السلام عليكم
عندي مشروع جديد ياخذ وقتي وجهدي كله
نفسيا وجسديا مرهقني
اسال الله ان يوفقني فيه
واطمع بدعواتكم الجميله بالتوفيق
المشكله في عدم تقدير الناس لانشغالي هذه الفتره
بمعنى اتصال الاصدقاء المتكرر واعتذاري منهم
ومعاودتهم الاتصال مره اخرى
يربكني ويغضبني لما لا يقدرو اني فعلا مضغوط
مثلا احد الاصدقاء يتصل اين انت
اكون بالبيت اشتغل بمكتبي
هو يسمع بالبيت خلاص يحط بباله اني فاضي
مع اني اقول له اني اشتغل بالبيت
الحاصل دقايق والقاه عند الباب
وتعال ضيفه واقعد معاه ويمون ويكون عازم معاه اثنين او ثلاثه من الشباب زوجتي بعدها تقول هذا انت عازم الشباب وفاضي لهم ليه ماتحضر المناسبه الفلانيه يكون عند اهلها مناسبه وانا معتذر لهم لانشغالي
اول كنت اجامل على حساب نفسي
و كنت اجامل كثير لان كان عملي بسيط في وقتهاً
الان انا فعلا مقبل على مشروع كبير ومحد مقدر

يحسبوني اتهرب ويقولون دايم عندك شغل ماكنت كذا
قلت لا مانفع تعذرت مانفع ان مارديت جوال القاهم عند الباب غير ان الوالده الله يطول بعمرها
دايما تاخذ لي مواعيد بدون علمي يعني تكلمني بنزور خالك او خالتك ولازم توجبهم
الي جاي من سفر والي مريض والي عرس ولده

انا تعبان فعلا
يوميا انام واقوم بضغط شديد براسي وجسمي مرهق
من كثر ما اسهر واشرب قهوه
العمل ضغط والاهل والبيت و التوجيبات الاجتماعيه صغط
اصدقائي ضغط
يوميا احد يكلمني يعاتب
ويتشره ليه ماحضرت ليه ماوجبت
ماكنت كذا
ماتوقعناك ما تحشمنا
ومن هالكلام الي يجيب الهم
اتعذر واتاسف وارسل هذيتهم بس ولو ولا كني اسوي شي
غير ان بيتي هو بيت الوالد الله يرحمه
كان فاتح مجلسه للجميع
لدرجه محد من اقاربنا الي يجون من بعيد ياخذ فندق

فعيال عمي وجماعتي حاطيني مكان الوالد
تخيلو صحيت من النوم لقيت قريبي جاي بدون موعد
وقعد اسبوع كامل وتاجلت كل مشاوري وشغلي اسبوع
لاني صرت مرشد سياحي معاه
وبالبيت لازم اقابله لان هذا بالذات ما يعرف احد غيري
تعبت الي عنده حل فعلا بكون شاكر
هذي المشكله اواجهها من رجعت من برى
لكن الحين متازم لظروف ومشاكل بالشغل
وشكرا

والله يأخي الكريم مانملك لك الا الدعاء ان يفرج الله همك ويكفيك مائلمّك

هذي مشكلة الواحد لاصار متحمل هموم الدنيا فوق راسه ( زواج وأبناء وعمل وعلاقات إجتماعية ومسؤوليات)

لازم نحاول نجاري الحياة غصباً عنا والا ماراح يرحمنا الي حولنا كل واحد يبغا ياخذ نصيبة على اتم وجه حتى لو كان على حساب نفسك

أهم شي في زحمة هالحياة نتعلم اساليب نصرف نفسنا فيها مع بعض الناس النشبة الي ماتفهم لاشرحت لها وضعك يعني مشيها له هالمرة والمرات الي بعدها شوف اي طريقة تقنعه فيها بذكائك

أخوك نفس الوضع مايدري من وين يجيها بس هالشي نحاول نتأقلم معاه ونهيء أنفسنا له انه لاراحة في هالحياة الا بعد ان يأخذ الله أمانته بعد عمل صالح يرضاه عنا

__________________
❤سبحان الله وبحمده ❤
عدد خلقه • ورضا نفسهِ • وزِنةَ عرشهِ • ومِدادَ كلماته

لاتجامل الناس على حساب نفسك ابدد
وصرفهم ولاتقولهم اني بالبيت قل مشغول وبس
والي تحسه لزقه ومايفهم عادي لاترد عليه
قلل علاقاتك وصداقاتك لاتتمسك الا بعدد قليل وفيه صفات يستاهل ومن ضمنها انه يتفهم ويقدر ولايتلقف ويسأل
الشخص الوحيد الي بقولك جامله واحتسب الاجر هي امك الله يحفظها
بصراحه غريبه اقاربك يسكنون عندك ومايستأجرون احس هالنوعيه راحت مع الزمن الماضي
عموما حاول تتملص من انفتاح بيتك للناس لانهم ببساطه ماراح ينفعونك بشي
واهم شي لاتقعد تشرح لهم شي عن مشروعك وسبب انشغالك
وان حصل تبيع بيت الوالد افضل لان توك ببداية حياتك وماعمدك اطفال اسكن بيت صغير افضل واريح
الله يوفقك بمشروعك ويحقق لك منالك

