[COLOR=Magenta]كعادة بنات حواء، ويمكن مش عادة بس.. دي عادة وهواية كمان، دايما العروسة بيسرقها الوقت وفجأة تلاقي وراها مليون ألف حاجة تعملها وتبدأ تشد في شعرها، ودماغها تفضل تلف وتدور، وده طبعا بيسبب لها قلق وتوتر وعصبية.. وترجع تلوم نفسها وتقول "بس لو كنت عملت حساب الوقت وبدأت أستعد من بدري شوية"....

علشان كده... علشان ما يجيش اليوم اللي تندمي فيه على الوقت... جهزنا لك ملف كامل وهنكون معاك فيه خطوة بخطوة... هنتكلم على كل شيء ممكن يهمك من يوم تحديد ميعاد الفرح لغاية ما تسلمي على آخر فرد من المعازيم.

اتبعي خطة 2،4،6
دي الخطة الدفاعية اللي هتتبعيها علشان تدافعي عن نفسك ضد الوقت اللي بيمر أسرع من الخيال والخطة دي بتتقسم على 3 مراحل أساسية:

• مرحلة الـ6 شهور اللي قبل الفرح.
• مرحلة الـ4 شهور اللي قبل الفرح.
• مرحلة الشهرين اللي قبل الفرح.
باقي من الزمن 6 شهور

ما تفتكريش إني بابالغ لما أقول لك إن ده يادوب هو الوقت المناسب اللي لازم تبدئي فيه الاستعداد ليوم زفافك.. الميعاد مش بعيد زي ما إنتِ متخيلة هو بس بيدّيكِ الفرصة إنك تتحركي براحتك من غير قلق... والمفروض في الفترة دي إنك تهتمي بالآتي:

1. طبعًا هتكوني حددتِ مع العريس ميعاد الفرح وبالتالي لازم تقعدوا مع بعض، وتتفقوا على ميزانية الفرح وتبدءوا في تحديد مكانه وياريت لو تحجزوا القاعة على طول لأن زي ما إنتِ عارفة إن ما شاء الله مفيش أكتر من الأفراح في بلدنا واهو يبقى هم وانزاح...

2. طبعا لما تيجي تحجزي القاعة خلّي بالك إنك لازم تكوني حاجزة قاعة تكفي 30 شخص زيادة عن عدد المدعوين وده لأنه دايمًا فيه ناس بنفتكرهم في آخر لحظة علشان كده حاولي تدّي نفسك براح في المساحة...

. وعلشان ما تنسيش حد من المعازيم علّقي ورقة في مكان واضح في غرفتك واكتبي عليها أسماء المعزومين وكل ما تفتكري حد ضيفيه فورًا واطلبي من العريس إنه يقوم بنفس العملية...

4. خلّي بالك لو اخترتِ مكان مفتوح لإقامة الفرح ما تنسيش إن فرحك لسه فاضل عليه 6 شهور فلازم تتأكدي إذا كان الجو ساعتها هيكون مناسب ولاّ لأ...

5. ابدئي في تصميم فستان الزفاف من الآن.. وما تعتمديش على ذوقك بس في الاختيار.. استشيري من حولك ولا تستعجلي في الاختيار.. خدي وقتك على الآخر ولو هتفصلي الفستان يبقى لازم تعملي حركة لئيمة شوية وهو إنك تقولي للمصمم أو المصممة ميعاد مبكر عن ميعاد زفافك الأصلي بأسبوعين على الأقل وده لأن معظم المصممين مش بيكونوا منضبطين في مواعيدهم.
.6. خلي بالك إن الفستان لازم يكون مناسب لقوامك يعني يظهر جماله ويخبي عيوبه... وأحسن الموديلات اللي بتليق على أي جسم هو البرنسيس وهو الشكل التقليدي للفساتين..

