(قلقة من حب ولد خالتي)
بسم الله..
سأكتب و لاول مره عن هذآ الذي بداخلي
او عن مشكلتي
او عن هذا الانسان !
ايّا كان.. سأكتب هنا*
..
لآ تملكني رغبه للكتابه عن هذآ الشيء رغم اني اكتب عن ادق تفاصيل مشاعري
و السبب كي لا اثبت لهذآ الشيء وجود
و لكن يبدو ان القدر ينوي نَحت هذا الشيء بحياتي !

اسميته *شيء* لا اعلم مااسميه
عشق من طرف وواحد؟*
عثرة بحياتي؟*
خرآفة ألفهآ الناس لي؟*
*..
لا اعلم الان بما اابدأ و كيف.. يبدو اني لا املك فنّ الإبتداء.. و لكن أسألكم الصبر عليّ!*

..
من كنت بثآلث متوسط بدأت اسمع همسات الي حولي عن ولد خالتي !
كلام غريب؟ ! .. و بصراحه؟ اعتبرته كلام مجانين
عن ذاك الانسان الي م كنت اعرفه ابدا و لا كان يعني لي شي ابدا رغم اني من طلعت ع الدنيا و هم باب بيتهم قدام باب بيتنا الا اني م اذكره حتى بطفولتي.. امبلا! اذكر شي واحد بس.. انه كان يطردني انا و اخوه الي كان صديق الطفوله عشان يحلى له الجو مع التلفزيون !
و كان عصبي.. هو اكبر شباب العيله و مع ان ابوه الله يرحمه كان يعشقني و كنت دائما ببيتهم الا انه م كان يقرب مني و لا يكلمني ابدا.. يمكن عشان كذا م يعني لي شي من عرفته
المهم *قلت لكم صبركم عليّ لاني يمكن بتكلم بأشياء م لها داعي*
..
كان الموضوع بداية من خالتي اسمعها تلمح ان فلان يبيني
كنت استحي و ارتبك بس .. مثل اي بنت
و بعد سنه تقريبا جتني الصدمه
إنه لما شاف الخطاب يجون ابوي و ابوي شايل الموضوع من باله اصلا لاني طبعا صغيره
*طلبني من ابوي عطيّه !
و حلف اذا ما اخذني ماياخذ غيري !
الله يسامحه ابوي عطاه ..
حسيت اني عباره عن دميه ! .. يحددون مصيرها كيف مايبون
انقهرت.. الا مت قهر.. حطيت ف بالي ان هذا يعتبر اجبار من ابوي!*
* ابوي مافاتحني بالموضوع ابدا و لا قالي شي*
لكن بوقتها لما قالوا لي امي و خواتي وامي شافت الصدمه بعيوني اقنعتني انه اكيد ابوي م راح يغصبني.. لكن كان موقفه صعب ان الولد يسوي كل هذا و يرفض و هو بنظرهم ابداا م فيه عيب و كل بنت تتمناه! *.. و انهم ينتظروني اكبر حتى سن الزواج و يستشيروني
.. مرت الشهور و انا مصدومه
وش يبي فيني؟ وش ذكره وش عرفه فيني؟.. و صار يجيني كلامه و مواقفه عني من خالاتي و اهلي.. خفت!.. و استوعبت ان الرجال صار معتبر نفسه خاطب رسمي و اني خلاص ملكه و م عنده مشكله يقول لكل الناس و حتى تفشلت بخوالي لاني اكتشفت ان خبر ان السيد فلان عاشق فلانه! .. تذكرت كلام امي؟*
و اكتشفت ان فيه ناس حاسده بعد!*
كيف هو خلاص معتبرني له و كل العالم عرفت و بعد كم سنه اجي انا و اقول( لا )اذا ع قولتهم استشاروني؟*
امر صعب!*
صعب جدا!*
و ممكن يكون صدمه لأهلي او له!*
لذا شكلي راح اتدبس فيه.. صح؟*
لا تسألوني ليش انا ع طول فكرت بالرفض
لاني انا نفسي م ني عارفه
اصلا عمري م فكرت بشخصه هو.. و لا تخيلت حياتي معه
و عشان اكون صريحه اكثر مع نفسي ثم معكم.
انا اصلا م سمحت لنفسي.. حتى امنع نفسي لا اناظر صوره * لان عمري ماقابلته تقريبا مره مرتين و يصير هو م شافني*
اكثر شي مجنني انه يقول انه شايفني!!!!!!!!
متى؟ كيف؟ اصلا انا من سنتين اصد نفسي عن كل مكان هو موجود فيه
لان وجودنا مع بعض خطر !!
كثير مواقف *صارت معه م انساها يمكن تنعد بالاصابع بس بالنسبه لي كل واحد اقوى من الثاني لكن الموقف الي هزني..
اذكر مره بالعيد كانت وحده تقرب لنا تسلم ع خوالي و هو من بين خوالي و م كان محرم لها عليها عبايتها.. لما قال واحد من خوالي اسمي كترحيب فنيي! .. خالي يحسبها انا لان مرات بالعبايه تشبهني.. فجأه فلان التفت بشكل ملحووظ.. و عطاها نظرات هي عجزت توصفها لي لدرجة انها تبلمت و لا قالت لا انا فلانه.. لكن بمجرد انها نطقت اسمها هو صد عنها بقوه و كان عاقد حاجبيه!*
سجدت سجود شكر اني م كنت موجوده!!
و هي قالتلي و هي نفسها متبلمه من الموقف.. انا قلت يمكن هي تبالغ او يتهيأ لها... لكن اختي الكبيره كانت موجوده و قالت نفس كلامها
