خطيبتي ...........وخطيبتي .............!!
يمكن تستغربوا من عنوان الموضوع لكن مفيش استغراب ولا حاجة
خطيبتي :
- لما بروحلها بكون في منتهى السعادة عشان رايح لها
-أول ما بوصل عند البيت بلاقيها واقفة في البلكونه مستنياني
- أطلع ألاقيها بتفتح لي الباب ووجهها طاير من السعادة
-أدخل فتاخدني وتجلسنى وتؤنسني وترحب بيا
- تسأل عن أحوالي وأنا أسأل عن أحوالها
- أقولها وحشاني تقوللي وانت كمان وحشتني أكتر
- تقعد تتكلم معايا وأنا أتكلم معاها وتبقى مبسوطة جدا من كلامي
- لما آجي أمشي تقوللي لا متمشيش خليك قاعد شوية كمان
-ولما أمشي توصلني لحد الباب وتسلم عليا
-ولما أنزل تنظر لى من البلكونه وتشاور لي مع السلامة لغاية ما أترك الشارع وأمشي .
- ولما أمشي بدعي ربنا إن الأسبوع يجري بسرعة عشان أشوفها تاني
أما خطيبتي :
- لما بروحلها ببقى بدعي ربنا إنها تكون مبسوطة وفرحانه
- لما بوصل لحد البيت لا أجدها واقفة مستنياني في البلكونة لما آجي
- أطلع أمها تفتحلي أو أختها ونادر أوي لما هي اللي تفتح لي
- ساعات أدخل وألاقيها مبسوطة وفرحانة وساعات ساكته ولا تتكلم
- أدخل فتجلس أمامي وليس بجانبي ولا تتكلم إلا حين أتكلم أنا
- حين أقول لها وحشتيني أو أي كلمة حلوة ترد تقول ( شكرا - طيب - ماشي )
- تقعد وساعات لما آجي أتكلم معاها ساعات ترد بكلام كويس وساعات تسكت ولا ترد ولو ردت ترد برد ( بايخ )
- لما آجي أمشي لا تمسك فيا وتقوللي خليك شوية كمان ( ولو حتى مجاملة )
-ولما آجي أمشي أمها تدفعها عشان تروح توصلني لحد الباب
- ولما أنزل ببص على البلكونة ونادر جدا أما ألاقيها واقفة وبتبص لي وتشاور بـ مع السلامة
- ولما أمشي إما أكون مبسوط وده قليل أو أكون مهموم ومحبط من تصرفاتها وكلامها وأحوالها المتقلبة معايا .
طبعا أنتم جايز تفتكروا إني خاطب اتنين ........ 
لا والله أنا خاطب واحده بس
لكن الصفات الأولي كانت لخطيبتي كما أتمنى أن أراها ......
أما الصفات الثانية هي لخطيبتي كما أراها الآن !!!
أنا كنت كتبت موضوعي ( أصبت بالإحباط الشديد .. وأبكي لحالي ) منذ عدة أيام وجاءتني الردود تؤكد أنني كنت مخطئ لأني وجدت أنني السبب فيما وصلت إليه خطيبتي من أحوال غريبة معي ..فأنا خليتها تشعر باهتمام بالغ وزائد جدا عن حده بكل الأشكال والصور ..
فما كان منها إلا أنها أصبحت ( تتدلل وتدلع عليا وتعطيني حبها واهتمامها بالقطرة )
فاضطررت أن أصلح من أحوالي معها حتى تتغير
عارفين .. أنا كنت معاها النهاردة وخرجنا سوا وصارحتها بما يضايقنى وفي وسط الكلام قولت لها إني خاطب واحدة تانية أحوالها معايا كذا وكذا وكذا .. زي ماشرحت لكم في البداية
طبعا هي ذكية وفهمت إني قصدى عليها طبعا وقعدت تضحك وتقول ( أنت قصدك عليا إني أنا مبعملش معاك كده ...صح ؟؟؟؟)
فقلت لها ليه متبقيش كده معايا أنا عايزك كده زي ما بتمنى ..
فتقولي أنا مبعرفش أعمل كده ( مع إن الحاجات اللي أنا بتمناها دي يا جماعة عملتها بس مش كلها في وقت واحد لكن متقطعة وعلى مرات أثناء زياراتي لها منذ خطبتها من 7 أشهر )
طبعا خلال المقابلة تصافينا ولكن طلبت منها إنها تتغير وتصبح كما أتمنى ولكنها قالت لي إن شخصيتها غير كده ولا تستطيع القيام بذلك ولم تعدنى بأنها ستتغير إلى ما اتمناه .......
فكيف أغيرها بالله عليكم إلى ما أتمناه ؟؟؟
أنا نفسي تبقى أحوال خطيبتي معايا بالصفات الأولى
فاقترحوا عليا وقولوا لي إزاي وكيف أجعلها بالصفات والأحوال التي أتمناها فيها
ولكم جزيل الشكر
أخوكم / تيـــــــــــــــتو
23-07-2005, 01:41 AM
ضوابط المشاركة
العرض الشجري