السلام عليكم ورحمة الله تعالى وبركاته
تحية طيبة وبعد,,,

بعد غياب طويل عن المنتدى رجعت إلى أخواني وأخواتي في هذا المكان
لا اريد أن أذكر سبب إنقطاعي لذلك لا أريد أن أبرر سبب رجعتي!!

أود أن أشكر الشخص الوحيد الذي رحب فيني فشكراً جزيلاً لك

مضى على طلاقي أكثر من سنة تقريباً ولم أتزوج إلى الآن ولا أخفيكم سراً بأني متأقلم بنسبة 70% لكوني أعزب فذلك يجعلني مرتاح البال بعيداً عن المشاكل ولا أهتم إلا لنفسي فقط ولا أحمل إلا مسؤوليتي وهذه نعمة!! وذلك ليس لأنني لا أريد أن أتحمل المسؤولية او تهرباً من المسؤولية بل على العكس ولكنها نفسي أبت لي أن اكون هكذا بعيداً عن "وجع الراس". إلى إشعارٍ آخر.

صحيح أحيان أفتقد إلى من أتكلم معه ومن يشاركني حياتي الخاصة وإلى من يهتم بي وبأشيائي ولكن هذا الشيء لايشكل من إحتياجي الآن سوى 30%

أعرف بأنكم ستقولون لي أنها تجربة وليست النساء سواسية!! نعم أوافقكم
وأعلم بأنكم ستقولون لي كما قيل لي بأني "تعقدت" من علاقتي السابقة!!
وهنا لا أوافقكم لأنني بإختصار مؤمن بالنصيب والقضاء والقدر!!

تزوجت طليقتي من رجل معدد كبير السن يكبرها بما دون ال 20 سنة ، وكونها قريبتي فأخبارها تصلني من العائلة بين كل فترة ، وقد قيل لي بأنها لم تتأقلم معة وهي الآن في بيت أهلها "زعلانة".

أسفتُ لحالها وما وصلت إليه ولا اعرف لماذا تتخبط هكذا !! وبالرغم من أنني اول المباركين لها في زواجها الثاني إلا أنني قد أحسست بل تيقنت بأن تجربتها ستكون فاشلة بالتأكيد ولم أتمنى لها هذا والله!! بل لأنني أعرفها جيداً لاتستميل إلا لمن يفهمها جيداً ولاتقترب لمن لا يحس بها وهذا مالا يستطيعه رجل معدد ويكبرها بالسن إلى حد شبة بعيد!!

ماعلينا من موضوعها الله يوفقها ويستر عليها

بتكلم بلهجتي العامية ويسامحني اللي مايفهم لهجتي أحس مالي خلق أتكلم فصحى

مجتمعي المحيط فيني من أهلي وأقاربي وأصحابي كل واحد فيهم صار طبيب نفسي واللي مو طبيب نفسي صارلي مطوع !! كل ما يسألوني ليه ماتتزوج وتشوف حياتك!! أرد عليهم واقول حالياً كذا مرتاح أكثر!! فيردون بهجوم أنت متعقد من تجربتك السابقة ، ونظرتك للحياة الزوجية صارت سوداوية!! ويستمرون بالكلام لين أحس أنهم شوي ويوصفولي أدوية!! أو تمسك معهم موال العين والحسد والرقية الشرعية!!

أمس دخلت على أمي ولقيتها وكأنها تقرأ القرآن سراً وجلست جمبها ولما خلصت "تفلت علي"!! قلت ليه يمة تتفلين علي؟؟!! قالت شفهمك انت هذا نفخ قاعدة أقرأ عليك!! قلت يمة الله يهديك سعبولك دخل بعيني وتقولين نفخ!!

وأبوي الله يهداة صارلي خطابة كل ما قعدت عندة يقولي فلان الفلاني يذكرون أن عندة بنات أمزين (حلوات) اشرايك نخلي امك تروحلهم تتقصى عن بناتهم؟؟ قلت يبة الله يهديك شاد حيلك وتقول تتقصى محسسني أن أمي رايحة لحقل الغام!! لاتتقصى ولا شي اليا بغيت العرس خبرتك!! وأحط عيني بعينة وأقولة إلا شخبار سهير القيسي "مذيعة العربية" فقالي لاشعورياً وعيونة حزينة ماطلعت اليوم!! فقلتله والله انت اللي تبي الحلوات مهو انا!!

