(هل اقبل بخاطب بيني وبينه فروق واهلي يرفضونه)
انا بنت عمري 26 تقدمو لخطبتي الكثير ولكن في كل مرا والدي يرفض لانه حاط تقريبا شروط صعبه او بمعنى لازم زوج بنته يكون (كامل الاوصاف) يكون من عايله مرموقه او من نفس عايلتنا يكون مقتدر ماديا يكون وسيم الشكل والدي دقيق جدا بشكل الخطاب عشان الاولاد وغيرها ويكون ذو اخلاق عاليه ويخاف الله
عانيت من هاذا كثير لاني زي اي بنت تحلم بالزواج والامومه ولاني اخاف من شي اسمه فاتك القطار
ومع كثرت خطابي ورفض والدي بدا كلام الناس يطلع ويزيد مثلا ليه مايزوجونها.. البنت تبي ملك ولا امير.. البنت ببالها شاب معين.. البنت عايشه قصة حب مع شاب.. البنت معيونه والعين تصرفها عن الزواج وووو كلام كثير وكلن يجيب من راسه كلام
طبعا اتضايق من الكلام لان الرفض مايكون مني من والدي بس الكل يضن انه مني انا لان دايم رد امي لام الخاطب ان البنت ما ارتاحت او مافيه نصيب او ماتبي تتزوج
وصل الكلام لوالدي وبينت له ان هالكلام يضايقني مابين انه متضايق من هاشي قالي ماعليك ي بنتي الناس تتكلم كذا عشان تضغط علينا وعليك ونزوجك مين ما كان بس لاتهتمين ومن هالكلام
انا ولله الحمد تقريبا كل شهرين او ثلاثه يتقدم لي واحد او اثنين
لاني ولله الحمد والفضل جميله جدا ومتعلمه وادب واخلاق
وهاذا الشي اللي جعل والدي يتشرط بزوج المستقبل دايم يقول بنتي ماهي شي رخيص او شي بسيط بنتي ماراح اعطيها الا للي يملا عيني تقدم لي القريب والبعيد وكلهم ماملو عين والدي
امي دايم تحاول معاه وتبين له ان العمر يمشي والبنت بدت تكبر بس يقول شوفي بيوت الناس مليانه وش اللي يخليني استعجل الصبر زين
لكن رايي يختلف مع والدي اشوف ان كل ماكبرت البنت كل مابدت فرصة الزواج لها تقل

حاليا متقدم لي شاب سبق وانه تقدم لي اكثر من مرا وفي كل مرا يكون الرفض قبل تقريبا اسبوع اتصل بوالدي وطلب الزواج مني وانه سبق وحاول ولازال متمسك
والدي يمكن من اصرار الولد لانه تقريبا تقدم لي 5مرات وله تقريبا 3 سنوات يحاول ولازال متمسك غير نظرته لهاذا الشاب او يمكن مع اصرار امي عليه انه يزوجني ومايتشرط غير رايه ما اعرف ايش الاسباب لكن والدي ترك لي حرية الخيار ان اقبل او ارفض
رغم انه يقول لامي بنتي ماهي شي بسيط وانه لو رضت فيه بيكون محظوظ وانه ماهو الشخص اللي كان يتمناه لي لكن القرار اتركه لها

الشاب اخلاقه جيده يعيبه انه عصبي بعض الشي
هو راعي صلاه وخوف من الله.. وظيفته جيده راتبه تقريبا يصل الى8000 وغير كذا هو من عايله غنيه..عنده شقه حلال ملك وليست اجار.. راضي بكل شروطي من مهر غالي وخادمه واني ابي اتوظف وغيرها

سبب رفض والدي له هو شكل الخاطب ماهو وسيم ابدا يعني شكله اقل من العادي وفرق شاسع بيني وبينه هو اسمر وانا بيضاء هو قصير وانا طولي مناسب ......................... وهو بعيد عن الوسامه بمعنى الفرق كبير بيني وبينه
غير كذا ان عايلة الخاطب اقل من عايلتنا بالتقدم والتطور والعلم رغم غناهم الا انهم بدائين بعض الشي
هاذي الاسباب اللي جعلت والدي يرفضه في بداية الامر ولكن مع اصرار الولد وتمسكه والدي زي ماقلت ترك الامر بيدي

فوق تردد والدي طلع اخوي ماهو موافق ويحاول بجهد انه يقنع والدي انه يرفض هاذا الخاطب اسباب رفض اخي نفس اسباب والدي ولكنه زاد على هاذا بانه يقول ان الولد عنده فرقة اعراس لم سال والدي عن الولد الكل مدح باخلاقه وكرمه وضيافته ومافي شخص تكلم انه عنده فرقه ووالدي يقول ماعمري سمعت بانه عنده فرقه
انا في كل خطبه لابد ان اموري تتعقد ووقوف اخواني قدام زواجي ظهر اكثر من مرا انا اعاني اول الامر من رفض والدي واذا تمت موافقته يطلع اخواني رافضين وتتعقد الامور ويتم الرفض..