.باقي من الزمن 4 شهور

مرحلة التجريب بحق.. ابدئي جربي في نفسك كل اللي نفسك فيه يعني عايزة تقصي شعرك.. تغيري لونه... اللي إنت عايزاه. جربي زي ما إنت عايزة لأن الأربع شهور هيكونوا وقت كافي إنك تصلحي أي خسائر نتيجة تجاربك... بس خلي بالك برضه جربي بعقل ولازم تهتمي في الفترة دي بالآتي:

1. اتباع نظام غذائي سليم يعتمد على الإكثار من المياه والخضروات وده لأن الخضار والمياه بيساعدوا على نضارة البشرة بشكل كبير جدا وبيمدوا الجسم بالطاقة الكافية.. وفي الحلقة القادمة إن شاء الله هيكون معانا نظام ريجيم متين وعدتنا بيه زميلتنا إيمان البداوي وهي شخصيا بتطمنك إنك هتلحقي تعمليه وفي شهر واحد بس كمان.

2. الاتفاق مع كوافير مناسب ليكِ وبدء عمل نظام تجميلي للبشرة وفي الفترة دي لازم يعتمد الكوافير على تنظيف البشرة وتنقيتها وعمل الماسكات المغذية.. وحمامات البخار.

3. ابدئي الاهتمام بشعرك من الآن.. اعملي حمامات كريم بشكل منتظم وطبعًا يكون حمام مناسب لشعرك..

4. الاهتمام بالأظافر شيء مهم جدا وكتير منا بينسوه... اهتمي بتقليم الأظافر... وبردها بالمبرد الخشبي يدل المعدني لأن المعدن بيكون مؤذي جدًا للأظافر وابرديها بالشكل اللي يناسبها.. واهتمي بوضع الكريمات المرطبة والمقوية.

5. ياريت في الفترة دي تتوقفي تماما عن وضع الماكياج على بشرتك.. واديها فرصة للتنفس والتهوية بعيدًا عن الماكياج وإثارة السلبية عليها.

6. ياريت كل يوم على قد ما تقدري قبل النوم إنك تغطي جسمك بطبقة من الكريم المغذي وما تنسيش معالجة القدمين والكوعين من التقشفات وده احنا اتكلمنا عنه في "نيولوك شتوي".

7. لا تنسي في هذه الفترة عمل بروفات مستمرة على فستان الزفاف والزن على المصممة للانتهاء منه..

8. تأكدي إنه مفيش حاجة ناقصة تقريبًا في شقة الزوجية وخلي بالك فيه حاجات بسيطة ساعات الواحد بيفاجأ إنه محتاجها ومش بيلاقيها زي مثلاً "مقص، إبرة وخيط بألوان مختلفة، عدة كهرباء بسيطة، مفتاح الأنبوبة، سبت غسيل... إلخ" وعلشان ما تنسيش حاجة من الحاجات دي هاتِ ورقة وقلم ولفي في بيت الأسرة واكتبي كل حاجة ممكن تكون ناقصة عندك بس المهم ما تنسيش تجيبيها....

9. فيه بقى مشكلة جامدة جدًا ما ينفعش تتجاهليها أو تعملي نفسك مش واخدة بالك منها وهي رائحة الفم الكريهة.. دي مشكلة لازم تلحقي تتخلصي منها قبل الزفاف بوقت كاف..





رائحة الفم الكريهة مشكلة كبيرة تجعلك محرجة دائمًا من مواجهة الناس فتلجئين لمضغ اللبان أو النعناع أو بوضع القرنفل في فمك بصورة مستمرة وفي أحيان كثيرة تضعين يدك على فمك أثناء الحديث؛ خوفا من هروب الناس وحتى أقربهم منك...

ولكن يا عروسة لا داعي للقلق...فانا افكر في جميع المشاكل التي قد تؤرقك ومعى دائما الحلول البسيطة السهلة التي تعيد لك ابتسامتك الجميلة وتجعل أنفاسك عطرة كرائحة الورد.

