السلام عليكم ورحمة الله وبركاته

راح أطرح المشكلة باختصار والتفاصيل الطويلة تحتها
أدري بتكلم واجد الله يعينكم تتحملوني

المشكلة باختصار

"وسواس تفسير أي مديح موجه لي على أنه عين مع أني مقتنع
تماما أن هذا غير صحيح" مما يسبب لي تشتت وعدم تركيز
مع ملاحظة أني أعرف أتحكم في المشكلة بس ما أقدر أتخلص منها

التفاصيل

أنا إنسان متفوق دراسيًا ولله الحمد نشأت في بيئة شغلها الشاغل الخوف من العين
والعين حق ولازم تحصن نفسك من العين لدرجة لو أصير تعبان,مزكم مثلا,
يقولوا لي أكيد عين ماصلت على النبي ويسووا لي شبة ( معتقد في بيئتي إن الشبة تعالج العين )
لذلك العين صارت معتقد راسخ عندي وأي إنسان كان يقول لي ( يهب ي الدافور )
لازم اذا رجعت البيت أخلي أهلي يسوون لي شبة لخوفي من العين وهذي حياتي إلى أن خلصت الثانوي.

بعد ما دخلت الجامعة تيقنت وفطنت أن اللي كنت أخاف منه كله خرابيط
وأن أكيد مافيه قوة خفية يمتلكها البشر تخليهم يأثرون علي بدون موافقتي
(( هذي نقطة إيجابية لبداية التخلص من هذا الوسواس ))
لكن المشكلة أن لازالت عبارات مثل ( يهب - ي الدافور - ي لاحس أم الكتب أنت ) تأثر فيني
وفي الفترة الأخيرة تفاقمت المشكلة عندي لدرجة أن أي مديح موجه أفسره زي ما أفسر العبارات
اللي فوق بين الأقواس
رغم قناعتي التامة أن هذا الشيء غلط في غلط

طبعا التأثير اللي يصير لي ( تشتت وعدم تركيز ) لدرجة أن ماعرف أذاكر
حرفيا ماعرف أذاكر ولا أحفظ أي شيء لين أواجه هالمشكلة
وطبعا حاليا أواجه هالمشكلة بطرق ثانية غير الشبة مثل الكتابة أو الجلوس مع نفسي لمدة
لين يخف هالتأثير

أعرف أسيطر على المشكلة بعد حدوثها ما أقدر أتخلص منها

أكثر شيء قاهرني أني غير مقتنع بشيء مع ذلك يؤثر فيني

شخصيتي بشكل عام ليست وسواسية ولا شكاكة أبدا أبدا عدا في هذي المسألة
أنا عندي يقين تام أن هالشيء سخيف جدا
لكن لا أعلم

هل هو وسواس قهري أم ماذا

ياليت تشووروون علي


تم تعديل العنوان ليتناسب مع المضمون