورني قلبي كل مافكرت في الموضوع هذا .
انا مارح امدح نفسي لكني مو مقصره معاه في شي بالبيت
من ناحية النظافه و الطبخ و اللبس والاهتمام و الدلع و الفراش ,
و أساله انا اذا في شي مقصره معاك فيه علمني ,
ويقول لا منتي مقصره في شي و مبسوط معاك
اول مره عرفت انه يخون
1- ايام الملكه ’ كنت اكلمه في الليل و قالي خلاص رح انام تأخر الوقت و قفل مني .
ثواني ورسل رساله قال حبيبتي دقي ماعندي رصيد .. !!
استغربت , دوبه مكلمني ويقول بينام , و اصلا هو اللي متصل
و بصراحه نغزني قلبي .. دقيت عليه لقيت صوته متغير
قلت له رسلتها بالغلط ؟ والله انه ارتبك بالرد و فمهتها ..

مشيتها ..

ثاني مره رسل لي صوره ايام رسائل الوسائط , صوره ايده كاتب عليها أحبك و قلوب
الصوره مقصوصه من تحت زي مثلا كاتبه ( أحبك يارا ) كلمة يارا مكتوبه تحت كلمة أحبك
و قصيت الصوره من عند كلمة يارا و رسلتها ..
واضح والله انها مقصوصه الصوره ..
لأنو في حبر واضح في ايده .. والصوره طالعه صغيره . وريتها أخواتي و قالو صح الصوره مقصوصه
و وريتها ابوي وقلت له .. قال مو مشكله انتي بعيده عنه و لما تقربين منه تحتوينه و من ذا الكلام
وزعلت منه وقلت لأبوي اذا هذي اولها ينعاف تاليها ,
و ابغى انفصل , عصب علي وقال كبري عقلك .. و مارضي لأنه ولد عمتي
و طنشته زوجي اسبوعين و كلمني بعدها ..

المره الثالثه , بعد زواجي بشهر
كنا جالسين مع بعض ورن جواله و مارد ,
و بعدها نزل تحت , و طلع دخل الحمام ,, اخذت الجوال ودقيت على اخر رقم , لقيته يكلم بنت
والله كأنو أحد صفقني على وجهي . انفجعت
و بديت ارجف و احس ببرد , يعني لساتنا عرسان و يكلم ؟؟!
ناديته بالغرفه و دقيت على الرقم و الجوال في يدي قلت مين هذي , لكن البنت قفلت جوالها , و ملامحه تغيرت ..
واعتذر مني و قال بس مشاكل و ابغى انهي العلاقه ,
مع انو غير الرقم لما تزوجنا .. يعني معطيها الرقم الجديد ..
و خرجني برا و قال لي لا تجلسين تشكين فيني و توبه و اعتذر و وووو ...

وعديت الموضوع ظاهريا فقط لكن في قلبي مو قادره انسى

بعدها بفتره رحت عند اهلي كان عندي اختبارات في جده , و انا متزوجه بالرياض
لما رجعت الرياض جلست على اللاب توب ,
دخلت على ملفات لقيت ايميل له , وانا اعرف باسووردته ,
دخلت على الايميل لقيت وحده اسمها همس اليل , و في ايميل ثاني مسويه حاط البنت بس هذي في ايميل لوحدها ..
و انصدمت للمره الرابعه و لما رجع من الدوام كلمته ,
قال نفس الكلام الاول انو اشياء قديمه و من ذا الكلام ,
واني انا انبش وراه ..
صحيح اني انا انبش وراه لأنه هو خلاني اشك فيه ..
و اخر دخول للايميل كان وقتها انا عند اهلي يعني لسا يكلمها
وقتها طنقرت و رحت لأهلي و جلست شهر وشوي و جاني وراضاني ورجعت ,