في البداية لازم تتعرفي على أسباب هذه الرائحة وبمدة كافية –حوالى 3 شهور- قبل موعد الزفاف...

ومن أسباب هذه الرائحة:

• أمراض الأنف والأذن والحنجرة.
• مشاكل الجهاز الهضمي مثل عسر الهضم، وبعض مشاكل الكبد.
• سوء التغذية ممكن يكون من الأسباب المهمة وخصوصًا لو كنتِ تتبعين نظاما غذائيا صارما لأن خلو المعدة من الطعام من أحد الأسباب التي تؤدي لهذه الرائحة.
• هناك أسباب أيضًا متعلقة بالفم مثل التهاب اللثة والترسيبات الجيرية وعدم الاهتمام بالأسنان وتركها فريسة للتسوس....
• انتبهى جيدا فربما تكون هذه الرائحة ترجع للتدخين وشرب القهوة.

أكيد أصابتك حالة من الذهول و"الخضة" من الأسباب السابقة ولكن لا تنزعجي و"بلاش تتخضي" فكل داء وله دواء وكل مشكلة هتلاقي لها علاج إن شاء الله.


• أولاً بلاش تتوتري واعرفي السبب الحقيقي من الأسباب السابقة اللي إنت فعلاً بتعاني منها.. واذهبي فورًا إلى الطبيب..
• من النهارده اهتمي بالانتظام في استخدام الفرشاة والمعجون بعد تناول الطعام مباشرة.
• تنظيف اللسان شيء مهم جدًا أيضًا وذلك لإزالة ما يكون قد علق به من فضلات باستخدام فرشاة الأسنان أو قطعة من الشاش الطبي واستخدام مضمضة مطهرة.
• الابتعاد عن التدخين فهذا لا يغير لون الأسنان فقط، بل إن الدخان يعلق بشعرك وبملابسك ويشوه جمال أسنانك ويجعلها داكنة اللون.
• جربي بعض الوصفات الطبيعية المجربة فدائمًا عند كل مشكلة تجدين صيدلية الطبيعة في خدمتك....


هناك طرق سهلة وطبيعية وتجعل رائحة فمك جميلة........

• غسول العسل والليمون للتخلص من الرائحة على طول:


المكونات:

ليمونة.
عسل نحل.
ماء دافئ.

الطريقة:

تعصر ليمونة كاملة ويضاف عصيرها لنصف كوب من الماء الدافئ ويضاف إليهما ملعقة كبيرة من عسل النحل وتمزج جيدا ويغسل الفم بهذا الغسول عدة مرات في اليوم.

• أوراق الجزر والعطر المنتظر..




المطلوب:

أوراق الجزر "هي العروش الملتصقة بالجزر".
نصف لتر ماء.

الطريقة:

نأخذ بعض العروش الطازجة والمغسولة جيدا ثم نغمره في نصف لتر من الماء ويوضع على نار هادئة وتترك لتغلى مدة من 5 إلى 10 دقائق ثم تغطى بعد رفعها من على النار وتترك نصف ساعة حتى تبرد ثم تصفى ويستخدم الماء كغسول للفم على شكل غرغرة عدة مرات في اليوم.

• غرغرة شاي البردقوش.. الرائحة ما تهمهوش:

المطلوب:

عشب البردقوش "موجود عند العطار".
نصف كوب ماء مغلي.

الطريقة:
من المعروف أن البردقوش من الأعشاب طيبة الرائحة فإن شراب نصف كوب من مغلي البردقوش وكذلك الغرغرة بالنصف الآخر يحسنان رائحة الفم كثيرًا.

*لبان الدكر ونهاية الضجر:

مضغ لبان الدكر يقوي الأسنان ويحسن أداء اللثة ويعطر الفم واللسان عمومًا ويطيب رائحة الفم.

*نبات الكبة الصيني لجمال الضحكة اديني:
إن مضغ كمية صغيرة من نبات الكبة الصيني يحسن النفس ويطيب رائحة الفم.

