السلام عليكم يا أعضاء المنتدى الكريم
انا متزوجة حديثا انا وزوجي اعمارنا بالعشرينات وسبق له الزواج وانا لا
انا وزوجي تزوجنا عن حب وتفاهم وقناعه لكن اللي حصل ان زوجي عصبي جدا جدا وماعنده صبر ابد لدرجة بيوم زواجي تأخرت بالزفه (زفتي 12 وربع )طلعت من القاعه وحده ونص واحنا بالسياره جلس يقول اكرهك ماني سواق عندك ساعه انتظرك تطلعين وطول الطريق وانا ساكته ومخنوقه وارتجف خوف وجوع وقل نوم
وصلنا الفندق وانفجر فيني وقال خلاص ما ابيك وخلي اهلك يجو ياخذونك بكيت وترجيته مايطلقني وبعد اللي صار هدا وقال البسي وتعالي تعشي ماقدرت ابلع اللقمه وصرت بس اناظر الجدار وساكته مذهوله من اللي صار يقول وشفيك جتك حاله نفسيه
طبعا بعد هالليله رحت لاهله نسلم لأننا بنسافر واحنا مسافرين صارت مشاكل على اتفه شي زي اللي يدور الزله علي انا بدون شعور قلت له اكرهك لانه جاب طاري طليقته ويقارن
شبه يوميا المشاكل على أشياء تافهه مثل اللي يترصد مني الزله وانا مو مقصره من ناحية اهتمامي بالبيت حتى الاكل ارجع من الدوام اطبخ وهو يقول ماابيك تطبخين وتبالغين بالتنظيف اهتمي فيني قلت انا ما انظف وارتب الا وانت طالع ولا انام الا لما تجي وحتى حقوقك الشرعيه ما اقصر فيها والبس له ونظيفه واودعه وهو طالع واستقبله واسمي واقراء عليه اذا تعب حتى مصروف ما اطالبه فيه ودايم احب اجلس جنبه واطبطب عليه مثل البيبي
انا ما أقول اني انسانه كامله ما اغلط بس اعرف نفسي مسالمه وفي حالي ودايم اساله اذا انا مقصره او محتاج مني شي يقول وينبهني عشان اقدر اسعده
المهم صار يقول انا ما ارتحت انا ابي اتزوج عليك هذا غير كلامه انتي كذابه لعابه حقيره قذره واطيه راعيه لف ودوران
زوجي دايم يفسر تصرفاتي غلط واني العب بعقله بحلاوة ويقول انتي ماتصلحين لي
كل هذا صار بشهرين(مدة جلستي معه بالبيت ) والشهر الثالث رحت عند اهلي لانه بيسافر وقبل سقرته باسبوعين زعل مني عشاني ماقلت له ان عندي موعد مراجعه قبلها بيومين نسيت وغير كذا هاوشني عند اهله تفشلت اعطيته ظهري ومشيت وهو ماكمل كلامه معي وعصب علي
رحت البيت واليوم الثاني طلع العصر ومارجع الا الفجر وانا مقهوره منه وهو نايم حطيت المخده بيننا بس دفيتها على وجهه قام مرتاع وعصب ونام بالصاله
ومن بكره قال خذي اغراضك وبكره ورقتك تجيك انا كنت بس بتزوج عليك والحين ما ابيك بالمره
قبل المشكله كنا بننقل لبيت ثاني ولميت كل اغراضي اخفف عليه ورحت عند اهلي شهر وطول هالشهر أحاول أراضيه ويقول ماعاد ابيك سبني وسب اهلي انا هنا ولعت وقلت طلقني قال أصلا انا ناوي اطلقك من زمان بس انتي نشبه وشجعتيني اطلقك
بعد أسبوع طلقني واخذت الورقه وقلت له باقي أغراض باخذها وعيا علي قلت مو بكيفك ترفض يكفي اللي خسرته بالزواج كان على اهلي
يوم وصلت الشقه انا وابوي لقيناه تحت متصل على الشرطه يقول انهم اعتدو على بيتي الشرطي حاول يحلها بشكل ودي بينا رفض زوجي وسوى محضر
انا تعبت ودخلت المستشفى من اللي سواه ليه هو كذا حاقد علي وكارهني انا ما سويت له شي حتى اهله منصدمين منه
انا الحين بالعده ورافض اني ارجع له ليش مو متقبل انا بداية الزواج لازم يكون فيه شوية مشاكل وتنازلات
انا تعبت معاه مدري وش اسوي توني عروس ويصير لي كل هذا
الحمدلله على كل حال