قبل كم شهر تقدم شاب لخطبتي فرحنا كثير انا ووالدتي والدي كان متردد بداية الموضوع لكن حسم الامر بعد السؤال عن الولد بانه ترك لي حرية القرار ولكن اخوي الاصغر مني ب3 سنوات عارض الموافقه وقال ان الولد يشرب الخمر وحاولنا نفهم تفاصيل شرب الولد للخمر مثلا مجرد كلام وماشافه او انه شافه كان يبدا بالصراخ والعصبيه ويرفض انه يتكلم ويقول انا قلت اللي عندي الولد يشرب الخمر بعد مارفضنا بكم يوم جا اخوي لامي وقال لها انا اراح ابري ذمتي الولد يمكن انه ترك شرب الخمر وانا اشوف ان الولد اخلاقه زينه طيب ومواضب على صلاته ومن هالكلام لكن بعد ايش جاي يقول هالكلام بعد مارفضنا ..

لم كان عمري 22 سنه تقدم ولد عمتي لخطبتي انا وافقت لانه ولد عمتي وواخلاقه الكل يشهد له فيها لكن اخوي الاكبر مني ب5سنوات راح من غير مايعطينا اي خبر وقال له ترا اختي رافضه ولم قالت له امي ان راح نرد لان اختك موافقه قال لا انا انهيت الخطبه اشوف انه مايناسبها الولد عصبي وهي هاديه باطباعها والحين والله انه يقول لامي انا ندمان انه رفضت ولد عمي وياليت ان اختي تزوجته..

تقدم لخطبتي شاب وافقنا موافقه مبدئيه بعد السوال ولكن اشترط الشوفه الشرعيه وتدخل لخي وحلف يمين بأن ماتكون في شوفه وان ماراح يرضا لاي شخص انه يشوفني شوفه شرعيه لا انا ولااخواتي بالمستقبل وطبعا الولد مارضا وما تمت الخطبه على الرغم ان اخوي قبل ارتباطه يشترط الشوفه الشرعيه فهو قبل ارتباطه شاف 5 وماكان يقتنع بالوصف لانه يقول من حقي اشوف البنت وانه هاذا شرع بمعنى(يشوف انه هو حلال له واحنا البنات حرام)
ودايم يقول رفضنا ورفضنا ورفضنا وبعدها نعطيها هاذا لا بما انها صبرت تكمل صبر راح يجيها واحد احسن منه رغم انه هوقبل ارتباطه كان من شروطه ان البنت عمرها مايكون اكبر من 23 سنه وهو عمره 30 وكان حريص على العمر وانا الحين عمري 26 ويقول لا تصبر بجيها احسن انا اخاف اغلب الشباب مايرضا يرتبط ببنت عمرها 26 زي اخوي لم شرط ان عمرهها مايجاوز ال23
وغيرها من اعتراضات كانت تنهي خطبتي بالرفض

انا محتاررره اوقات اقول ماعلي بكلامهم لان الرسول الكريم قال (من اتاكم من ترضون دينه وخلقه فزوجوه) والزواج ستر ومصونه للبنت وللولد
الرجال ماينقاس بالشكل ينقاس بالاخلاق
ودام انه متمسك وشاريني وراضي بشروطي وعارف اني بنت مدلعه ما اعرف اي شي لا اطبخ ولا انظف اعتمادي على الخدم
مو مشكله الشكل مع العشره بحبه وبشوفه ملك جمال
ومستوا عايلتهم ماراح يأثر علي ابد
انا ماني صغيره 26 والايام تمشي وراح تبدا فرص الزواج تقل
والعنوسه صارت منتشره بشكل كبير واعداد مخيفه
واحيان اقول لا ماراح احبه ولا بتقبله ابد
وزي ماقال اخوي بما ان رفضنا كثير وصبرنا تصبر يمكن يجيها واحد احسن