*البقدونس للعرايس مش للعوانس:

احرصي على تناول البقدونس بصفة مستمرة أو مضغة بالفم فهو يمتص أية رائحة كريهة وخاصة إذا تناولتِ أطعمة قوية الرائحة مثل البصل والثوم.

المشاركة الأصلية كتبت بواسطة blond_girl معلومات جداً قيمة ثقي عزيزتي أني سأطبقها بحذافيرها إن شاء الله أشكر لك مجهودك الذي بذلتيه و جزاك الله به خيراً

أخبارك إيه يا عروسة… شدي حيلك لأن العد التنازلي بدأ… والغريبة إن أهم حاجة في الفترة دي هي الهدوء التام.. لازم تكون أعصابك هادية جداً وتنامي على قد ما تقدري... ونصيحتي ليكِ بالبلدي بجد لازم تضربي طناش وما تخليش أي حاجة تعصبك... واهتمي باللي جاي:

1. أكدي على حجز القاعة... وحجز الفيديو وتأكدي من الأصناف اللي هيتم تقديمها خلال الحفل... وراجعي مع منظم الحفل البرنامج فقرة... فقرة...

2. لو كنتِ ناوية تسافري لقضاء شهر العسل خارج البلد ابدئي في حجز التذاكر واقعدي مع العريس لمناقشة ميزانية الرحلة...

3. ابدئي كملي مستلزمات فستان الزفاف.. وأول وأهم شيء هو الطرحة...

4. لازم دلوقتي الفستان يكون وصل لمرحلة متقدمة جدا تساعدك في تخيل تسريحة الشعر المناسبة... وخلي بالك إن فيه عوامل كتيرة بتأثر في اختيارك لتسريحة الشعر.. يعني مثلاً شكل الوجه والفستان فمثلاً لو الفستان مقفول يجب رفع الشعر وما ينفعش أبدًا ينزل على الضهر والعكس بالنسبة للفستان المفتوح...
. ما تنسيش وإنت بتنقي الطرحة... إنك تشتري إكسسوارتها من بنس الشعر والتاج، طقم الحلق والسلسلة...

6. فيه حاجة كمان أنا شخصيا باسميها المنقذ لأن مواقف كتيرة حصلت قدامي وكانت الحاجة دي هي المنقذ فيها وهو الجوانتي.. ساعات كتير كان والد العروسة بيعترض على الفستان ويقول ده من غير كم وتحصل مشاكل وكان الحل دايمًا هو الجوانتي.. ده غير طبعًا إن الجوانتي يعتبر لمسة من لمسات الرقة والأناقة للفستان...

7. وعلشان ربنا يبارك لك ما تنسيش ست الكل اللي تلاقيها دايمًا يا عيني بتلف حوالين نفسها ودايمًا بتنسى تعمل لنفسها حاجة.. قومي هاتيها دلوقتي وخليها تختار فستان من الفساتين دي واجري على الخياط وما تنسيش نفس الحركة اللئيمة "احنا مزنوقين.. يادوب قدامي أسبوعين.. يعني لازم أستلم الفستان بعد عشرة أيام"

8. وما تنسيش كمان وصيفات الشرف...


باقي من الزمن شهر واحد


1. نبدأ دلوقتي البروفات الكاملة لفستان الزفاف.

2. البروفات الكاملة على ماكياج الفرح.

3. شراء بوكيه العروسة...

اتفرجي على جنينتك واختاري اللي يعجبك....

بوكيه العروسة علامة مسجلة في الزفة وبعد تقطيع التورتة... العروسة ماتبقاش عروسة من غيره.. وبقى مهم جداً التدقيق في اختياره، وطلع منه أشكال وأشكال.. تعالي الأول نتكلم على شوية تفاصيل مهمة:

لو كنتِ قصيرة فده له دخل في اختيار بوكيه الورد... لأنك ماينفعش تختاري ورود مقفولة وطويلة ولكن من الأفضل تختاري ورود صغيرة وبسيطة... وطبعاً العكس لو كنتِ طويلة يبقى تختاري الورد الطويل..

