كتبت موضوع قبل وبقول لكم عن المستجدات
رغم انو ترددت اكتب لان اصلا مافي حل لكن مدري يمكن فضفضة ابي اطلع الي بقلبي وارتاح
للي ماتابع موضوعي قبل سنه كشفت زوجي يخوني ولأنه خانني قبل كذا خيانه جسدية وفي بيتي
.. صارت احداث كثيره من ضمنها اقسم بالله انه مايكررها وان كررها وفكر فقط يعتبر انا طالق وانه بيكون واضح معي وجوالاته مفتوحه قدامي طول الوقت
مع الوقت بدا يخبي جوالاته واخلف وعده
المهم كشفته بداية رمضان بالصدفه
ورحت لبيت اهلي واخذت اغراضي
كانت النية تأديب ولكي اختبر تمسكه فيني
حاول يوم يومين ثالث يوم
انكر ان الرسايل له ويرسلي صور واثباتات انها ماهي له وان الايميل اخذه من واحد قلتله من متى اخذته قال ماذكر كثير ايميلات اخذت (يجمع ايميلات بسبب حساباته التجاريه)
ويحلف انا وقتها ارتحت وجدا انبسطت
وقال انو فيه وحده حاولت تجيه بإي طريقه
وراحت للمكتب له يقول لو ابي اخون كان خنتك بس بعدت عنها وحذرتها وجيتك للبيت مهموم ومتضايق واني وقتها حسيت فيه واسأله ليه....ماقالي وقتها
قلت ليه تضايقت! يقول منك لو قلتلك بتزعلين وتتهربين
وصراحه للان مستنكره ليه يتضايق!
المهم هاذي كانت تبيه يتزوجها بعد ماتطلقت
هي الوحيده بييين كل الي شفتهم عند زوجي اول ماكشفته في خيانته الاولى حتى الي مدخلها بيتي كل الي شفته ولا شي مع هاذي مانقهرت ومت قهرر كثر ماكنت اقرا محادثتهم
طبعا كانت كلام وسخ وكان زوجي يتكلم فيني يقول اني مسكينه مقابله جدران بنمشيها لما تسأله هي وين زوجتك
المهم لما حلف وبرد قلبي قررت اطلع معه
وقال خلينا نطلع لمطعم وارسلتله الي الان ترا مو مصدقه بتأكد
اذا فتحت ايميلك وشفت جوالك قال مسحت كل الرسايل اللي في الايميل وانا حمار يوم مسحتها مفروض وريتك
المهم يوم طلعنا مسكت جواله وكان رافض واصريت
ودخلت تويتر نفس حساب الايميل الي شفت الرسايل الوسخه فيه
وشفت تاريخ التنبيهات طبعا مسحها لكن الي يهم
بعرف من متى الايميل معه علشان اتأكد هو الي رسلها ولا
شفت الايميل معه من السنه الي راحت
والمحادثات الوسخه الي شفتها قبل شهرين
يعني تأكدت هو الي مرسلها
وسحب مني الجوال قالت انتي تبين مشاكل
قلت الي شفته مو شي بسيط انت تخوووني!! انا طالق اذا خنتني اثبتلي انك صادق ابي ارتاح
ومازال ينكر لكن بدون اي اثباتات يقول خلاص الي عندي ارسلته لك سناب قبل وخلاص قفلي الموضوع
بعدها قلت ودني البيت بشوف الايميل رفض
قلت تخوني وانا اتطلبك تثبتلي!
المهم رجعت لاهلي اتصل علي قالت بوديك البيت تشوفين الايميل مع انه فاضي مسحت كل شي فيه لكن بشرط تشيلين اغراضك كلها وتجين يبي يضمن بس ارجع ويروح يتحايل علي وانا اصدق ومن يغيب عني يبدا عقلي يستوعب واصحى ع غبائي كذا انا دائما اضعف قدامه
واصلا من شفته ومن اول مادخل علي مبين عليه انو مو يمي ماحسيت بإي مشاعر حب واشتياق
اول مادخل يقولي حبي راسي!!! رفضت وحب راسي وقالي افا ماتحبين راسي
و مهتم في شكله ومسوي مادري ايش في ذقنه وقاص شعره
حركات حسيت انو يخوني وقاعد يتيملح من وراي ( نفس حركاته قبل)
المهم تأكدت الايميل له الرسايل له يعني انا طالق
ونيتي من البداية علشان يحس ع نفسه اي غلطه منه تحسب طلاق بسبب حلفه
لكن كللل شي تغيرر
ماشفت منه اهتمام ماكمل يحاول اسبوع حتى
حذفته من الواتس والسناب وتويتر وكل مكان
ارسل لي رساله يقول اكتشفت عدم حبك لي وخلاص مراح افرض نفسي عليك
