صباح الخير ☔️

باختصار ؛ كيف أتخلص من غيرتي على زوجي؟

اكتشفت إن عندي غيرة مرضية على زوجي ! ما أعرف صراحة إذا هي مرضية أو طبيعية لكنها متعبتني جدًا .

في أول سنتين من زواجي كانت غيرتي شبه معدومة . وكنت جدًا مرتاحة ومريحة دماغي ..
يمكن وصلت لدرجة البلادة 😂

كنت أمدح النساء أمام زوجي .. مثلاً بشهر العسل عادي أقوله واو شوف البنت اللي دخلت مررة حلوة 🙆 أو أوصف له النساء ماعندي أي مشكلة !
لدرجة مرة أمدح قريبته عنده انجن هو قاللي كيف تمدحينها لي ماتخافين أخطبها 😅
بس أنا يا جبل ما يهزك ريح !

طبعًا كنت عاادي جدًا يدخل عند النساء ولا يهمني الموضوع ..

الموضوع تطور شوي شوي لحد ما حسيت إني فعلاً أغار !

1- ما أبغاه يمدح وحدة قدامي .

2-أخاف بالغلط يشوف بنت أجمل مني ويقارن.

3- إذا شفت أخته الكبيرة مصورة سناب أبدا ألطم لأنها ما تشوف زين وتصور الحريم بدون ماتدري 😂 فـ أخاف يشوف زوجي وحدة حلوة !

4- كنت أحس أول ثلاث سنوات من زواجي إن زوجي مسستحيل يتزوج علي وجازمة ومو خايفة أصلاً ، الحين الفكرة ترعبني بشكل خيالي !

طبعًا هالأفكار فقط بيني وبين نفسي ماعمري أشركت زوجي فيها .


عشان أختصر الموضوع بقولكم مخاوفي بصراحة:

1- أخاف زوجي يشوف وحدة حلوة ويقارن بيني وبينها ويتمناها بدالي .
2- يشوف وحدة حلوة ويتزوجها وتعجبه أكثر مني ويحس إنه مخدوع فيني !
3- أنا أكررررره التنافس جدًا جدًا جدًا .. فـ هالموضوع مسبب لي أزمة لأني بكون دايمًا في تنافس مستمر مع شخص آخر ! أنا تعبت من دور إني أنا أحلى وحدة وأكشخ وحدة وأحسن وحدة .. لأني أصلاً مو كذا يا كثر الأحلى مني والأكشخ مني ! فـ صاير ببالي تنافس فظيع مع حبيبات زوجي الخياليات 😂
لدرجة إني بالعزيمة إذا تفرجت ع بنت حلوة أقول بيني وبين نفسي ايش بيسوي زوجي اذا شافها !!! يعني أول كنت استمتع جدًا بالمناسبات الحين ماغير تلاقط عويناتي على البنات أدور أحلاهم وأدعي يارب مايلمحها زوجي 😂



يعني هالأفكار جدًا متعبتي لدرجة أفتح النت وأبحث عن : أقارن بين زوجتي الأولى والثانية
حبيبتي أحلى من زوجتي
تزوجت حبيبتي وزوجتي الاولى ابتلشت فيها مدري وين أوديها 🙆
متخرفن مع زوجتي الثانية جدا وزوجتي الاولى بشعة


تخيلوا كذا أجلس أبحث ! وأقرا المشاكل وأنغث وأبكي وأحس إني أنا مسيكينة

أبغى أطلللع هالأفكار من رااااااسي نهائي .. من كثر ما قريت وسمعت من القصص السوداء صارت نظرتي سوداوية 😭

طبعًا كل هالأفكار زي ما قلت لكم ما عمري وصرحت فيها لزوجي . بس بيني وبين نفسي .


أنا مهتمة بنفسي أكثر من أول الزواج ، و ع كلام زوجي وشهادته .. يعني لما كنت ما أهتم كنت واثقة ومرتاااحة .
ولما صار عندي هوس اهتمام صرت خوافة وثقتي صفر ؟! إيش التفسير للي أمر فيه !
عمري 24 وشكلي مرة أصغر ومهتمة جدًا بشكلي .