يا أخوان يا أخوات
مو كل سوء حظ معناتة ان فيه عين او حسد ترا فيه شي أسمة قسمة ونصيب وقضاء وقدر!! ولا كل تجربة فاشلة تمر على إنسان معناتة انة تعقد من تجربتة الأولى !! أحيان الإنسان يحتاج أنه ينقي نفسة من تجربة سابقة عشان يعرف يدخل تجربة جديدة بكل ثقة وهو إنسان جديد مايحمل في عقلة سلبيات الزواج الأول!! حتى لو بان علية الحزن والسرحان!! وتكفون خلوا عندكم ذوق ولاتسألون ناس أسألة تذكرهم بآلامهم او بتجاربهم الفاشلة هههههه

وسلامتكم.

__________________
استغفر الله واتوب إليه

هل أنت المتفائل بالله اخونا من الكويت
عودا حميدا
لم أميز المعرف لكون هناك أكثر من معرف يحمل اسم مشابه المتفائل المتفائل بالله ,,الخ
,,,
من حقك و شأنك الخاص
أن تقدم على الخطوة من الزواج متى رأيت انك بحاجة فعلا لذلك
وكن طبيب نفسك...النفسي
وهل انت مرتاح هكذا او تلهي نفسك
لا احد يعرفك اكثر من نفسك,

__________________

وعليكم السلام ورحمة الله وبركاته ..
مرحباً أيها الأستاذ الفاضـل ..
مهما كان السبب سواء عين أو حسد أوووو يبقى هو قضاء وقدر كتبه الله للإنسان وعليه أن يؤمن بهذا القضاء دون جزع ولا سخط ..
أما بالنسبة ماتفضلت به كذلك ذكر التجارب وآلام الماضي معك حق في ذلك وتُعتبر خصوصية ..

اقتباس:

أحيان الإنسان يحتاج أنه ينقي نفسة من تجربة سابقة عشان يعرف يدخل تجربة جديدة بكل ثقة وهو إنسان جديد مايحمل في عقلة سلبيات الزواج الأول!!

هذه أكثر جملة أعجبتني ..وصدقت ، الإنسان لايستطيع أن يقدم على تجربة أٌخرى وداخله بقايا من التجربة مامضت !
جبر الله قلبك بكل ماتُحب أيها الأستاذ الفاضـل ..

اهلا بك اخونا الكريم
وليش تزوجت معدد و كبير ؟؟ عشانها مطلقة ؟؟

هﻻ و مرحبا ب المتفائل بالله

نورت المنتدى بصراحة كنت من الأقلام المميزة و اللي لها نكهة فكاهية ممزوجة بالتفاؤل

حلوة عودتك و الاحلى انها بهذا القسم ^_^

بس صدمتني معقول للحين ما اعرست

ورااه وشوله على قوله الشريان

ترى انت كذا تخالف النهج الخليجي اللي متعودين نسمع فﻻن من يطلق حرمته ما يطق السنة الا هو متزوج

و عروسته حامل بعد يعني شغل منافسة سريع سريع

من تجربتي و تجارب اللي شفتهم الرجال ما يطول اعزب

يعني معليش سوري على التشبيه بس حسيت انت الحرمة و طليقتك رجال

شافت حياتها بأي طريقة راقت لها و انت باقي تدندن على مزاجي و راحتي

يااخي ﻻ تخليني اصف جنب امك و اصير لك راقيه و خطابة بعد ترى عشت هالجو كثير



طيب بسألك ليه يبان عليه الحزن و السرحان .!؟

يعني معليش هو منطلققق بالدنيا و تحرر خلاص ماعاد فيه عقد بحياته وﻻ ضغوطات

نفسه و بس .. ليه يحزن

الا اذا كان فعلا باقي شي من آثار الماضي و للحين متالم عليه والله أعلم


عموماً انا اظن ان فترة سنة كافية جدا عليك كرجل و ان الاوان انك تستقر الحين

بس فتش زيين الله يعافيك

الله يوفقك

__________________

‏
الوعي هو الملاذ ..

أستغفر الله العظيم ؛
( الفردوس غايتي )

الحمدلله على السلامة و عودة حميدا اخي الكريم

__________________


سبحان الله و بحمده
عدد خلقه و رضى نفسه
و زنه عرشه و مداد كلماته

~♥¤♥¤♥¤♥~

حياالله المتفائل تو مانور المنتدي
والله فاقدينك كثير وكل مارحت للكويت تطري على بالي انتظر هديتي ☺

كسرت خاطري زوجتك قصدي طليقتك مسكينه لحقه على زواج يجيها ازين من هالشايب

وضعك مثل اخوي بس اخوي ماطلق لسى عزابي اصلي كل ماجلس استلمته امي وابوي

اخر شي يقالك ابوي بيقنعه قال اخاف اموت وانا مازوجتك مثل اخوانك ودفعت لك المهر والزواج