ولما رجعت لقيته لسا يفتح الايميل ولقيت رساله منها , فتحت الايميل ولقيتها تسال عنه
سبيتها انا ذاك الوقت قلت لو مابعدتي عنه رح اسبب لك مشاكل مع اهلك , وهو مجرد تهديد مني .
كان وقتها المغرب و كنا رح نخرج نودي امه عند اخواته ( أمه عايشه معانا )
وانا وهو رايحين للسوق ..
كان ساكت في السياره و مو على بعضه
لما نزلت امه قال لي وش سوتي في المغرب ؟
قلت ولا شي . قال مافتحتي الايميل قلت الا ..
عصب علي ويخاصمني يقول ذحين زوجها دق علي وهددني ..
قلت ياشيخ .؟!
رح تعطيه رقمك و تقول له هذا واحد كنت اكلمه و هذا رقمه ؟؟؟؟؟
مو معقوله الكذب . هي اللي دقت عليه و علمته , بس متى دقت ماعرف لأنه صحي من النوم و خرجنا على طول ..
قلت له تدافع عن وحده وصخه ؟؟؟ و تخاصم زوجتك ؟

و لما رجعنا غيرنا باسورد الايميل هو حط كم حرف وانا حطيت كم حرف عشان لاحد يرجع يفتحه ..

بعدها بفتره لما اخذ جواله الاقي فيه مقاطع وسخه و مقاطع رجال منحرفين
هو يبحث عنها بقوقل ..
لقيت صوره له مصور نفسه وهو عريان و مصور عضوه ..
انجلطت انا ..
رحت لأمه لأنها ساكنه معانا بالبيت و قلت وبعدين مع ولدك الى متى ؟!
وقلت شوفي بعينك عشان تصدقين و وريتها ..
راحت تخاصمه قال لها مالك دخل لو امشي بالشارع عريان محد له دخل
و قال لي انه صورها لواحد كان متخاصم معاه ..
شي مايدخل العقل مازال يكذب و كلمته و نصحته و جبت له هديه , و جبت له ايات و أدله و وعظته
و تصالحنا

بعدها بفتره جبت بنتي ..

و قبل كم يوم .. جاتني رساله على جوالي انه تم تفعيل خدمه كذا كذا على الرقم ...
استغربت من الرقم هذا جديد .. جوالي باسمه ..
دخلت على الاتصالات و دخلت سجل المكالمات ..
اخذت اخر رقم دق عليه و حطيته بالنمبر بوك طلع وحده اسمها العنود ..
و دخلت على سجل الشريحه الجديده
شفت نفس رقم البنت العنود دق عليها اكثر من مره و المكالمات مدتها طويله
عشر دقايق خمس دقايق , 13 دقيقه ..

رحت لأمه علمتها وقلت انا رح أعلم اهلي كفايه صبر ,
راحت له قالت ايش بينك انت وهي , هو مو عارف اني عارفه شي
جاني قال ايش قلتي لأمي قلت مين هي العنود
قام يضحك , قلت انا عارفه انك طلعت شريحه ., قال طلعتها لواحد من اصحابي
مو معقوله كل ماصار شي قال صاحبي صاحبي ..
كذاب
قلت صاحبك مايعرف يطلع لنفسه ؟
و كيف اخذ رقم البنت اللي من جوالك ؟
عصب علي و قلت له رح اعلم اهلي قال طز فيهم و لو احد دق علي مارح اكلمه
و وريني ايش بيسون لك . ومين بينفعك انا ولا هم ..
و بصراحه دقيت على ابوي علمته بالموضوع امس , قال خلي الموضوع يهدأ ورح أكلمه
و طبعا ينام بالمجلس يومين و مطنشين بعض ..
و انا خلاني موسوسه هو بأفعاله
خلاني اشك فيه
مستحيل مستحيل مستحييييل اني اثق فيه لو ايش يسوي
خلاص شخص مختوم عليه انه خاين ..
القهر انه يجيني كل مره يضمني ويقول لي احبك
مو مقصر معاي في اي شي
اغراضي يجيبها لي , اكل , اسواق , تمشيات , هدايا , سفر .. كل شي , دايما يقول لي كلام حلو
و انه يحبني , ويدلعني ..
مستغربه انا اذا فعلا يحبني ليش يخوني طيب ..
و بصراحه مايصلي , يصلي ويخلي , احيانا يجلس على جنابه يوم كامل .,
ولا مره شفته ماسك القرأن و يقرا