الورد الأبيض بيدي شكل هادئ للفستان لأنه بيندمج مع الفستان.. ولكن الورد الملون بيدي حيوية أكتر للفستان وبيلفت النظر.

مسكتك للورد مهمة جداً لأنك لو مسكتِ البوكية غلط ممكن تغطي على منظر الفستان وتاكلي من جماله حتة زي ما بيقولوا.. والمسكة الصح يا ستي هي إنك تميلي البوكية لتحت من بعد منطقة الوسط..

لو فرحك هيكون في الشتاء حاولي تستخدمي الألوان الدافية في اختيار الورود زي "البرتقالي، الأحمر، الأصفر" أما لو في الصيف فعندك الألوان الهادية زي "الروز والموف والأبيض"

لو هتعملي البوكية طبيعي يبقى تعملي حسابك إن حد يستلمه من عند بتاع الورد قبل الفرح بوقت بسيط علشان الورد يستحمل الحرارة.

نيجي لأشكال البوكيه ونقول إن الموضة دلوقتي بقت البوكية المدور مش البوكية الطويل ده غير صحبة الورود الطبيعية اللي بتكون من غير أي ساتان أو دانتيل حواليها...









.

4. ابدئي في شراء الملابس الجديدة اللي هتحتاجيها بعد الزواج وخلي بالك.. حاولي تقللي من شراء الملابس على قد ما تقدري وده لأن شكل الجسم عادة بيختلف بعد الزواج..

5. ابدئي في تجهيز شنطة السفر لشهر العسل وفيه حاجات اوعي تنسي تاخديها معاكِ زي مثلاً علبة الماكياج الخاصة بيكِ، فرشاة ومشط للشعر، فرشاة الأسنان، مناشف، ملابس رياضية.... يعني أي حاجة ممكن تحتاجيها في الرحلة وخلي حد معاكِ يساعدك ويفكرك لو ناسية أي حاجة...

6. أكدي تاني على حجز القاعة والسفر والكوافير وميعاد استلام الفستان..

7. ما تهمليش في المتابعة مع الكوافير ولو شعرت بتعب من أي شيء -لا قدر الله- لا تتهاوني في استشارة الطبيب..

8. ماتنسيش تبعتي كروت الدعوة للمدعوين بوقت كافي علشان يلحقوا يحضروا نفسهم..

9. لو فيه مشكلة ظهرت في الوزن بسبب التوتر الزائد ممكن تبدئي ريجيم من النهارده...


ريجيم العرائس


مقدمة لا بد منها
ألف مليون مبروك "لوللوي"، زغرودة. بارك الله لكما وبارك عليكما وجمع بينكما في خير إن شاء الله.
نخش على المفيد:
1. أول حاجة خليك واثقة إنك، العروسة يعني هتكوني زي القمر عملا بالمبدأ الشهير مفيش عروسة وحشة "العرايس حلوين دايما".. قد إيه ربنا كريم ورحيم وبينزل على نفسك السكينة في اليوم ده بالذات.

2. تاني حاجة يا قمر.. معنى إن فرحك قرب إن إنتِ هتلاقي نفسك من هنا ورايح بتنزلي كل يوم.. يعني هتخسي هتخسي.. غصب عنك مش برضاكِ. وأخيرا، يا ستي ده ريجيم لو مشيتِ عليه لمدة 21 يوم هتخسي حوالي 7 كيلو ودول كفاية جدا إنهم يعملوا فرق..

وما تحاوليش تنقصي أكتر من كده زي ما إنتِ عايزة لأن ببساطة لو خسيتِ 15 كيلو وشك وبشرتك أول حاجة هتتأثر جامد ودي حاجة إنتِ مش عايزاها طبعا.

