بقولكم شي

انا ليا اسبوع اجي اكتب هنا وامسح اللي كتبته
او افتح موضوع جديد واقفله

لاني ما اعرف ايش اكتب ولا من فين ابدأ
وبعد كم يوم عليا اختبار وراح الوقت وانا ماذاكرت .. اقضي الساعات اللي تنام فيها بنتي بكا

وكمان من الأسباب اللي تخليني استبعد الكتابه اضطراري للشرح والاسهاب علشان أوصل لكم اللي ابغاه
لكن بالله لا تكثروا عليا اسئله خاصه ولا تتكلموا بجرآءة .. كلموني بطريقة جدا راقيه بحيث ما أزعل من نفسي اني جالسه أناقش موضوع زي كذا مع ناس

انا زوجي اكبر مني يمكن بعشره او 12 سنه والله حتى عمره من لفة راسي والبكا والنكد نسيته بس هو نهاية الاربعين

هذي الفتره لما كبرت بنتي وصارت تنام اقضل من اول .. طبعا تبكي وهي نايمه بس بالنسبه ليا افضل من اول وفطمتها كمان وتنام اوقات 11 وتصحى وحده وأوقات 3 وتصحى الظهر وأوقات الفجر وتصحى الظهر ع حسب مالها نظام ثابت لكن انا اذا رحت بيتي عند زوجي ااخر غفوتها للساعه 11 او 12 او اوقات احاول انيمها وحده ع الأقل لو اجلس ساعه معاه

لاحظت من شهور انه بس يدقق ع نومها وانه يبغاها تنام من عشره بالليل وتصحى الصباح
طبعا نظامه هذا ما اقدر انا اسويه لانه ايش اسوي اصحى الصباح وانام بالليل ولا دوام ولا هم يحزنون ويومين عنده ويومين عند امي
مع تدقيقه ع وقت نومها صار مثلا اذا نامت الساعه وحده يمسك الايباد يفتح مسلسل وهو عنده دوام لكن علشان لما تجي الساعه 2 يقول مافي وقت ويلومني ع نوم بنتي وينام
وتكررت تصرفاته الغريبه بإستبعادي عنه
مرا يقول شكلها بتقوم علينا ! طيب اذا قامت واحنا بوضع مدري ايش ايش نسوي ؟
كنت اقوله عادي انيمها وارجعلك يقول تعكري مزاجي انا ما أحب الازعاج انا اتجاهي واحد

تكررت المواقف اللي يصدني فيها بطريقه تجرح
مع الايام صار حتى قربي منه مايبغاه
مرا قال لي مو لازم تلبسي لبسك هذا البيت .. !! يقول احتشمي وهو اللي كان يختار لي اللبس اللي مواصفاته كذا وكذا علشان البسه له بالبيت !

جيته بمزح أتقرب له
وجيته بزعل
وطلبته انه يكون قريب مني واني احتاجه
جيته بوقت الهدوء
جيته بكل الأوقات وبكل الطرق علشان اعرف أسباب صده المفاجيء
زمان كان يقول صرفي بنتك وكنا نحطها عند اهلي كم ساعه
كان يقول لي الكلام اللي أحب اسمعه منه
بس الان تغير
يعني معاملته ليا برا البيت وبالتمشيات وبالفلوس عادي بس حياتنا الخاصه تكاد تكون معدومه هذي الشهور

مرا بالشهر وهالمره تكون ناقصه بس ما احسسه بشي ابدا بالعكس ابين له قد ايش انا احبه ومبسوطه لما اكون معاه وانا عند ربي صادقه هذا الشي ما يفوق معايا

حياتي معاه بين وبين لكن مستقره
وبعد كل فتره انهار وابكي وأقوله انت ماتحبني ويحلف انه يحبني

نسيت اقولكم انه طول هذي الفتره يدقني بالكلام كل ساعه تقريبا يقول انتي ماتسمعي كلامي ماتنومي بنتك
ومرا قال لي انا أحب انا اللي اكون رايق واجي لك ومرا يقول انتي ليش ماتجيني
جنني شككني بنفسي
لكن جاني احساس كبير هذي الفتره انه خلاص وصل لمرحلة مدري ايش يعني اللي انه في اشياء مايساعده سنه عليها