.. تمر الايام و يوصلني بكل تجمع كلام منه لي*
مرت علي فتره جتني ظروف بحياتي تعبت منها نفسي و كنت اكافح عشان نفسي و ناس ثانيه.. صرت مرهقه و هالموضوع هو آخر مايطري ع بالي .. صار شي بحياتي خلاني اتعقد من جنس الرجال
و حلفت وقتها اني م فيه رجل يعشق بصدق !
و ان عشقهم ان صدق فهو مؤقت
ليلتها و انا قاعده لحالي كنت منهاره تعبت*
لما حلفت هذا الحلف بيني و بين نفسي تذكرت هذا الانسان!*
الي يدّعي انه العاشق المتيم !
بدون تفكير نزلت من غرفتي لامي و فتحت معها الموضوع بكل جرأه و انا الي اكره احد يفتحه معي .. و قلت لها يمه قولي لهم و قولي له لا ينتظر مني شي لاني راح ابلغكم من الحين.. انا م ابيه و لا ابي احد
و هنا كانت الصدمه ! .. الي فجرت كل ذرة صبر فيني و كل طاقة احتمالي
امي حطت يدها ع راسها و كأني قايله يمه انا بنتحر !
حركة امي كتمت ع صدري من القهر !
و بدت امي تتكلم بعيون مصدومه عن اشياء خلتني انهار*
و ابكي و لاول مره عشانه!*
اشياء حسيتها حمل ثقيل علي.. حسيت اني مو قد مسؤلية واحد يشوفك حلم.. واحد يشوفك غير بعيونه عن باقي عيون الرجال
عمري م تصورت ببكي عشانه! او يمكن لاني كنت مُنهكه!*
اذكر لما خلصت امي كلام قمت من عندها و انا اقول قرار م ادري من ايش نابع بالضبط؟ .. كنت اقولها انا مو قد كل هذا.. خلوه يدور وحده غيري يسوي معها الدراما هذي كلها.. و لا تجيبون لي طاريه.. و الا ترا و الله بتعامل مع كل واحد مثل م تعاملت مع فلانه *وحده مره نغزتني بتعليق يقاله رومنسي عن ذاك الشخص من باب الفكاهه و المتعه لكني رديت عليها بحده اصدمتها و بعدها علاقتنا توترت شوي ** انقهرت و صرت اضرب كل شي قدامي*
ليلتها نمت و انا ضايقه . انا نفسي ما اعرف ليش؟*
و من قمت بكره جاني قولون عصبي حاد كان يألممممم و يكتم عن نفسي لدرجة شكينا ان الي فيني شي اقوى من انه قولون عصبي.. كان يكتم ع نفسي حتى
بصراحه جتني ذبذبات حقد عليه.. انا صدق كنت مهمومه من اول.. بس لو م طرى علي البارح و انهرت بسببه كان م صار الي صار و لا تعبت نفسي فوق طاقتها و رمت الحمل ع جسمي! .. طول معي الالم و تعبت نفسيا كثير و اندمرت صحتي و ذبلت و صاروا اذا جابوا اسمه ينغزني بطني !
يمكن لان اانا ترجمت نفسي على كرهه؟ ليش مدري!؟
..
انا عارفه ان كل بنت تتمنى واحد يتمناها و يحبها و ياخذها عن حب.. انا نفسي لما كنت بداية مراهقتي كنت اتمنى كذا
احس بمشاعر متناقضه.. احس فيني اكثر من شخص يتكلم
..
في شي بداخلي يقول ليش م اتقبل الوضع عادي؟.. و اخلي هالسنين الي هو يقول انه بينتظرني فيها احلام ورديه ع قولتهم؟ .. ليش م احس اني اميره و هو اميري؟*
و شي ثاني يقول*
انا مو قد هالحب!.. هذا اذا كان صدق حب! .. شي بداخلي مو مقتنع ؟ .. كيف شافني و انا م ادري؟ *طيب يمكن اعجبته و حبني ك شكل؟ .. و هذي اكبر مصيبه!.. يمكن هو ماخذ عني فكره غير عن الواقع و يشوف اني ملاك؟! او شي ثاني من مؤهلات الحب! ..*
انا اانسانه كان عندي قناعه ان *ممكن الحب الشريف يحصل عن طريق التعلق.. او يجذبه شي واحد فيك و يصير يبغى يكتشفك و بعدها يحبك اكثر*
لكن م ني عارفه وين راحت هالقناعه الحين؟؟؟
شي بداخلي قالي ..
طنشي!*
و طنشت.. حتى كنت اسمع بفتره قريبه ان فيه شي محترق و شي قوي و تمالكت نفسي و ادعيت عدم المبالاه.. بصراحه انا كان فييني فضول شوووووي اني اعرف.. م كان كثير و لا كان قصدي اتطمن. انا عارفه نفسي زين.. و منعت نفسي اسأل عنه و الحمدلله قدرت اصنع التبلد هذا فيني الا ان عرفت بالصدفه من وحده ثرثاره.. انو صارت له حادثه و..الخ
فيني مشاعر متناقضه احس اغلبها خوف!*
خايفه!*
هذا كل شي باختصار
انا خايفه
خايفه يجي يوم و اتعلق فيه انا بعد.. و يصير الي قالته لي اختي مره و صديقتيو فاجؤني بتفكيرهم و انكرته بشده و ضحكت عليه بعد!*
الي قالته لي.. اني احبه؟!!!!!
استوقفتني هذي الكلمه؟!
احبه!؟

