اشياء بداخلي ماتت
السلام عليكم ورحمة الله وبركاته
يمكن الموضوع مجرد فضفضه اكثر من كونه ايجاد حل ..
في اشياء بداخلي افتقدها .. انكسرت واندفنت .. اتمنى من كل قلببببي انها ترجع .. فعلا احس بقهر بداخلي لان انكسرت من بعد زواجي الأول وندمانه على انكسارها ..
احاول الان اني استرجعها بس مو قااادره احس بإرهاق بداخلي .. احس في شي ميت احاول ارجع احييه من جديد بس مافي فايده ..
كنت قبل زواجي الأول .. وحده فنانه في مجال الرسم بالفحم والزيت من صغري وانا هذه هوايتي وكنت الاقي تشجييع من معلماتي وكنت دايما اسمع منهم : راح يكون لكي مستقبل جمييل في الرسم والفنون ..
والقى المديح من صديقاتي واخواتي واهلي والاعجاب .. .. وكانت لوحاتي يأخذوها في المدارس وتتعلق على جدرانها .. والبعض اوديها لمعارض ..
بمجرد زواجي الأول بدأت هذه الهوايه تمووووت وتختفي كنت اطلب منه اني اروح واشتري عدة الرسم عشان امارس هواياتي فكان عندي وقت فراغ كبيييير .. لكن كان يرفض ويتريق ويشوف انه كلام فاضي .. كنت اطلب اروح لمعاهد عشان اصقل هوايتي وانميا وايضا كنت اشوف التريقه والاحباط منه . وامتنعت عن الممارسه لانه ماكانت عندي اي شي يخص الرسم في بيتي .. وشويه شويه بدأت تموت هذه الهوايه .. كانت عندي ايضا هواية كتابة الخواطر والروايات الطويله وكنت انبسط واتفنن في التعبير والكتابه بإسلوب جيد وكنت اشوف المديح والثناء عليها .. وحبه حبه ماتت هذه الهوايه ولا استطيع الان كتابة لو قصه قصيره ..
كان عندي حب التجاره من صغري وكنت اتمنى ان انميها .. وبعد زواجي بدأت في تجارتي الصغيره وكان طليقي من المشجعيين لي في البدايه .. وربي فتحها عليا ولله الحمد وشفت الخير الكثير منها واحلى من ذا كنت امارسها بحب وفررح وطموح .. شويه شويه بدأ يتريق ويقول بطلي هذه الخربيط لو تحتاجي فلوس انا اديكي .. ( وكان هدفي فقط قبل المال ان اشغل نفسي وانمي حبي للتجاره ) وكنت اتفشل كثييرا مع زبائني بسببه .. تصل الشحنه وتجلس بالأيام ومايجيبها ليا ويقول مو لازم بطلي مافيا تعبتني .. والقى السب والشتائم من الزبائن بسبب تأخير الشحنه وعدم وصولها في الوقت وهذا كان يضايقني كانو اخواته يجو وياخذو من طلبيات الناس ويمشو زي الي بيقولو هذا من مال اخونا ( ومايعرفو انه كل قطعه من مالي الخاص ) ..
كنت اطلب مساعدة بابا ربي يحفظه .. وماكان يقصر بس عنده مسؤوليات وفما كنت اطلب منه دائما ..
حبه حبه شعرت بإحباط وفشله مع الزبائن واني ما اقدر البي احتياجاتهم بسبب كوني امرأه فكنت احتاج رجل يساعدني في احضار الطلبيات من شركات الشحن وكذا .. وتركت التجاره بسببه وعدم مساعدته لي .. رغم انه كان من المشجعين لي في البدايه ..
كنت احب ارجع احيانا لطفولتي وانبسط فيها واطلب منه هذا وكان يضحك ويقول اعقلي وكوني حرمه .. الين انقتلت فيني ..
الأن بعد زواجي من رجل اخر .. يشجعني ويقولي لازم ترجعي هواية الرسم وانا مستعد اجيبلك كل شي تحتاجيه وماقصر راح وجابلي كل شي .. في داخلي عندي حب اني ارجع زي زمان لكن في الواقع المي بداخلي مكسور احاول واحاول بس الاحباط متعبني الرغبه القويه الي كانت زمان والحب بالرسم وكنت ارسم بإحساس كبييير كلو رااااح ..
وعشان خاطره حاولت ورسمت وكانت اول رسمه ليا بعد محاولة الرجوع للرسم وشفت الاعجاب من زوجي بشكل مو طبيعي ومن الناس .. لكن هي وحده وبعدها ماقدرت ان ابدع او ارسم شي جميل ولا اعرف كيف اصلا ..
لكن بعدها سرت احس بإحباط ومادري كيف ارجع الرغبه القويه والحب الي كانت زمان كنت امارس هواياتي بحب كبيير .. الان جميع ماتعلمته تبخر ورااح ..
والتجاره طلب انه يديني مبلغ من المال ابدأ فيه زي زمان ( رغم انه زمان بدأ من مالي الخاص )
ولكن في احباط ويأس بداخلي رغم ثقتي بحبي للتجاره .. لكن مو حابه ابدأ واجازف بالمبلغ قبل ترجع العزيمه والحب الي كان في زمان ..
هل احتاج لطبيبه نفسيه ؟؟ هل هي تراكمات الماضي سيرطت علي ؟؟
افتقد نفسي زمااااان ..
__________________
لاتسعى لتصحيح ظن احد بك ££ خالقك ينظر لقلبك وهذا يكفيك
التعديل الأخير تم بواسطة ويبقى الحنين ; 14-03-2017 الساعة 12:55 PM
14-03-2017, 09:59 AM
ضوابط المشاركة
العرض الشجري