رغم انه رياضي ومهتم بصحته مرا لكن إحساسي قوي تجاه ترجيح هذا الشي

يعني اقرب منه يجمد نفسه او يسكتني بطريقه تكسرني من الداخل اصعب شي إحساسي اني ماني مرغوبه ..
حتى كلام اقوله يلا قبل تنام قول لي كلمتين حلوه وبروح اذاكر يقول ماعندي كلام اقوله
قلت له انت تكرهني ؟
قال لو اكرهك ما خليتك عندي لكن انا اكره عنادك
يقول ليش بنتك ما تنام عشره
طيب ليه هو لازم عشره ؟
اصلن هو ايام الدوامات ينام 2
وأيام الخميس والجمعه يتعمد يدخل ينام اذا حس انه بنته بتنام
اوقات يدخل مايقول تصبحي ع الخير الظاهر يخاف اقوله طيب كذا حاف
؟
صار نقاش امس قبل ينام وقبل امس كلها اجيه وأكون عنده ساعه الا ربع هو ساكت وانا مرا ابكي ومرا اقوله طيب ليه ماصرت تشتاق لي ومرا اقوله ما راح أسامحك على إهانتك لمشاعري بهذي الطريقه

مرا كنت نايمه وانا احس فيه لما يدخل جا ومسح بيده على راسي انا من كثر ماهو بعيد عني هالفتره نزلت دموعي وفتحت عيوني ولا كنت بسوي نفسي نايمه لما بكيت فتحت وطليت فيه قلت يمكن ندم وبيرجع لي زي اول .. باس راسي ونام


قبل شوي قبل ينام جيته وكان بارد وجامد تكلمنا ونفس الموضوع نيمي بنتك بدري وانتي ما تسمعي الكلام لما بكيت وقلت وربي حرام تسوي فيني كذا عاملني بلطف ع الأقل قال بطلي دلع وبكا وقومي ذاكري قلت له وربي اني اروح عند امي وماعاد تشوفني وبنتي عندي دليل يخليني اخليها عندي وانت خليك مع ال... حقتك .. ع أساس اني أشك فيه وأخذت شنطه بلم ملابسي ورجت ابكي ساعتين وادعي مرا انه ربي يصلحه مرا اقوله يا رب بس استغفر الله ادعي عليه
لكن توصلت بالنهايه انه ممكن يكون خلاص دخل مرحلة الضعف ...


مدري كلامي صح ولا لا علميا ؟
وكمان بحثت بالنت انه كيف اتعامل معاه من الان وصاعدا اذا افترضنا انه شكي بمكانه !

طيب خلاص انا ما يهني والله عجزه راضيه فيه وأساسا هو مايقصر بكل النواحي الماديه والترفيهية وهذا مهم بالنسبه لي .. لكن كيف اتعامل معاه ب اسلوب يثبت له اني ابغاه هو لشخصه مو لشي ثاني .. واني ابغى قربه بس علشان اخذ حنان ونكون قريبين لبعض مو لهدف ثاني ؟

والله انا صادقه جدا اني ابغاه يفهم اللي بقلبي اني ابغاه يتعامل معايا كويس ويهتم فيني ويقول مني فقط بدون اللي بباله ؟
مو سهل اني أوصل له هذي الفكره لاني مدلعته من زمان ويعرفني معاه ..

طيب هل لو كان كلامي وشكي بمكانه هل هذا شي مؤقت ولا دائم ؟
يعني مستحيل يمر يوم يكون كويس فيه ؟


ياجماعه وربي تعبت وانا اكتب ولا كتبت شي من اللي ببالي لكن أتمنى الفكره وصلت
يعني كلموني عن نفسية الرجل بهذي المرحلة ايش يحتاج ؟
وهل صدقا انه ممكن يكون دخل هالمرحله او ممكن تكون حاله عارضه ؟
وهل الحاله العارضة تستمر شهور ؟
طيب عادي أصارحه بكلامي هذا وأقوله اني مايهمني شي ولا ماراح يعترف بهذا الشي ؟
حبوب منع الحمل اخذها ع الفاضي لو اتركها يمكن اكون اهدى من كذا ؟

انا تعبت من اسلوب الإسقاط اللي يعاملني فيه
وتعبت وانا اكتب

وربي محرجه وانا اكتب لكن انا بمشكله كبيره

‎‏ المستجدات 31
http://www.66n.com/forums/showpost.p...3&postcount=31

المستجدات 43
http://www.66n.com/forums/showpost.p...1&postcount=43

تم تعديل العنوان ليتناسب مع المضمون

__________________