السلام عليكم ورحمة الله وبركاته ..

قبل ادخل بالموضوع حابه اوضح بعض النقاط المهمه عشان توضح الموضوع اكثر ..
قبل سنتين ( بالتحديد وقت طلاقي وجلوسي عند اهلي ) كانت في مشاكل كثيره وكبيره بين
امي وبابا لدرجة كانت حتول بينهم للانفصال ( والمشاكل كان فيها سمعه ) .. لكن تدخلنا انا واختي الكبيره بالموضوع ودخلنا خوالي بالموضوع وتم حل الموضوع وعدم الطلاق ( لا اعتبر ان المشاكل الي بينهم حلت ولكن احس كأنها بركان خاااامد الى الان وممكن ينفجر بأي لحظه )
انتهت فترة المشاكل وهدء الوضع شويه ..
لكن الي حصل في وقت هدي المشاكل .. امي الله يهديها دخلت زوج اختي بهذه المشاكل
بتقولو كيف ؟ : هي اتصلت عليه وقالتله يجي البيت ضروري ولما جا وهو مفجوع من صوتها قامت قدامه وقدام بابا جلست تتكلم عن حياتها مع بابا وانها مو طايقه العيشه وانها عملت وعملت وهو ماعمل شي بالحياه ووووو يعني طلعت كل شي حق 27 سنه ..
وزوجها حاول يهدي الوضوع وهو كان خجلان لان الامور الي انذكرت كانت اشياء خاصه .. وبابا ماتحمل كلامها وقامو هي وهو كلام وخصام وسب ووجابو مشاكل حياتهم كلها وو قدام زوج اختي ..

بعد تدخل خوالي وبعد ماهدء الموضوع ماما زعلت من زوج اختي وتقول ليش يتدخل بمشاكلنا الخاصه ودحين يعلم امه واخواته ( لانهم قرايب لنا ) وقامت مشاكل بينها وبين زوج اختي وصارو مايتكلمو مع بعض (رغم انه زمان.. مررررا كانو مع بعض زيارات وكل يوم يجي لأهلي وهدايا ومطاعم وخرجات يعني مدلع ماما ع الآآآآآآخر ) وبعد المشاكل بعدو وكل واحد نفر من الثاني والموضوع دخل بين اختي وزوجها وصارت مشاكل هو يتكلم عن اهلي قدامها وهي ماترضى والشيطان يكبر بينهم المشاكل ..

رغم مرور سنتين لكن الى الان ماما مو طايقه زوج اختي وهو مو طايقها وصارو بعيدين عن بعض وخفف زيارات لأهلي وماصارو بيخرجو وعلاقة اختي بزوجها متذبذبه جدددا بسبب مشاكل اهلي .. وكل ماجات اختي ماما تدعي على زوجها انه هو سبب المصايب والمشاكل وتدعي عليه انه يروح من حياتنا واختي تطالع فيا واحسها ودها تبكي بس تسكت وماتتكلم ..


الان بعد زواجي حصلت مشكله بين ماما وبابا ..
وماما حبيبتي ربي يهدييييها دخلت زوجي بالموضوع واوقات بتتخاصم مع بابا قدام زوجي
وتشكي لزوجي وتقوله اقنع عمك قول لعمك يعمل كذا وكذا وزوجي مايقصر يحاول حل المشاكل بينهم وربي انها بطيبة نفس منه وعلى نياته ..
وانا وزوجي مررا ماشاء الله مدلعين امي الله يحفظها اخر دلع دايما بنخرجها ونجيبلها هدايا ونعملها حفله بكل مناسبه وسفر وو وهو دايما يقولي انا مرررا اعشششق اهلك كللللهم ..
وسبحان الله هو الي دااايما يقولي يلا نروح لأهلك .. تقريبا في الاسبوع 3 او 4 مرات نروحلهم ويكون بطلبه .. مرا ينبسط مع ماما وبابا ..
لكن الان بدأ يدخلونه بالمشاكل الخاصه .. وانا مرررا خااايفه انه يحصل مثل ما حصل مع زوج اختي .. خاصتا انه زوج اختي راح وقال لزوجي كللللل شي حصل زمان ونشر غسيل اهلي من باب الفضفضه وقاله بالحرف الواحد لولا الاولاد الي بيني وبين زوجتي كان طلقتها

وزوجي قالي الكلام الي صار بس انا ماقلت لاهلي ولا لاختي عشان ماتحصل مشكله ..
بس قلت بنفسي طالما قال لزوجي اكيد قال لاهله ..

الان نفسي اخلي زوجي يبعد عن المشاكل الخاصه الي بين اهلي .. بس كيف اقوله وابين له ما ابغى احسسه انه ترا ممكن تتطور مع المشاكل وممكن تكبر وتصير بيننا .. ومرا متضايقه من طريقة امي انها تدخل ازواجنا بالمشاكل .. اخاف مع الوقت تكون الحاجات دي ضدنا انا و اختي ..

كييف ابعده عن المشاكل ؟؟؟؟؟؟
وماما كل يوم بتتصل وتشكيله او لما نروحلها بتتكلم عن بابا بكلام والله انا يجرحني وقدام بابا وربي احس وقتها اني حأبكي من الكلام .. وانكسف من زوجي ( ما اقدر اذكر الكلام هنا )
.. بس بابا يسكت عشان زوجي موجود

ماابغى علاقة زوجي بأهلي تخرب ابغاهم مثل الان يحبو بعض ..

__________________
لاتسعى لتصحيح ظن احد بك ££ خالقك ينظر لقلبك وهذا يكفيك