فقدت أُنس قلبي يوم فقدت أمي ..
السلام عليكم ورحمة الله وبركاته
أسعد الله صباحكم بالخير والمسرات
من زمان وأنا أتصفح هالمنتدى واليوم قررت أسجل وأفضفض .. يمكن ألاقي نصيحة من هنا ولا من هنا تفيدني وتساعدني من الخروج من الحالة اللي أنا فيها ..
أنا بنت متخرجة من الجامعة، من يومي إنسانة إجتماعية وخلوقة ومرحة وأحب الحياة بشكل كبيير، عشت طفولة حلوة في أحضان أمي وأبوي ماقصروا علي بشيء ولله الحمد، طول عمري متفوقة والحمدلله تخرجت بمعدل عالي ومرتبة شرف، مشكلتي بدأت من مرض أمي لحين وفاتها، أمي عانت سنواات مع المرض إلى أن توفاها الله، من بعد وفاة أمي حياتي انقلبت 180 درجة صرت هاااادية أكثر من اللازم، حزينة أغلب الوقت، جالسة لوحدي طول اليوم، حاااولت بشتى الطرق أخرج من حالة الحزن اللي أنا فيها بس عجزت، دخلت دورة لغة وما جاني غير الهم سجلت في معهد فيه قسم أطفال من سوء حظي وكثيير أوقات أشوف أطفال مع أمهاتهم وتجيني بكيية غير طبيعية لما تركت المعهد باللي فيه، مع إنهم أطفال بس والله كل ماشفت مشهد أم مع بنتها ولا طفل صغير مع أمه لا إرادي أبكي أتذكر الأيام الحلوة في حضن أمي أتذكر كل شيء بكل التفاصيل لحد يضحك علي والله غصبا علي وأنا مو راضية عن وضعي هذا بس مو قادرة أسيطر على نفسي، حتى الأعراس كرهتها مشهد العروووس وهم تضم أمها وتسلم عليها بأخر الفرح يحرق قلبي حرررررق أقول في داخلي وأنا بعد كان لي أم تحبني وكان يوم مناها تشوفني بالأبيض، حتى خالاتي كرهت جلستهم بناتهم اللي بعمري مايراعون في حركاتهم أو كلامهم إن بينهم بنت خالة فاااااااااقدة أمها محرومة من حضنها وبوستها ماله داعي هالحركات قدامي ياناس ..!
اللي كاسر ظهري أبوي الله يخليه لي، وده يخرجني من حالة الإكتئاب اللي أنا فيها دائما يكلمني يسولفلي يحاول يضحكني يعطيني فلوس بسبب وبدون سبب حتى لو ماني محتاجة بس يبغاني أكون مبسوطة، يبغاني أرجع البنت الشقية اللي تضحك وصوت ضحكها ينسمع لأخر البيت، لكن ماني قادرة كل ما أشوف أبوي أحزن على حاله أحس إنه شايل همي، غرقني بالدلع وغرقته بالهم، أحسه عاجز ومحتار كل اللي يقدر عليه سواه والله ماقصر بس أنا ماني قادرة أتأقلم مع الوضع والبيت بدون أمي، نفسي أرجع زي ماكنت نفسي مشهد العروس مع أمها ما يأثر فيني ومشهد الطفل مع أمه مايبكيني، أمي كانت مالية علي حياتي ماكنت بحاجة حب وحنان وإهتمام في وقتها والحين راحت وتركت فرااااغ كبير حتى أبوي ماقدر يملاه على الرغم إني أحبه والله العظيم أحبه بس أمي غيييييييييير، أنا طول عمري قوية وقد حالي زي مايقولوا بس وفاة أمي كانت صدمة قوية بالنسبة لي أحس إني فقدتها في عز إحتياجي لها ..
يمكن كلامي مو مرتب، بس ماعليه هو مجرد فضفضة، دورت حولي أحد أحكيله بس استحيت وخفت دموعي تخوني وأنا أكره هالشيء طول عمري ما أحب أبكي في حضرة أحد مابي أحد يشفق علي أبي أحد يفهمني شلون أتناسى وأعيش وأمضي في حياتي والله تعبت أحس بضيااااااااع من بعد أمي، وهالفترة 7/24 عيوني مليانة دموع وأنتظر أي شيء عشان أبكي ، فقد الأم مرة صعب خلاني تايهة ووحيدة، مع العلم إن أمي لها سنة وشوي متوفية.
والحمدلله على ما سر من أمري وساء ..
16-09-2014, 05:30 AM
ضوابط المشاركة
العرض الشجري