قال ولا يهمك من الان حطهن على جنب وقل هذولي لزواجي ولا يدخلن مع الورث

نرجع لموضوع اكيد كل شي قسمه ونصيب

ولاتتزوج الا وانت مقتنع ان هذال وقتك المناسب للزواج وبالزوجه

الله يرزقك ماتتمنا ويعوضك يارب

وكان بتصبر اربع سنوات عطيتك بنتي ☺

__________________
سبحان الله وبحمده

أهلا أخي الكريم .. عودا أحمد .. أتمنى أن ترجع
كل تلك الأقلام التي عشنا معها ونفتقدها الآن بعفويتها
ومزاحها ..
لاحظت وجودك أمس بس ما حبيت أرحب بك بموضوعات الأعضاء
الحمدلله على السلامة .. سنة مدة ليست بالطويلة حتى تولد
من جديد .. ولا تلوم والديك فهذا ديدن الآباء جميعا لتزويج أولادهم ومن ثم رؤية
أطفالهم

__________________

مسز داني
حي الله مسز داني يامرحبا ومسهلا
اي هذا انا المتفائل من الكويت بس عقلت شوي عشان كذا ماعرفتيني ههههه
والله يا اختي كل مافي الموضوع أني مرتاح كذا حالياً ، ومافيه في بالي اي مشروع للزواج حالياً!!

سر الحياة
نعم هي فترة ابغى منها أمسح كل التراكمات اللي كانت مصاحبتني بفترة زواجي الأول
يعني بلغة أهل الكمبيوتر قاعد اسوي لراسي وذاكرتي "فورمات" ومرتاح حالياً بفترة المعالجة.
شكراً لذوقك.

فليكا
ياهلا بأختي تزوجت بمعدد لأن عندها مشاكل بالحمال .. الله يشافيها ويوفقها.

أم خالد
ههههههه هلا وغلا و100 مرحبا وحشيمة وإحترام
هلا بالأصيلة الطيبة بنت الطيبين
النور نورك ونور أخواني وخواتي الطيبين اللي معنى في المنتدى
أي والله للحين ما أعرست ومسابق المهبل ومنو يتزوج أول أبشرك ماهوب عندي عقلي لازال في راسي ومعطي هالأمور ظهري ، وماني والله مستعجل على شي ولا في قلبي عليها حقد او كره او مجاكر عشان أسابقها (:

أما ليه يحزن!! والله مادري وش أقولك لكن تعرفين الشعور لما تكونين مخلصة لشخص مايستاهل الإخلاص!!
انا زعلان لأني كنت مخلص مع شخصية كان أدائها الزوجي معي مخذل وبشكل مفاجئ صدمني!! الله يوفقها والله ماحمل لها في قلبي إلا كل خير بس يختي هانت علي نفسي وحاس بأحساس ماني قادر اوصفة!! عشان كذا مابغى أتزوج عشان ما أحمل في قلبي على الزوجة الجديدة أي أفكار سلبية وأظلمها بسبب تراكمات زواج سابق فاشل!!

وتكفين لاتصيرين خطابة عندي خطابات واجد (أمي وخواتي وعماتي وخالاتي حتى حريم جيرانا) إذا تبيني أسلفك منهن حاضر
اما تصيرين لي خطابة ف العدد اللي عندي مايسمح ازودك عليهم هههههه طفحت

تاج راسي والله يم خالد

__________________
استغفر الله واتوب إليه

دوندرمة
الله يسلمك تسلمين يالطيبة

ريفان
الله يحييك وبيت مكة يوديك
يامرحبا بأختي ريفان ومسهلا
الكويت نفرشها كلها لك ترحيب وضيافة ، وقايلك هديتك انتي وزوجك جاهزة بس انتي ماتبين ، وانا ماني معطيكم إلا قدركم عندي ، وقدر الطيبين اللي مثلكم لو انه غالي نشترية ويرخص لكم وانه الساعة المباركة اي والله ، وعلى طاري الهدية أبشرك دخلت دورات كثيرة عن العطور والبخور والحين صرت خبير فيهن وعن قريب إن شاء الله بينطلق مشروعي بالسعودية واي خدمات من ناحية هالموضوع او اسألة انا حاضر.

اما بنتك ف من قبل اكثر من سنة قلتيلي انطر 4 سنوات!! الظاهر ان السنين عندكم ماتمشي ههههه
الله يحفظها ويستر عليها يارب ، يشرفني والله

اوراق ملونة
ياهلا وسهلا نورتي يالطيبة كيفك وكيف احوالك
والنور نورك ونور المتواجدين.
شكراً لذوقك ولطفك

__________________
استغفر الله واتوب إليه