خايفه مشاعري تتجه له؟!
انا انثى!*
و لي قلب!*
و احس!*
خايفه احبه!*
انا وعدت نفسي وعد م اعطي قلبي كله لرجاال.. مهما حبني.. راح ادّعي اني احبه!.. الرجال له قلبين!.. و ممكن يجرحك باي لحظه من عمرك
و انا قلبي غالي علي !
م راح اروح للي يجرحه بنفسي؟!

و لا راح أأذي نفسي بنفسي !

..
الان الان تعبت من التفكير.. و مع الاسف صرت ضعيفه و اسلحتي انهارت وصار هالانسان ملازمني ببالي طوول الوقت..افكر فيه اكثر مما افكر بنفسي!.. و حتى بدراستي احسه مأثر علي.. الزم ماعلي دراستي ماراح ينفعني الا هي بإذن الله.. لا هو ولا عشقه.. الا اني بديت اتعثر فيها بسرحاني بسببه!.. انا اكرهه و افكر فيه؟!
اكرهه!*
يمكن كلمه كبيره شوي و مبالغ فيها.. انا م اكرهه.. بس مرات اغتاض منه
و لما احاول انسى و اعيش حياتي طبيعي غصب يجيبون لي طاريه.. حتى الحين صرت اكره تجمعاتنا.. مو لانه فيها بالعكس هو اصلا نادرا يجي.. بس من طاريه! .. اسمه صار كأنه صميم ع اذني!*
..
اعتذر اذا طولت بالكلام لدرجة الملل للقارئ لكن فعلا انا محتاجه هالفضفضه.. انا م افضفض ابدا
بس جربت افضفض لصديقاتي الثنتين و بصراحه ندمت!*
لاني ضعفت عندهن.. و هن بس مستمعات و كأنهن يمسعن قصه مأساة حزينه؟ .. م يعطوني حل.. عشان كذا م قلت لهن كل شي..انا محتاجه احد يوجهني.. يأيد شي من هالتناقضات الي فيني و يمنعني عن شي..صديقتي دايما تقول لي فضفض لي.. ترتاحين.. لانها ملاحظه تغيري !
بس انا عجزت اتكلم.. و قررت اكتب هنا.. يمكن بالكتابه اقدر اتصالح مع نفسي وا فهمها؟!
افهم هي ايش تبغى؟
لاني تعبت..
تعبت
..
يمكن انا هنا فضفضة اكثر من اني سألت
لكن اعتذر للمره الثانيه..
بس ممكن سؤال تجاوبوني عليه اكثر من غيره؟*
الرجال يقدر يحب عن بعد؟.. انا مقتنعه ان الحب عن طريق عشره و عدت اشياء غير *النظره الاولى**
طيب لو بوصل رفضي من الحين كيف بوصله؟!
و بصراحه انا خايفه ينجرح! و من الاشياء الي شفتها بحياتي ان الرجال اذا حب و انجرح يتحول الى وحش ! .. و جرح الحب عميق!.. اخاف اطلع النذله الي م تستاهل الي حبها؟.. هذا اذا صدق حبني؟!