اللحين المشكله الاخيره صارت من يوم الخميس , لساتها طازجه .. و لسا متزاعلين ,
و ابغى حل ..
في مشاكل عند أهلي , أبوي طرد أمي من بداية السنه ,
و متزاعل مع اخواني رغم انهم في عماره وحده , و امي عند أخوي الكبير .
و ابوي توه متزوج وحده قبل اسبوع .. مع انه مو صغير أبوي لكن وش نسوي ..
لما أفكر الم عفشي و اروح لهم .. عندهم أهلي مشاكل تجيب المرض .
و أخواني بصراحه ماينفعون في شي . نفسي نفسي .. و ابوي سرت احس أنه مراهق ,
يسمع اغاني و يشتري من الاجهزه كل شهر جهاز و تزوج اللحين وهو عمره 71 ,
و ابوي مارح يهدد زوجي , رح ينصحه فقط , زوجي عارف اهلي و عارف مشاكل لأن أمه عمتي .
و عشان كذا قال لي محد رح ينفعك ..
من جد محتاره أشكي لمين و مين يساعدني ..

ابنتي الكريمة :
قبل الحديث عن زوجك أتحدث عنك حيث إنك تعانين من خلل في ترتيب الأولويات في حياتك
و لننظر جرائم زوجك وحجمها عند الله وحجمها عندك
لايصلى
لا يقرأ القرآن الكريم
لا يتطهر من الجنابة ومايتبع ذلك.
يخونك.
مميزاته عندك
يخدمك ماليا وعاطفيا ومعنويا
عند الله
أول جريمة = كافر في جهنم ولا يحلله البقاء معك ولا يحل لك البقاء معه(العهد الذي بيننا وبينهم الصلاة فم نتركها فقد كفر
وإن كان يترك ويقضي فاستفتي رئاسة الاستفتاء في ذلك.
عندك أول جريمة هي خيانته لك فهل لو كان لا يخونك وهو لا يصلي ستبقين معه؟ لا أظن.
ماذا تتنتظرين ممن يخون الله في صلاته ويظلم نفسه هل لغيره قيمة عنده فإذا خان الله فخيانة غي الله أهون عنده وقد يكبر في نفسه بعض البشر كأمه وأبيه وأبيك ولا يهتم لاطلاع الله على تركه الصلاة.
السؤال لماذا يخونك وهو يدلعك؟
الجواب ببساطة لأنك واجهة اجتماعية له أمام الناس متزوج ولهأسرة وزوجة وابنة وما عليه مدلعها وما قصر بشي؟
النصيحة :
إما أنتكوني تنظرين فيه صفات تجعله المناسب لك وأنه من الممكن رجوعه للطربق المستقيم وهنا تضعين لك هدف المحافظة على حياتك الزوجية وتقفلين قلبك وتفتحين عقلك وتضعين خطط لإحراجه أمام نفسه حتى تعيديه للطريق السليم وبهدوء وعبر مراحل مع الدعاء له والصبر عليه الضغط عليه بفقد خدماتك ووجودك كواجهة له ثم شرط عليه أن يتعدل وإلا سيفقدك ولا تلجئي لمن يحتاج النصيحة كوالدك وإخوانك وأبذلي كل ما في وسعك بعقلك بعد التوكل على الله لتحقيق هدف محافظتك على أسرتك وزوجك وابنتك وحمايته من نفسه.
وإما أن ترى أنه لا يمكن أن تعيشي معه وأنه لا رجاء من عودته وهنا أدرسي بعقلك لا بقلبك ولا تفكري بسلوكة ولا تتخذي قرار كردة فعل وانتقام ولا تنظري لأمومتك لتضحي من أجلها ولا وضع أهلك وتذكري أن العقل والهدوء سيد الموقف وبعد الله فقط بعقلك وأدرسي الموضوع جيدا لتنظري أي قرار تقررين.
أسأل الله لك التوفيق والنجاح

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.