رغم اني احبك
وانو بيستخير والله يكتب الخير
واي شي اختاره هو الي بيصير وانه مايبي يفرض نفسه علي
وبيرسلي مصروف وكل فترة مع السواق وانه بيغيب فترة والخادمه بيرسل راتبها
ويقولي خلاص احذفيني في كل مكان ولاعاد تكلميني
ارسلتله انو لاجربت شعور الخيانه تعال تكلم و اني كنت احبك وصادقه بحبي ماكنت مثلك ادور غيرك
وانك طلقتني علشان وساخه مافكرت فيني حتى
وقلتله يخليني اسكن بالبيت علشان مصلحة اولادنا( عندي ثنين)
لانو عند اهلي ماقدر اربيهم زين
ويرسل لاولاده مصروف واني مراح. اخذ منه ولا ريال
ويخلص اوراق بسرعه(يعني يطلقني) لان ابي الضمان(مصروف لي)
احس ماصدق اقوله اسكن بالبيت يبي يروح يلعب او يتزوج ويضمن ويرتاح انو اولاده في بيته
ارسلي البيت لي والسواق عندك ويقول مو انا الي اخلي زوجتي تاخذ ضمان متى ماحتجتي اسحبي من البطاقة
طبعا مراح اخذ منه شي
كل شي احتجته الايام ذي دفعته من عندي
وانا فعلا بحاجة فلوس عندي مناسبات كثيره بس ماخذت منه ولا ريال
اثبت لي انه مو مهتم فيني وحسيت انو مايحبني
وحسيت انو مستعد يخسرني
زياده ع خيانته لي ..
الان اكثر شي يتعبني والله مو الطلاق مع الوقت بتعود
الي يتعبني لما افكر في خياناته في انه ممكن يخوني الان
في ان غيابه بسبب انو بيسافر يدرس(اربع شهور) كان يقولي اروح معه رغم انو كان رافض ويحاول يقنعني اني اجلس ويروح يدرس وحده وقتها حاسه انو في شيء.. وكنت مصره ارورح معه. كنت احس انو يبي يروح لوحده علشان ياخذ الوسخه الي كانت تلاحقه بكل مكان والي حسيت انو يحبها مادري مرات اقول لو يحبها كان تزوجها لانه يعرفها من قبل يتزوجني
ولان اصلا هي وسخه كلامها كله قلة ادب شلون يرضى رجل هاذي تكون ام عياله
ولانو اصلا محد جبره يتزوجني هو الي اختارني وهو الي اصر ع زواجه مني بعد رفض وتأجيل من اهلي اربع سنوات
لكن لما اشوف مرات كلامه عن الاشتياق وهجر الحبيب احس كذا
تفكيري في انه يتزوج ويعيش مع غيري ماقدر اتخلص من شعور الغيره والحب رغم خيانته لي
مادري كيف اوصف شعوري
مادري ماحس عندي استعداد ارجع اعيش معه لانه جرحني وابي اتطلق منه ابي انساه وامحيه من قلبي خياناته للان متعبتني وحطمتني نفسيا وكل شيء ماتغيب عن تفكيري لحظه
وفي نفس الوقت ماقدر اتخيل انه بيعيش مع وحده ويتزوج او يخون وياخذ راحته لاني مازلت احبه
اقدر انا اتزوج في فرص كثيره لي الحمدلله لكن علشان اولادي بعيش طول عمري عشانهم واحرم نفسي رغم اني متأكده بيجوني كثيرر لاني جميلة جدا ولسى عمري24 في فرص كثيرة لي
وهو في المقابل!!
الان مو حاسه بضغط وتعب كثر الي صار لي اول ماكشفته يخوني لما جلست عند اهلي وحدي ولدي لما يتعبني ويسهرني ومانام وهو يصيح كنت اصيح معه التعب والمسؤلية تخليني اتذكر حالي
الان
الخدامه مساعدتني كثير
ماحسيت بتعب ومسؤلية كبيره
لكن بعد ماتروح مافي احد بيعيني ويدعمني نفسيا لما اتعب واشيل همهم ومسؤليتهم وحدي وايامي كلها اطارد وراهم
التعب بيذكرني بتدمر نفسياً
احاول اغير من نفسي من الان بقوي نفسي برجع ثقتي بنفسي الي حطمها زوجي
الان ادور ع مراكز نفسية استشارية بس مارتحت لاي مركز ولا ادري وين اروح
للطبيب نفسي او اخصائي نفسي
احس اني احتاج كلهم علاج سلوكي نفسي مع دواء يساعدني ويغير تفكيري السلبي
ايش تنصحوني! ياليت تكون طبيبه او اخصائية

