السلام عليكم ورحمة الله وبركاته
اول شي قبل كل شي هذي اول مشاركه لي بالمنتدى وقبل لا اسجل كنت دايما اشاهد مواضيع الاعضاء
صراحه ما ادري وش اقول ما اعرف اعبر عن اللي بداخلي واتمنى اني اكون عضو خفيف ع المنتدى

قصتي غريبه شوي .. قبل لا انزلها كنت متردد بس انا اشوفكم زي اخواني عشان كذا تشجعت !!

انا عمري 25 قصتي مع بنت خالتي قبل 6 سنوات هي تحبني من واحنا صغار بس كنت عادي .. كان بينننا مكالمات فقط .. .. لأني انا بمنطقه وهي بمنطقه .. احيانا اقولها احبك بس مو حب من قلبي شعور عادي جداا .. بس الغريب اني ما ابي افارقها ما ادري ليش .. كانت دايما تقولي انت تحبني ولالا ما ارد عليهاا .. انا اعترف لكم اني ما بادلتها نفس الشعور بس ما ادري ليش .. بعد فتره قلت لها انا ما اصلح لك ولا شي .. قالت ليش .. شلون وكيف ؟؟ كانت تبكي .. بس انا ماحسيت فيها .. انقطعت علاقتي فيهاا بس كانت بينها وبين اختي اتصالات .. وكانت تصارح اختي •

بعد سنتين

تخرجت من الثانويه ودخلت الجامعه

وانا طلعت دوره بالخارج .. لمدة سنتين .. بس صراحه كنت مشتاق لها يشهد الله علي اني حبيتها وانا مسافر
رجعت وانا كنت مشتاق لها بالحيل .. حبيتها ما ادري شلون اوصف لكم

كنت ابي اتواصل معها بس ما ادري شلون .. غيرت رقمها بس جبته من جوال اختي وهي ماتدري

اتصلت عليها .. من جوالي عرفت صوتي .. كنت متوقع انها مابترد علي
ردت علي .. كلمتها قلت لها كل اللي بقلبي .. اعتذرت لها ' ما قالتلي شي كانت ساكته .. بكيت اول مره بحياتي ابكي
وهي بكت كانت تعاتبني .. وقالت وينك طول هالفتره !! انا اعترفت لها وصارحتها قلت لها ادري اني كنت قاسي عليك والحين تغيرت !!

رجعنا لبعض وحبيتها من كل قلبي .. وهي حبتني من كل قلبها.. وان شاء الله اننا بنتزوج بعد ماتخلص دراستها ..


بس بعدها بفتره اتصلت علي .. وكانت خايفه قالتلي لازم اصارحك بكل شي.. قلت ليه وش صاير ؟؟
قالت انا كنت اكلم واحد قبلك يوم انت كنت مسافر .. بس والله اني ماعمري حبيته مثلك كان بيننا مكالمات بس
وكنت دايما كنت اغلط بأسمك .. بس خلاص انهيت علاقتي فيه وانتهى كل شي بس المشكله اني ارسلت صورتي له
وانا خايفه الحين وما ادري وش اسوي خقت اكلم ابوي واخواني ' كنت جاهله وما اعرف الغلط من الصح بس تأكد اني ماعمري حبيته وانا احبك انت وانا اعترف اني غلطت ومقهوره من نفسي وانا تحسفت على اللي سويته واتمنى انك تسامحني..

قلت لها الله اللي يسامح ويغفر الذنوب .. بس ليش ماتكلمتي من اول !!

المهم .. انا ما ادري وش اسوي بذي الحاله .. احترت قاعد افكر تكفون عطوني حلول .. اكمل معها ولا افارقها
المشكله اني احبهاا والله احبها وما ادري وش اسوي بس كل ما اتذكر سالفتها تجيني ضيقه !!

بس شلون انسى اللي رااح !!!

ادري اني طولت عليكم .. بس انا اشوفكم زي اخواني اتمنى انكم تساعدوني الله يرضى عليكم