السلام عليكم

عندي سؤال ويمكن اخص فيه البنات لانه يهمهم اكثر ولا مانع من مشاركة الرجال

الحين لما تاخذو هدية لاي مناسبه سواء ولاده نجاح عيديه زواج

وامكانياتك كانت وقتها محدودة هل تفضلي تاخذي هدية بسيطة او لا تاخذي شي وتاخذي بعدين مثلا ف زيارة اخرى مع انه اتوقع فشله اول زيارة تروحي يدك فاضيه؟

انا دائما اقول شي احسن من لاشي واقول الواحد ياخذ اي شي احسن من انه لا ياخذ شي
لان الهدية بمعناها وليس بقيمتها
بس كثير اسمعهم يقولو لما تجيهم هدية تافه انو ليش كلفت ع نفسها كان ماجابت شي هههه!!
وفي الي يقوولو اروح يدي فاضية ارحم من اني اروح واخذ اي شي فشلة عدم الاخذ اهون من اني اخذ شي مايسوى!!

وانتو ايش رايكم؟؟



تم تغيير العنوان ليتناسب مع مضمون الموضوع

ااممم اذا ما توفرت اختصرها واعتذر وما اروح افضل عشان اروح لما تكون المادة تسمح لي اخذ شي يفيد الشخص بالدرجة الاولى ومثل ماقلتي يكون شي يسوى مو بسعره بقيمته المعنوية وفايدته او تكون فلوس على قدر الاستطاعه ،،
الناس اللي مايعجبها للاسف احسها ما تستحق اني احمل لها شي لان الواحد مايدري بظروف الانسان او الضيف اللي جايلك ومشاكله المادية وحتى الاسرية وكافي انه تعب نفسه مشواار طويل عشان يجي ويسلم عليك ويبارك لك ويدعي لاطفالك ! هاذي تعتبر هدية ..

اتذكر احد الجيران ومسكينة نعرف حالتها المادية وكانت تتعفف من هالجانب جات لي بعد ولادتي تبارك لي ومستحية ان كل النساء معاها جابوا هدايا الا هي وتشوفي النسوان بتناغزون عليها مسكينة ،، قلتها ببساطة جيتك هي احلى هدية وصلتني لحد الان ،،، مو حلو نكسر بخاطر واحد تعنى وجا لبيتنه عشان هدية! ..

بس السؤال ، لما تتاخري في اهداء الشخص او زيارته هل بيحس انها حركة مصالح؟

احنا لو ما عندنا وقت لانتقاء الهدية عادتا نعطي فلوس في مكان الهدية و نقولهم اختارولكم هدية تروق لكم و كل واحد حسب ظروفه الي معاه يعطي كثير و الي ما معاه يعطي على قد مقدرته

الاهداء في امكانيات محدودة أفضل
ولكن ليس لدرجة أن تقدم شيء لا يسوى شي ويجعلني مثار سخرية لاننا مع الاسف بجاتمع مادي بالدرجة الاولى ولابد نراعي هذا الشي

يعني انا حاليا امر بهذا الظرف
سلفتي نجحت بنسبة حلوة ولازم اجيب لها هدية
لو اخرت الهدية كثير بصراحة مالي وجه اقابلها
فاخترت اني اجيب لها عطر وجوكليت واوديها محل ورد رخيص يزينها بشكل حلو
وراح اكتب على الهدية كلمات حلوة ترفع من معنوياتها
مثل ان كان للتفوق حكاية .. فأنت عنوانها

وبكذا جبت شي خفيف ولكن سويت له قيمة بالزينة الحلوة والشكل

__________________
الحمدلله الذي بنعمته تتم الصالحات

كثير نسمع من يقول الهديه ليست بقيمتها لكن الحقيقه عند العالم الهديه بقيمتها وخاصه العالم النسائي
علشان كذا انا بختصرها و اقولك :اذا ماعندي امكانيه اشوف لو اجيب علبه توشكلت وباقة ورد والسلام
هنا انا مابتفشل ،
و بنظرهم بتكون ذوق ومناسبه انتي عليك ابحثي عن الي يكفي ميزانيتك وكثر خيرك
افضل من انك تدخلين ويدك فاضيه

__________________

الهدية في وقتها لها طعم واذا تأجلت تفقد حلاوتها
حتى لو كانت بسيطة مايهم