ياترى قبل الزواج كان كذا معك ولا لا

لان اذا لا ممكن احد محاول
يفرق بينكم بسحر او عين او حسد
وبالتوفيق في حياتك.

لا حول ولا قوة الا بالله ..
طيب يا حبيبتي احمدي ربك انه طلقك بسهوله واحد مثل هذا زين انه ما خلاكي تعضين الارض عشان تتطلقين وتنفكين من شره .. احمدي ربك ألف مليون مره انك تطلقتي منه وانه الحمد لله حسب مافهمت مابينكم أطفال .. بصراحه الطلاق في حالتك ومن زوج مثل هالرجال عيد ومولد حياه جديده لك ..
وش حادك ع الشقا ليه تحاولين ترجعين وهو يرفض .. خلاص انسي وعيشي حياتك وانشغلي بنفسك وبس ...
ليلة عرسك هواش وتهديد بالطلاق .. المفروض هالليله يسويك يادهينه لا تنكتين ولا يوترك ويداريك .. بس سبحان الله اكيد سبب فشل زواجه الاول نفس اسباب فشل هالزواج..
اسأل الله ان يعوضك خير وانتي يا حبيبتي لا تتحسفين عليه ترى والله انه هو الخسران..

لا ما كان كذا بالعكس كان طاير فيني وحتى لو صارت بينا هوشه مايسوي كذا يكون عادي
والله ما ادري امي قالت اقري واتركيه لا تتجادلين معه ولا تكلمينه بس انا مقهوره هو طيب وخفيف دم ويصلي لكن معي يتغير

تواصلي مع اهله ويفضل امه او اخته وقولي لها
يمكن كذا ومو خسرانين شي لو جربو
وتاكدو اذا فيه شي ولا لا وتكوني سويتي اللي عليك
وبذلتي الاسباب والله يكون بعووونك ويسهل لك ويسعدك ..

الحمدلله على كل حال بس والله قهر ما اعطى لزواجنا فرصه حتى الأطفال صار يقول ما ابي
وفشل زواجه الأول نفس أسباب فشل زواجي تقريبا لانه قال لها بتزوج عليك وطلبت الطلاق

تواصلت معاهم قبل الطلاق ودارين بالمشاكل وحاولو فيه يروح لشيخ او نسافر لمكه ناخذ عمره تهدا النفوس
ماسمع كلام امه او خواته يطنشهم حتى ابوه غاسل ايده من ولده ما يتدخل وانا استسلمت اذا فيه شي سواء روحي او مرض نفسي ماراح اقدر اسوي شي غير الدعاء ان ربي يفرجها من عنده
مشكوره على ردك واهتمامك

صحيح اول الزواج مشاكل وعدم انسجام
لكن ابدا مو للدرجة اللي بينكم
حبيبتي خﻻص احفظي باقي مرامتك وهو كيفه
فكري كيف بتعيشين باقي حياتك مع شخص بكل هالنكدية والعصبية
دام الحمدلله ماكتب الله بينكم اطفال
وعندك وظيفة واهل يسندونك بألف سﻻمة عليه

للأسف اذا قلت باقي كرامه لي من كثر المحاولات مو مستوعبه اللي صار لي
الله يعين

لا اله الا الله
أنا مع الاخت نبض الدان
الحمدلله انج طلعتي من غير اطفال هذا الانسان كان بيجيبلج امراض نفسية .
لا تتحسري على الطلاق بل اشكري الله على انه خلصج من انسان ما يستاهلج
وبإنه تعالى بيرزقج واحد يقدرج ويعرف قيمتج