جزاك الله خير أخي رجل الرجال .,
انا أحيانا لما اقول في نفسي بنفصل عنه , اتفكر شي صار معاي ,
قبل لا أتزوجه وقبل لا أنخطب جاتني رؤيه و هي ان الرسول صلى الله عليه وسلم أتاني في المنام و معه زوجته عائشه رضي الله عنها ,
أو إلي و بادرا بالسلام علي و صافحتهما و قالا لي أنه بعد اربعين يوم لي بشاره من عندهم ,
و فعلا بعد اربعين يوم بالضبط أخبرني أبي ان ابن عمتي تقدم الي لخطبتي ,
و فسرتها و قالو انها بشاره من الله لك , ويجدر بي الموافقه ..
و استخرت مره أخرى بعد ايام , ورأيت رؤيا أخرى من الرسول وعائشه , و هي أنني كنت على بحر
جزيره جميله جدا جدا جدا و خضرا , و كان يوجد في وسط البحر منزل لم يكتمل البناء مازال ( عظما )
و قال لي زوجي لا تطلعي على السلاسم فلم تجف بعد و سوف تسقطين ,
وعاندته و طلعت و سقطت فعلا , و أتى الي ساعدني زوجي ,
و لما عدت للشاطئ اتيا الي الرسول وزوجته رضي الله عنهم , و سابلتهما و قال لي لا تستعجلي و اصبري .. و قالو كل ما صبرتي نلتي ماتريدين ..
-- انتهى الحلم ,, هذه رؤيتي والله لم اكذب
وفسرتها و بشروني خيرا و قالو لي وافقي عليه فماذا تنتظرين بعد الرؤيه هذه ..

كل ماتذكرت الحلم هذا , احسه زي الدافع لي و تشجيع لي و يعطيني أمل ..

انا فكرت اني اهدده يا انه يترك الاشياء هذي و اما ننفصل .. لكن مو اللحين طبعا ,
فكرت اني اطنشه فتره طويله عشان يمكن يحس شوي ,
لأن روحتي لأهلي رح افضي له الجو وبياخذ راحته أكثر و بيسوي اللي يحلى له ,
قلت رح اجلس و اسوي واجباتي المنزليه فقط ..

ايش رايك اخوي رجل ..؟!

ابنتي الكريمة
لا تنتظري منه المبادرة للسلوك السليم إلا بهداية من الله بالدعاء له من قلب صادق والاستغفار
ولا تتركي بيتك وتساعديه على السلوك السيء وبنفس الوقت أظهري له كره أفعاله وانخفاض قيمته في نظرك وأنك تخجلين أن تتحدثي عنه عند أهلك والأولاد وماذا ستقولين عنه لهم إذا كبيرو وأدركوا هذه الأفعال وبدأت محاكمة الأجيال وبدأت ابنته تقول لا يشرفني أبي عند أحد ومن سيخطب او يزوج ذرية فاسق
ذكريه بهذا بعبارات هادئة تخاطب العقل وترقق القلب.
وتذكري أنك واجهة جميله له أمام المجتمع ويخشى أن تنكشف للمجتمع ما يدور بالداخل . فخوفيه مره ورققيه مره وذكريه مره
وأكتبي قوله تعالى ( ألم يعلم بأن الله يرى ) ليراها باستمرار فلعل الله يهديه بها.

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.