اعرف موضوعك الاول الله يعينك ويصبر قلب
عندي سؤال زوجك لازال متواصل مع الفتاة التي وجدتيها بشقتك معه؟

امين ربي يسعدك
لا ذيك ماتوقع تكررها وتتجراء تطلع مره ثانيه مع اي احد اتوقع تابت بعد ماكانت قريبه انها تنفضح وتنكشف قدام زوجها وعيالها وابلغ عليها الهيئة
لأنها انهارت وقتها ..

تعرفي ليش انتي نفسيتك كذا تعبانة لأنو باقي انتي مرتبطه فيه وعندك امل ان حياتكم تزين
بس زوجك لاهي مع غيرك وناسيك وهذه الشي الي متعبك زود

بس تدري لو تطلقتي وتشوفي بعينك ورقة الطلاق
ايش ممكن يجيك شعور الراحة والسعادة
وبتقولي بكيفة خلية يخون من اليوم لبكرة انا ماخسرت شي وهو الخسران وبجد بجد هو الخسران ماشاء الله ايش ناقصك انتي صغيرة وجميلة والف مين يتناك
انسي زوجك وخليه اخر همك
الطلاق احيانا يكون راحه وسعادة للأنسان
انا تطلقت ولي شهر الحمدلله والشكر مرتاحة وبالي مرتاح
وطليقي نسيت اسمه
وعارفه ان ربي مابيترك عبادة
لو كان الزوج ظالم صدقيني ان ربي بياخذ حقك منه عاجلاً ام اجلاً
بس رددي دائماً
( حسبي الله ونعم الوكيل & لاحول ولا قوة الابالله )

__________________

الله يعوضك ...والله لو يحبك وشاريك ماذلك عشان عاهرات..باعك وباع عياله عشانهم وش ترجين منه!!! احمدي ربك اللي خلصك من هالمستنقع قبل يجيب لك مرض يحرمك من عيالك ..عيشي حياتك بعيد عن هالبيئه الملوثه واحذفي رقمه وابدي من جديد..واذا تقدم لك رجل صالح حتى لو معدد توكلي على الله ولاتترددين بعد مايكبرو العيال شوي ويعتمدو على نفسهم..وهو بحريقه اعرس والا قزرها صياعه بكيفه ..الزم ماعليك اطفالك ونفسك ومستقبلك مع رجل يستاهلك