ارسل رساله لكل من اصحابك و اكتب لهم التالي
انك في الفترة الجاية مقبل على ضغوط و انشغالات بسبب العمل و لا تفكرو انه اهمال مني بس المرحلة الجاية هامة و تتطلب مني كل جهدي و تركيزي .اذا ما رديت على احد او ما حضرت مناسبة اتمنى تعذروني على تقصيري

او شئ من هذا القبيل .
سكر جوالك اذا دخلت مكتبك او حطه صامت .
الللي يسال عنك خلي اهلك يقولوا مو موجود و اطلب من امك كمان تتفهم انك رح تكون مشغول مستقبلا و ما فيك تحضر مناسبات العيلة .
سؤالهم عنك جاي من محبة و الواضح انك محبوب و اجتماعي لهذا اخذوا على خاطرهم
اللي يحبك رح يتفهمك و اللزقة عطيهم بلوك و ما تكلمهم
فرصة الواحد يغربل اللي يخالطهم

الله يوقفك و يعينك

اذا صعب يكون مكتبك خارج بيتك فخصص لك غرفة تكون مؤثثة ومرتبة كمكتب ملحق بالبيت .. مش اي غرفة فيها جهاز الكمبيوتر وخلاص .
الغرض من هذا انه اللي يتصل او يجي تقدر ترد عليه وتقوله انا حاليا بالمكتب .. لما انهي عملي اكيد بكلمك ..
راح يتكرر اعتذارك وتبريرك لفترة من الوقت .. اسبوعين شهر وبعدها الناس راح تتعود علي وضعك الجديد

الاقارب لما يجي وخاصة اللي علي غفلة اعطيه جزء من نهارك ( غدا او عشا ) وباقي الوقت شوف له ساءق واعطي الساءق جدول باماكن ياخذه عليها .
صح بالاول راح يستهجنوا تصرفك شوي لكن انت سديت امامهم المجال للنقد بالغدا او العشا اللي قضيت وقته معاهم .

اعرف .. هو وضع مزعج خاصة لشخص عنده احساس ومتعود عل احترام الاخر لكن اولا هذا مؤقت الي ان يستوعبوا .. ثانيا لو لا سمح الله تاثر مشروعك او فشل ماحد منهم راح يفيدك او حتي يحس انه كان سبب من الاسباب .

لو جا صديق وعازم معاه اصحابه وانت مضطر وما عندك وقت وما قدرت تفهمهم انك مشغول ،اعرض عليهم طلعه خارج البيت .. بحجه انك مليت من البيت او تعبت من الشغل وبحاجة بريك ولما تطلعوا اشرب فنجان شاي او قهوة واستاذن منهم عشان ترجع لشغلك .. لما تكون خارج البيت تقدر تعتذر وتتركهم لكن ما تقدر تقولهم اطلعوا من بيتي بدي ارجع لشغلي

الله يوفقك بمشروعك

__________________

المستحي مغلوب

الله معك
أرسل رسالة بالواتس او الجوال انك مشغول جدا و مضغوط و ما راح ترد على حدا
و وقف المجاملات و الزيارات لفترة و خليهم يتعودو على موقفك الجديد
لأن ارضاء الناس غاية لا تدرك و كذلك نفسك و اهلك أولى

مرحبا أخي
شكلك بمجتمع فيه أمور الضيافة والعلوم والسلوم إلخ..، بالإضافة إلى إنك رجل تستحي.

خلك صريح ياعزيزي، إذا أنت مشغول، قل أنا مشغول ومرتبط ولا أقدر أفضى، لاتجامل على حساب نفسك ومشاغلك وأولوياتك.
اللي مايعجبه هذي مشكلته.
أنت أولى بحياتك لنفسك بدلاً من استهلاكها لرضى واستقبال الأخرين.

__________________
ياصبحِ لاتِقبل !!
عط الليل من وقتك..

السلام عليكم ورحمة الله وبركاته
هذه صفة جيده انك اجتماعي وتوجب الناس .
ممكن انك تشتغل في مكان بعيد عن البيت ،، احمل معك كل اغراضك المهمه وروح مثلا المكتبه ...
دام انهم عارفين طريق البيت ... واذا اتصلوا عليك قلهم مشغول حاليا وانا لست في البيت ... بعدها اذا فضيت ابنفسك اتواصل معهم او روح لعندهم ...
هذه المشكله تواجه الكثير خاصة طلبة الجامعات ومساكين البنات ما يقدرون يهربوا من البيت
اسال الله لك التوفيق