.. اشكر قراءتكم و انا محتاجه احد يوجهني و اتخلص من الحيره الي انا فيها و ترجع ساره الي اعرفها قبل!*
لان هذي انا م اعرفها.. م اعرفها ابدا!*

اعتذر عن الاطاله..


(تم التعديل ليتناسب مع المضمون)

ياستي وليه كل هاذا وهو فيه أحلى من الحب بالذات لو كان شريف؟

الرجل ياعمري يحب من السمع لو مدحتي وحده عنده يمكن ماينام الليل

وإنتي تقربين له طبيعي كانوا يجيبون بسيرتك عنده

وليه متوقعه كل الرجال زي بعض ﻻغلطانه ياقلبي

أنا كنت أفكر زيك كذا لحد ماتزوجت وتأكدت إنهم يختلفون

فيه إللي لو حبيتيه مره يحبك عشر مرات

ويكفيك إنه يحبك من بعيد لبعيد وﻻ أذاك بأي تصرف يمس سمعتك وتقدم لك وطلبك من أهلك

عطي نفسك وعطيه فرصه مع إن الكلام لسه بدري طالما ماصار فيه تحديد لوقت الملكه

إذا عرفتيه زين بتحبينه الحين هو بالنسبه لك غريب وﻻ قادره تستوعبين كيف حبك ومتى

وعليكم السلام ورحمة الله وبركاته ...
سارة أختي الكريمة كم عمرك وكم عمره هو ؟!
اكتبي كل الأسباب الحقيقي لرفضك له ؟! وماهي مخاوفك بالضبط واكتبيها بنقاط .
هل هو انسان خلوق وملتزم بصلاته ودينه ؟!
هل سيقف أمام طموحاتك ودراستك لو تزوجتيه ؟!
لما الوالد وافق بأنه تكوني له ؟! ماهي نظرته للمتقدم بالأكيد وجد شيء فيه يجعله يوافق عالرجل .،
هل الموقف الذي جعلك تكرهين جنس الرجال كما أخبرتي تتوقعي هو سبب التناقض الذي أنت فيه ؟! وهذا السؤال الأهم ..
لا تتسرعين بأي قرار حتى تعرفي أنت ماذا تريدي .اهدئي قليلا واشربي كوب نعناع يهدي أعصابك ..
الله يسعدك

الله يريح لك بالك.. دعيت لك و سمانا تمطر ان الله يشرح صدرك
مدري ليش لما قريت كلامك انشرح صدري و حسيت ان الامور بسيطه و انا مكبرتها!
مع انك قلتي نفس اختي و صديقتي اني *احبه* و انا اتنرفز من هالفكره.. بس شقول عاد
الله يعين على هالتناقضات و الحمدلله على كل حال..