لاني احبه وماتخيل بحب احد غيره
انا لو تطلقت مراح اتزوج لاني ان فكرت بنحرم من اولادي
وثانيا ماحس اني بحب رجل ثاني غيره وماحس اني بلقى مثله
ماتخيل ماتقبل جدا احبه وحبه يتعبني
رغم ع خياناته
الا انه كويس معاي في اشياء كثير ومريحني في اشياء كثير ماتوقع في رجل بيعطي ومستعد يسعدني ويدفع لي اي شي اتمناه كثره
يسعدني مرات كثير ب اشياء مكلفة جدا
نسافر كثير سوا يحب يتمشى دايم معاي ويفضلني ع اصحابه
يشاركني اهتماماتي رغم انو مايحبها بس علشاني
ويحب اني دايم اكون معاه حتى مرات في شغله يقولي اجي معاه
لما اشوف كلام المتزوجات دايما وشكاويهم ماشوفها بزوجي
كل شي حلو فيه كلامه اسلوبه معاي رومانسيته طيبته معاه احس اني ملكه من كثر مايحسسني بكذا
لكن خياناته تحطم كل هاذي تخليني اعيش بتناقض

اخاف اني ضلمته بتفسيراتي للي يسويه
اخاف كل الي اكتبه وسوسه ومبالغه فيني وهو مو داري عنهم ولا فكر فيهم ( بالحب مو بالجنس)
يمكن الحين هو في مكه وانا قاعده افكر انو يخوني لانو كنا مخططين وحجز في رمضان نروح لمكه
دخلت حسابه الي كشفته يخوني فيه لقيت مسوي فيفرت لاشياء كثير تتكلم عن وضعنا حاليا
انو صار وحيد وفقد الي يحبهه اشياء كذا

يداريك ويعمل لك كذا
لأنوة يحس بتأنيب الظمير لما يخونك ولا مو عشان سواد عيونك
لو فعلاً يحبك ويداريك
كان اصلاً مافكر يخونك
اصحي وفيقي من غفلتك
تعرفي كنت زيك بالضبط
والله اقراء كلامك واتذكر نفسي اول
لأني احبة صرت اغفر لة زلاتة
وكنت فقط انظر لأيجابيات الي فية
والله ترى الخيانة شي كبيرررررر
الخيانة تترك اثر عمرة ماينمحي بقلبك
كيف بتعيشي باقي العمر مع واحد خانك ولا خانك في بيتك وانتي نفاس
يعني زوجك تاركك عندة بس تجيبي عيال
وبنات الهوة يتونس معهم
فكري بعقلك ولاتفكري بقلبك

وبعدين زوجك عرف نقطة ضعفك انتي واهلك
ماتبغو الطلاق وصار يلعب على كيفة
وهو عارف ردة فعلك بتزعلي يومين وبعدها ترضي
عزي نفسك انتي مابتضيعي عندك رب تدعيه
يعوضك احسن منه

__________________

كلامك وجعلي قلبي
فعلا انا كذا الله يشيل حبه من قلبي ويعوضني مادري كيف بعيش وحيده مع اطفالي ونظرات الي حولي مايدرو انو العيب فيه هوا الغلط منه
كل شي صعب علي
اذا جلست معه خياناته بتتعبني اذا تطلقت وحدتي وحبي له بتععبني ومستحييل اتزوج
واولادي بيعيشون بدون اب
يمكن لو شلت حبه من قلبي ومايصير يهمني بعيش حياة كويسه معاه
بيوفر لي كل شي احبه ويسعدني واطفالي معاي وعند ابوهم وهو يصير مايهمني
اهلي مايبغون الطلاق لانهم يشوفو حياتي معاه احسن من اني اتطلق واجلس عندهم باولادي
لانه موفر لي كل شيء ويقدر عكس اهلي يالله تكفيهم المصاريف والبيت
الحين مالي مكان عندهم انا واخوي ننام في غرفة وحده

يالله قريت مواضيعي اللي نزلتها هنا اول ماكشفته
الكل حذرني اني ارجع لكن رجعت وحملت وجبت طفل ثاني
اهلي حذروني ماستشرت احد الا نصحني ابعد لكن قلبي! قلبي الي دمرني
انا كيف اقوي قلبي كيف اكرههه