كثير لم سمعو انه خطبني للمره ال5 استغربو من اصراره لكن زي ماتقول عمته وامه هو يبي مواصفات شكلية معينه بزوجة المستقبل وهي موجوده ببنتكم .........................
يعني هو عارف بالفرق اللي بيني وبينه


وكثير قالو لي انك ماتناسبينه وانك واجد عليه بمعنى وزي ماقالو انتي حسافه عليه تستاهلين واحد احسن من هاذا وكثير قالو لي ماراح تتقبلين مجتمعهم لان زي ماقلت هم بدائين وانا احب التطور ومواكبة العصر
ويقلون فكري بعيالك فرضا طلعو عليهم و و و و
رغم ان الولد ماهو بشع ولا اسود
هو قصير ومكرش واسمر اللون وملامحه تقريبا عاديه مافيها اي وسامه انا ماشفته
ولكن هاذا الوصف اللي وصفوه لي وعارفه ان ماراح اقدر اشوفه الابعد العقد الشرعي لان اخي الاكبر زي ماقلت حالف يمين ان خواته ماينشافون شوفه شرعيه رغم انه زي ماقلت شاف اكثر من وحده قبل ارتباطه وزوجته الحين ماوافق عليها الابعد ماشافها شوفه شرعيه وانا خايفه بعد العقد الشرعي واكون زوجته شرعا ما اتقبله واطلب الطلاق وبصراحه ما ابي اتطلق لان الطلاق زي ماله فوائد له اضرار بمعنى انه سلاح ذو حدين

وحتى لو طلبت صوره للولد ماراح اقدر احكم عليه من صورة جوال (صديقتي رغم انها شافت زوجها شوفه شرعيه لكنها مع الارتباك والخجل ماقدرت تركز بعدها طلبت صوره ارسل زوجها للاخوها الصوره وشافته كان جميللل بالصوره ولم جا وقت الملكه والعقد تفاجئة بالفرق الشاسع بين الصوره والحقيقه الصوره اجمللل بكثير من الحقيقه )

الولد يوم الجمعه ارسل لوالدي رساله بمناسبة يوم الجمعه معنى الرساله ..انها جمعه مباركه ويدعي ان يكون مكانهم فالاخره الفردوس الاعلى وزي كذا
وفي نهاية الرساله كتب (بشرني ي ابو فلان ان شاء الله خير )


ما ادري اوافق او لا...اي شخص عنده نصيحه لا يبخل علي فيها

(تم التعديل ليتناسب مع المضمون)
‪

ارفضيه لأنك تبحثين عن الوسامة و شروطك صعبة و مادية بحته فلذلك ارفضيه ليتزوج من ترضى به
انتظري حتى يأتيك الوسيم الغني المتحضر الغير بدائي الذي يرضى بجميع شروطك و كل انسان يتحمل نتيجة قراره و شروطه سواء كانت بسيطة او تعجيزية و هذا من حقك

الأب و الأخوان الذين يقفون في طريق اختهم عند اي خطبة يتصادمون عند كل خطبة و كل منهم له رأي مختلف بالخاطب و يتفقون على الا يتفقوا و تظل الفتاة هي الضائعة التائهة المعلقة و عندما يقعون في ورطة كبرها بالسن و شح المتقدمين يزوجوها و يقنعوها بأي متقدم لكي لا يفوتها القطار او يذهب بلا عودة و غياب الفرص بمتقدمين جدد

وفقك الله

__________________




كل مشكلة ولها حل
**باب بيتك هو باب خزنة اسرارك الزوجية**

بـــاريـــس... تــقــريــر رحلتي الــى مــديــنــة الــنــور
.
.

افضل شيء الأستخاره ...اسال الله لكِ التوفيق اختي الكريمه

__________________

السلام عليكم
شكرا لردك
ولكن يا اخي لماذا كل هاذا الهجوم.. هل انا من وضعة هاذي الشروط ام والدي واخواني ؟؟

انا مع كل خطيب اوافق واترك القرار لوالدي ولكن في كل مرا يرفض او يتدخل احد اخوتي للرفض
وللعلم انا لم اتردد للحظه على الموافقه الا بعد كلام اهلي وغيرهم
وايضا ولد عمتي اللذي وافقت عليه رغم اعتراض اهلي فهو يفتقد الوسامممه بكل معنى الكلمه واسمررر للون ولكني وافقت بسبب اخلاقه ولانه ولد عمتي اللتي احبها واعتبرها والدتي الثانيه
ولكن ماذا حدث؟؟؟ ذهب اخي بدون علمنا وانهى الخطبه بقوله اختي غير موافقه ولاترغب بالزواج في هاذا الوقت سوف تكمل دراستها