-عمري 17.. عمره مآ ادري اتوقع 23 او 22 و يمكن 24
-ما اعرف ايش مخاوفي بالضبط.. كل الي اعرفه اني خايفه منه اخاف يكون انسان سوى كل هذابدون وعي؟.. او لاني اعرف انه عصبي يمكن م يتحملني.. و بصراحه انا اعرف من و اناصغيره انه مدخن ! .. و انآ التدخين بالنسبه لي شي كايد.. لكن لما قلت لامي قالت انه تاركه و انا مو مصدقه صراحه
-م ادري عن اخلاقه.. م اعرفه زين.. كل الي اعرفه انه كريم ! .. و سمعت وحده مره تمدحه!
-برضو م ادري!.. م تكلمنا عن هالشي! يمكن لان انا دايما الغي الموضوع بسرعه اول م يحاول احد يكلمني فيه.. بس انا قايله لاهلي و مقتنعه اني م راح اتزوج الا 24.. و اتوقع اذا م خانني انتباهي ان هالكلام وصله عشان كذا قال انه مستعد ينتظرني .. لكن انا مصره على قراري والله عون لي.
- برضو م ادري عن الوآلد بس هو دايما يقول انه رجال و لاحظته في الآونه الاخيره بادي يعتمد عليه ببعض الاشياء الي تخصه بالشغل.
- انا م اكرههم. انا بس ما اضمنهم. ولا اثق فيهم. و يمكن هذا سبب التناقضات بالاضافه الى اني احس بالمسؤليه المبالغ فيها اتجاه ان شخص يتمناك و يبيك ! .. و لا فاهمه نفسي.
..
حاولت اسوي هالطريقه و اطرح ع نفسي اسأله و اجاوبها كترتيب لافكاري و تناقضاتي بس كل م جيت بسويها اتعب و اتأفف!
الله يسعدك و يجزيك خير ..

السلام عليكم ورحمة الله وبركاته ...
أختي الكريمة ساره اﻵن فهمت سبب تناقضك وتخبطك مازلت في عمر صغير لهذا مشاعرك غير ثابتة ، للأسف يوجد بعض العادات وهي حجز البنت لفلان ..
تحدثي مع أقرب شخص بالعائلة وياليت مع والدك الكريم وتشرحي له أسباب مخاوفك وكل شيء وأنه لا يعطي كلام لأي أحد حتى
تنضجين ...
عندما تكلمت مع والداتك يدل على شخصيتك قوية وتستطيع التكلم ، لهذا أخبري والدك وسيتفهمك ...
وانغمسي في تحقيق أهدافك ولا تقفي للتفكير ، لا تتخذي أي قرار اﻵن ...
وفقك الله ...

ايوا بالضبط انا كنت افكر ان يمكن لاني الى الان م وصلت العمر الي يقدر يفكر بنضج اكثر في مثل هالمواقف.. عشان كذا افكر انسى وبس و ارجع لحريتي و التفكير في دراستي و بس
إحنا ابدا مو عندنا هالعادات و لا سبق و حصلت لاحد فينا و لما قلت لامي ان عمري م تصورت انكم بتفكرون بطريقه متخلفه كذا.. انكرت.. و قالت هذا بس عشانه يحبك و يبيك.. لا عادات و لا غصب و لا شي
ليت اقدر اتكلم مع ابوي. مع الاسف م اعتقد عندي الجرأه.. لان هو م فتح الموضوع معي ابدا ف كيف اجي انا و اتكلم؟؟ .. شي مُخجل .
م آخذ اي قرار حتى قرآري لما فكررت ابدا اوضح لاهلي و العيله اني رافضه؟!
الله يسعدك..

حبيبتي ربي يخليك

مو شرط تكون مشاعرك حب إللي سواه يرضي غرور أي بنت

شعور جميل إنك تكونين مرغوبه وفي شخص يتمناك وكل الناس تدري

ومستعد يسوي أي شي عشانك

ويكفيك إنه خطبك ﻻفكر يتواصل معك وﻻ يكلمك من ورا أهلك

وهالشي يخليك تحترمينه

" إنتي مو مجبره تبادلينه نفس الشعور "

وأصلا لسه بدري على هالشي بس فهمي أهلك إنك لو بيوم مابغيتيه مايجبرونك عليه

وصدقيني الرفض الحين أسهل لك وله من أنك تطلقين منه بعدين ويمكن بعيال

لو مو مقتنعه فيه طبعا القرار اﻷخير يكون بعد ماتشوفينه شوفه شرعيه وتجلسين معه

والله يكتب لك الخير

سارة هذه تقريبا نفس تفاصيل قصتي الا شيء واحد مختلف لدي انه كان صديق الطفولة وكنا نحب بعضنا
وكانت العائلة على اتم اتفاق ثم مرت السنوات ومع الانتظار تبدلت مشاعر العائلات الى خصام ومنازعات

صرت فيها انا الضحية وصحيح هو ايضاً كان ضحية الإ انه عندما يئس من الاختلاف بين العائلات ورفض اهله ذهب وتزوج

