السلام عليكم ورحمة الله وبركاته

انا عندي أخ عمره 26 موظف في الرياض مع العلم احنا بعد ساكنين في الرياض
خطبنا له وحده من القصيم عمرها 25 عندها 7 اخوات
المهم يوم خطبناها دفعنا لها مهرها و طقم ذهب وطقم لأمها ورضوى
المهم كانت فترة الملكة 9 شهور
خلال الملكة اخوي كل شهر يرسل لزوجته مصروف احيانا 500 واحيانا اقل واحيانا غير المصروف تطلب منه مبالغ زيادة
يعني تقول انها محتاجه و يرسلها وغير الهدايا وبطاقات الشحن اللي يرسلها لها
بعد كل هالمدة حددوا الفرح وتم الفرح بعد الملكة 9 شهور يعني فترة تعتبر مو قصيرة
بعد الفرح بإسبوع صارت مره مشكلة بينهم بسيطة والله لاتذكر
المهم طلعت الوالدة عندهم بحكم ان شقة اخويه معانا في العمارة
طلعت الوالدة وبتشوف ايش المشكلة
من بين الكلام اللي صار " تقول زوجة اخويه لأمي هو ولدك لازق فيني انا قلت له مانبي نستعجل ونعمل الفرح بسرعه
خلينا ننتظر بعد 3 شهور زيادة نحدده
امي انصدمت من الكلام اللي صار
عاد بعد اسبوع بالضبط راحت زوجة اخوي لأهلها على اساس انه عندها فرح صديقتها بتحضره
تخيلو بعدها رفضت ترجع لأخوي
قالت انا ماابي اجي عندكم الرياض ابي بيت بالقصيم عند اهلي ولا مانيب راجعه
جلسنا تقريبا بعدها 3 شهور وراحت هي اشتكت تقول ان اخوي ضاربها ومطلعه تقرير طبي
طبعا التقرير الطبي مكتوب فيه بالحرف الواحد
ان لايوجد اي رضوض او خدوش في الجسم ويسلتزم راحه لمدة يومين !!!
وعلى هذا التقرير الطبي راحت اشتكته بالشرطة وتبي تجرجره بالمحاكم
مع العلم ان اخوي في قطاع عسكري شغال وهالشيء يأثر على ترقياته ويأخرها
وحسبي الله ونعم الوكيل فيها
بعد كده راح اخوي طلبها في بيت الطاعه
وجاء وقت الجلسة
اخر الجلسة تم الإتفاق ان تعطيه المهر حقه فقط ويطلقها بالقوة الشيخ !!
لأن طلبت بيت برى واخوي رفض
قال ماعندي الا بيت اهلي
طيب والخساره اللي خسرها اخوي تقريبا 200 الف ريال
مين يتحملها ! قال الشيخ هذا في الشرع ماله الا المهر فقط وبالقوة نطلقها منك
مع العلم ان مافي اي عذر شرعي في اخوي يخليها تطلب الطلاق
هي اصلا يوم جات حطت ملابسها في الشقه قبل الفرح تخيلوا والله مامعها غير شنطة وحده وحتى ملابس بالدولاب ماهي حاطه !
متخيلين والله كأنها متفقه مع اهلها و عاد امها بكبرها حسبي الله ونعم الوكيل فيها , مره مسكت اخوي على جنب تقوله
اذ تبي اولاد من بنتي اول شيء اطلعوا من هذا البيت
يعني من عند اهلك !! متخيلين كيف ؟
حسبي الله ونعم الوكيل فيهم كلهم هي وامها واخواتها
عاد اخواتها / البنت ماتتحرك خطوة وحده الا بعد مشورة اخواتها
الحين
سؤالي للي يعرفوا او مرة عليهم مثل هالمشكلة
الشيخ حكم عليها انها تعطي اخوي بس المهر فقط و راح يطلقها بالقوة من اخوي
واخوي يبي المهر ويبي الذهب والاغراض اللي جابها لها
مع العلم ان هي لمن راحت بيت اهلها ناسيه بشقة اخوي كم صندل لها و كم حاجه من ملابسها الداخليه
ورافعه قضيه على اخوي
طالبه فيه صنادلها وملابسها الداخليه !! متخيلين الوضع
يعني هي ماهي راضيه تدفع لأخوي وترجع له حقه وتبي صنادلها !
وتقول بعد للشيخ / ياشيخ قوله نعطيه 5 الاف وتخلعه !!
متخيلين طلبها حسبي الله ونعم الوكيل فيها
حسبي الله ونعم الوكيل
هل يحق له ان يطلب الأغراض اللي جابها لها خلال فترة الملكة او لا ؟
أو حقه شرعا المهر فقط ؟؟؟

ايش رايكم في اللي صار ؟
مع العلم ان هالأشيـاء اللي ذكرتها تعتبر بسيطة من الشيء اللي صار معاها هي واهلها
وجزاكم الله خير