وايضا تقدم لخطبتي شخص بدين جدا جدا وانا رشيقه رغم ذالك وافقت ولم اعطي للبدانه اي اهتمام ولكن لم تتم الخطبه ولست انا من رفض بل تدخل احد اخوتي
وغيرها وغيرها لا احب ان اطيل اكثر
فما ذنبي انا؟؟

من قصتك نأخذ العبره والعظه كانوا يريدون الوسيم الغني صاحب الأموال لما كبرت البنت صارت غير مرغوبه جاها الشخص الأسمر المتين الدنيا غداره المهم انصحك ماتوافقين لنك تبين الوسيم صدقيني مع الايام ماراح تتقبليه وصراحة عمرك كبير استخيري أفضل

الله يكون بعونك ما يحضرني شيء أقدر أنصحك فيه ،
إنما ..
ربما حاولي قدر الإمكان تحصلين صورته تغاضي عن السمار إذا كان خفيف أو معتدل وركزي على "ملامح الوجه " رسمة العين ودقة الأنف و جمال الفم ..إذا صارت حسنة ومعتدلة مع ملامحك فتوكلي على الله لأن الأبناء ماراح يتأثرون كثير.

وبالنسبة للـ" عصبية " ادرسيها جيدا إلى أي درجة هي ؟
يعني فيه عصبية مأساوية ومدمرة ... هذي ضحاياها يجرجون بالمحاكم قضية عنف أسري ،
وفيه عصبية يمكن التعايش معها مثل الانضباط والقيادية .
ثم السؤال الأخير هل هدوئك مجرد هدوء و لا مصحوب بـ"حلم"
يعني تحت ظروف الضغط ودرجة الحرارة العالية
زي بالكيمياء تنفجرين و لا لا ؟ خخ
طبعا كل هالحوارات من نفسك إلى نفسك بعد الاستخارة و تفويض الأمر لله " واصلحي روحانيتك".



همسة أخيرة:
استوقفني مثل شارب الخمر ونقل تفكيري لأبعاد مختلفة بعدما أردفت وحيرتك في مصداقية رؤية أهلك ..
لأن هالنماذج ومثيلاتها بصيغ أخرى لا تطاق و صعب التساهل معها .
" سبحانك اللهم وبحمدك أشهد أن لا إله إلا أنت أستغفرك و أتوب إليك "

استوقفتني بعض الردود مع احترامي لجميعها وشكري الجزيل لكل من وضع رائه في مشكلتني

ولكن اللذي استوقفني هجوم البعض بأنني ابحث عن الوسامه والمال وغيرها من مكملات
هل من تبحث عن الوسامه تقبل بشخص غير وسيم بكل ماتحمله هاذي الكلمه من معنى تصوير بسيط للشكل (انف افريقي وعيون افريقيه وفم افريقي..اسنان غير مرتبه ومتقدمه من الاعلى بشكل ملحوظ شعر ليس بناعم وللون اسمرر) هاذا الشخص تقدم لي فعلا ووافقت على الرغم من انني اعرف شكله جيدا لماذا وافقت؟؟ لانه ولدعمتي للتي اعتبرها والدتي الثانيه _واخلاقه مشهود فيها...

هل من تبحث عن الجمال توافق على شخص سمين سمنه مفرررطه رغم معرفتي بالامراض اللتي قد تكون فذالك الخاطب نتيجة سمنته منها السكر وغيرها من امور لااريد ان اتطرق لها

هل من تبحث عن الجاه والمال تقبل بمن يعمل (اسكورتي) حارس امن على الرغم من انني جامعيه (بكالريوس) ولكنني وافقت
وغيرها من امور لم اعطي لها اي اهتمام رغم ان فتياتي غيري يرفضن لارتباط بهاكذا

ولكني اخواني اخواتي اقرءو مشكلتي جيدا فلم اكتب انني اريد كذا وكذا انا نقلت لكم رأي اهلي والبعض
(وشي طبيعي وأي بنت راح تسمع زي هالكلام راح تتردد حتى لو انها مقتنعه وفرحانه بالخاطب)
وشكرا

اولا مستحيل تلاقي شاب كامل من جميع الجوانب

بس الشيء الغريب انكم ترفضون النظرة الشرعية !!!!!!