بقيت اتعذب من بعده بحبه ومرت سنوات وانا على ذلك الحال وثم برمجت نفسي على كرهه واسقيت عقلي الباطن كرهه وبقيت بعده اقبل خاطب وارفض آخر وتفشل ما اقبل به وهكذا مرت الأيام ثم صارت له ظروف وماتت زوجته وعاد لخطبتي ثانية وتزامن مع خطبة واحد من بعيد وقصتي هنا كتبتها وفي النهاية قبلت به ورجعت له وتزوجت به وأسعد أيام حياتي الآن أقضيها وطبعا الفضل لله ثم لهذا المنتدى


الذي اريده منك لا تتعلقي به وحتى لو احببتيه لا تحبيه بالقوة بل يكون حبا على مهل
صحيح قصتي ليست شرطاً لكن تاخذي اقل شيء منها ان تكوني على مهل

" يدخن + عصبي "
في سنك " الاضطرابات العاطفية" شائعة ..
فما أنصحك تتخذين أي قرار الحين حتى تاصلين 20 على الأقل ..
بعده شوفي إذا تقدرين تتعايشين معه و لا لا ؟

وحتى هو نوعا ما غير مستقر عاطفياً ، وكثير من الرجال اللي يتزوجون بدري يميلون إلى التجديد بالتعدد بعد عقد من الزمن ، و التعدد مباح بلاشك لكن على من تمر بحال مشابهة أن تنظر في المستقبل هل تستطيع تحمل العواقب ولا لا .

في حاجة أمقت أن أحدث بها لولا ألتمس حاجة " أعني أن تؤثر أحاديث أهلك عن رغبته بك ، و ميل الفتاة إلى الزواج عموما لمجرد مسمى " زوجة" الذي يبدو مبهراً في ظل أعرافنا و إن لم تكن مستعدة نفسانيا و جسمانيا " :
رغم أنه ليس من قرابتي و ظروفي مختلفة عنك ..
و كنت لا أفقه منه شيئاً في تلك الفترة حتى اسمه ورب السماء ، ومتأكدة حق اليقين أنه لا يفقه مني سوى اسمي فقط، إلا أني رفضت في 18 بعد الثانوية من شاب تقدم لي لأني أعرف بأني غير مستعدة نفسانيا و لا جسمانيا وكذلك مما عرفته من ظروفه الاجتماعية وطبائع أهله وتلك المعلومات الوحيدة التي اكتفيت بها، وقاومت ثقافة أهلي وصرحت لهم برفض من يتقدم لي حتى أتخرج وفعلوا ، المهم في رمضان ما قبل الفائت بعد5 سنوات أخذت إحدى قريباتي لعلها تستفزني تقول وتبتسم " فلان .. ترى فلان لم يتزوج "
أستغربت جداً لأني لم أسمع بالاسم من قبل " ومن فلان" ؟! "ذاك..." أخبرتني ، ومن ثم بعد أيام قالت بأن أمه ونساء أهله بأنها سعت لزواجه ولم يتوفقوا في الخطبة له فيريدون أن أعيد النظر و التفكير به، حينها تجاهلت كل أحاديث من حولي العاطفية الحالمة و فكرت بعقلانية ومنطقية " والأهم الاستخارة وتوكيل وتفويض الأمر لله"
فوجدت حتمية الرفض و فعلت .

و كدت أسجد لله شكراً بعد تفكيري الناضج في الثانية أنني لم أتهور بالأولى ، و بعد أن وجدت من المعلومات ما يكفي لاستحالة الزواج به رغم مرونة تفكيري ـ
و الأهم أني لا أتشدق كما بعضهن بكثرة خطابي فماعلمت إلا 3 خطبات ولا أدري ممن يحال القبول به فيفرض عن طريق الأهل سلفاً،و كذلك عدم كوني من فتيات البذخ و الشروط المبالغة <الحجة سلفاً كي لا يتهمني أحد بذلك .

و حجة أخرى سلفاً كي لا أتهم بها بأني : " سليمة نفسانيا وجسمانيا " و لله الحمد و أرغب بالزواج كفطرة طبيعية ،
و إنما ليس بدرجة أن أكره نفسي عليه فقط لأجل أحاديث حالمة عاطفية غير منطقية ، بل إن سخره الله لي صالحاً بشروطي كمسلمة عاقلة طبيعية فأبداً لن أرفض .

أحتسب الأجر بذلك أن تنشغلي بدراستك و بعبادتك و بالقرآن و بعد الكلية أعيدي النظر في الأمر ،
فلا تتعجلي إذ أخشى عليكِ الندامة لاحقاً .


" سبحانك اللهم و بحمدك أشهد أن لا إله إلا أنت أستغفرك و أتوب إليك "