السلام عليكم ورحمة الله تعالى وبركاته
يالله حي الرجال كلن بأسمة ، تحملوني الليلة وبالذات المتزوجين
ياما استلمنا الحريم وإنتقدناهم ، ومن الإنصاف أننا ننتقد بعضكم الحين
يالربع الحياة الزوجية هي حياة تعاونية تبادلية مقسومة على اثنين وعلى قولتهم ايد وحدة ماتصفق!!
كل شي تبيه من زوجتك هي بالمقابل تبية منك!! معلش مو لأنها حرمة وهي الجناح المكسور وانت القوي تصير بس تبي منها من غير ماتعطي!! لها مثل ماتبي منها ، ومو لأنها السمكينة بترضى بكل الحالات تنتهز الفرصة وتعدمها!!
يعني ياخوي مثل ما انت تبي تدخل بيتك وتلقاه مرتب ومعطر وزوجتك ناطرتك فيه بإبتسامة ولابستلك مالذ وطاب
هي كذلك تبي منك انك تكون مرتب ومتعطر ومتهندم ومبتسم وتقولها مالذ وطاب من الكلام المعسول اللي يحسس هالمقرودة بأنوثتها وانها دخلت دنيا حالها حال الحريم المتهنيات.
فيه بعض الرجال الله يهداة مشروع النظافة عندة شي ملغي!! انا مرة واحد قاعد جمبي والله ريحة العرق منة صدعت راسي لدرجة اني حسيت ان لو فيه احد مغشي علية نخلية يشم اباط الاخ بدل مانجيبلة كلونيا!!
اقسم بالله فيه إختراع أسمة مزيل العرق "ديودرنت" وترى ارخص من علبة الدخان اللي بعض الأزواج يشترونها!!
ناهيكم عن زوبعة الغضب اللي بأسنان بعض الأزواج!! يخرب بيتهم واحدهم حلقة صاير معلاق اكل!! مافيه شي مو عالق بأسنانة!! يرحم امك يازوج ترا بنت الحلال اللي هي زوجتك إن حاولت تقبيلها وانت بهالحالة هاذي (بتكون جريمة بحق الإنسانية) وبيجيلها قرحة المسكينة!! نظف أسنانك ترا فيه شي اسمة فرشة ومعحون وخيط وغسول مطهر للفم!!
ثم ياخي مثل ماتبي زوجتك تلبسلك وتقصرلك!! ترا هاذي زوجتك حلالك!! البس بجامة حلوة او شورت مرتب مع بلوزة راقية ترى حلال مو حرام ليش فاهمين ان هالشي غلط وعيب!! طايحين لي بالفانيلة والسروال وواحدكم كأنة ممرض!! ليه ياخوي خل هالمسكينة تحس انك تبادلها الإهتمام ترا والله بتفرح ولك اجر.
وبعدين يا ازواج الله يهداكم ترا المشروع الزراعي اللي تتعبون علية من كثر الإهمال ترى ينحف وينشال ويتنظف!! فيه مكاين خاصة لللأماكن الخاصة ، وفيه الف طريقة وطريقة!! انت لو تحف مثل ماتحف زوجتك بالحلاوة تطلع روحك وتحلف انك تحترم كل الحريم!! فحس فيها وبادلها النظافة تراهي تحف ومتحملة الالم عشانك!!
ومايبط كبدي الا هذاك اللي مايعرف يرقع ويقول حلات الرجل يكون خشن!! لاااا علينا هالسوالف وخشونتة ماصارت الا بهالاماكن الخايسة هذيييك؟؟ ياشيخ عذرك اقبح من مشروعك الزراعي!!
ثم ياخي اذا رديت للبيت وفيك ريح دخان وشيشة اتروش وخذلك"شاور" وبعد ماتخلص ترا فيه شي اسمة لوشن لتعطير الجسم بروائح رومانسية تجذب زوجتك لك ، ولابغيت تدخل سريرك ترا فيه عطور هادية وباردة تخلي زوجتك في حالة شلل رباعي من كثر ماهي متلذذة بريحتك!! والله الريح الطيب يطيب النفوس!! واذا عندك اتيكيت ورومانسية وذرابة وتبي تكون "جنتل مان" اعرف العطور اللي تحبها وحطها لها (وخل العطور هاذي لها هي بس).
ملاحظة!!
كل إهتمام لنفسك تبدية لزوجتك بتلقى من وراة ثمر وتجدد ، ترى الحريم كل ماكنت طيب معها تصير اطيب منك.
الموضوع صغتة بهالطريقة عشان يكون خفيف على قلوبكم واشوف إبتسامتكم فيه.
وسلامتكم.