للأمانة قدام الله

أنا رفضت "حارس تقريبا "عسكري بأمن إحدى المؤسسات تقدم للخطبة مرتين ،
وربما ليست الظروف والأسباب اقتصارا على هذا بل لأن "الزمان صعب " ما يقبل الخضوع للاحتمالات
( إذا نظرتك المستقبلية تجد صعوبة الأمر فمعك كل الحق ).
لأنه استطراد ألون بالرمادي :
لا أقول فقيرة الحمدلله بل حالتنا متواضعة ،
إنما استغرقت عمر الطفولة إلى بدء الشباب حاليا في عصامية وكفاح ..
يعني غصب متطلب يكون موسر وماديته وسيعة عشان في حال توظفت أنفع أختي المطلقة وعيالها و أخواتي و أخوتي الصغار من أبوي لأن أهل زوجة أبوي متواضعين مادياً كذلك.. أحتاج إلى الاستقرار النفسي وربما الذهني البدني أخيراً مع
رجل قوام بالبيت ماديا و نفسيا وهذا الأصل و الواجب بالشرع أنه يحقق "الاكتفاء" من هالناحية ..بدل ما أعيدها أكمل نصف عمري المتبقي بكد و تأسيس للمنزل و لجانب من الأسرة هي من واجباته و ليست واجباتي ، و في حال ما توظفت ما أورط نفسي بالفقر و الفقر موجع لأن الرسول تعوذ منه .


و كذلك " الشكل "
معك حق إذا كان بدرجة لا تتقبلها نفسك و الأهم " نفسية الأبناء حسب عرف المظهر" ، وشاهد حديث الرسول للرجل الخاطب أن ينظر بعينها ، و شاهد آخر المرأة المرسولة من النبي لتنظر ما بين فكيها لولا الاختبار فصلت أكثر .
و أعرف امرأة بيضاءوجميلة زوجها بملامح حبشية تقريبا فأنجبت :
بنت لها بيضاء و شقراءو الثانية حسنة الملامح إنما سمراء ،
القصة أن الطفلة الثانية جد متأثرة نفسيا بسبب عرف المظهر في العائلة لدرجة تجي تقولي " صح أنا حلوة ... صح إذا لبست فستان أطلع أحلى من أختي " عاد أنا أعززلها و أعاملها معاملة خاصة و أناديها بالأميرة بقصر زي القصص الفكتورية و الغابة السعيدة ، الناس تفرق مع أن روحها أحلى والـbody language حقتها رهيبة ماشاء الله تبارك الله لا حول ولا قوة بالله ، وهي أقرب لقلبي من أختها و كلهم أحبهم.


موقفك صعب فألجأي إلى رب العالمين محد قادر على فهمك و تدبير أمرك مثل الله سبحانه وتعالى له الأسماء الحسنى .
و للأمانة المجتمع يطلب من الأنثى تضحيات كثير حتى لو أحيانا فوق سعتها ، بينما الذكر لو به عيوب الدنيا بما فيها ينسون واجباته بالأصل فكيف بالتضحيات ...؟
يعني ممكن هالخاطب نفسه " مصالحه مادية " يعني بعد انتهاء تاريخ صلاحية المرأة يطق ثانية بعد عقد من الزمن لا و الأشنع يطلق يرمي الأولى رمي الكلاب و المجتمع ساكت وممكن مؤيد و لا أحد ينتقص من ضميره أو سياسته في ذلك .

" سبحانك اللهم وبحمدك أشهد أن لا إله إلا أنت أستغفرك وأتوب إليك "

اختي قصتك زي قصتي
مره اخوي يرفض ومره امي
كان لما يخطبني احد البيت ينقلب واهلي يقلبو وجيهم
تخيلي مره خطبني ناس وزعل اخوي ليه يتجراو يخطبوا اختي
وقال لامي قولي لهم ماازوجها الا امير ولا منصب
بس لما وصلت 28 تقدم لي مطلق ومواصفاته مش مره
قالوا نسال ولانوا
عورني قلبي
عقب هالشروط ورد النصيب لنتو الحين
رفضت لانه غير مناسب
لما وصلت الثلاثين عاد صار مشي عمرك وكبرتي وخلصي امورك
وصرت ابغي بس ربع مواصفات الي يخطبوني قبل
ومانفعني احد
لما تقدم طليقي في ايام تمت الموافقه
محد سال عنه الا اخويه بعد اصرار مني وسال شخص واحد بس
انكسر قلبي
وتطلقت محد درى عني
نصيحه لا تسكتي
هذا مش يبحثوا عن مصلحتك هذا اسمه عضل
لا تسكتي
واستخيري عشان الله يسهل امورك