الريجيم
الإفطار:
- كوب عصير برتقال.
- بيضة مسلوقة.
- ربع رغيف عيش بلدي.
- قطعة جبن قريش 50 جرامًا.

بين الإفطار والغداء:
- نصف كوب لبن منزوع الدسم.

الغداء:
- طبق شوربة كبير منزوع الدسم.
- طبق سلاطة خضراء متوسط.
- طبق خضار باللحم المفروم.
أو
4 ملاعق كبيرة خضار مطبوخ + قطعة لحم منزوعة الدهون أو نصف فرخة مشوية أو 3 قطع كبدة مشوية.

بين الغداء والعشاء:
- ثمرة فاكهة.
- أو كوب عصير برتقال طبيعي.

العشاء:
- كوب لبن منزوع الدسم.
- أو كوب زبادى منزوع الوجه.

* الريجيم ده بالإضافة لتمرينات خفيفة ممكن تعمليها فى البيت هتساعدك جدا أن وزنك ينقص بس لازم تعرفي إن التمرينات دي نتيجتها مش بتظهر بصورة سريعة زي الريجيم لكن على المدى الطويل هتفيدك أكتر من الريجيم نفسه.

* المشي لمدة زمنية تزيد عن 60 دقيقة 3 مرات أسبوعيا "يوما بعد يوم" أو 6 مرات أسبوعيا، على أن تبدئي بالسير لمدة 15 دقيقة في أول يوم، ونبدأ بزيادة دقيقة يوميا حتى يمكن الوصول لأكثر من 60 دقيقة دون مضاعفات الإجهاد العضلي المعروفة.

تدريبات الأطراف السفلية الساقين:
- وتبدأ بالاستلقاء على الظهر مع رفع الساقين بالتبادل 10 مرات لكل ساق على حده بحيث يكون المجموع 20.
- ثم الاستلقاء على الجانب الأيمن ورفع الساق اليسرى 10 مرات والعكس "الاستلقاء على الجانب الأيسر ورفع الساق اليمنى 10 مرات".
- الاستلقاء على الوجه ورفع الساقين لأعلى بالتبادل 10 مرات لكل ساق، مع ملاحظة أن تتم هذه التمارين والساق مفرودة تماما دون ثني الركبة.

ويكرر التمرين يوميا لمدة 15 يوما.

ثم تبدأ المرحلة الثانية:- وهي الاستلقاء الجانبي بالاتكاء على المرفق وسند الرأس على كف اليد بحيث يتم رفع الساقين معا، ويتم تدريب الساق السفلي فتحا وضما مع ثبات الطرف العلوي "الساق العلوية" مرفوعا بزاوية 45 درجة 10 عدات ثم يتم التغيير للوضع العكسي 10 عدات أيضا.

قد يبدو هذا التمرين صعبا أو مستحيلا لكنه مع الوقت يمكنك أداؤه بسهولة إن شاء الله.


باقي من الزمن أسبوع واحد بس
[/SIZE]
فاضل لك حاجات بسيطة..
بروفة كاملة على الفستان بكل متعلقاته والماكياج والتأكيد برضه على الحجوزات وأهم حاجة بقى الكوافير والـتأكيد عليه وطبعًا ما تنسيش تحجزي مع المصور.

مش باقي من الزمن الفرح بكره

اسمعي الكلمتين الجايين دول كويس قوي:

1. حاولي تكوني نفسك.. اتصرفي على طبيعتك... ما تحاوليش تغيري من شكلك قوي لأن أجمل شيء إنك تباني طبيعية من جوه وبره..

2. حاولي تسترخي.. اقعدي فترة كافية من الوقت مع نفسك بعيد عن دوشة التحضيرات.. حاولي ما تجتمعيش في أماكن فيها ناس كتيرة.. وياريت تحاولي تقللي من عدد المكالمات، ولو هتعملي حنة تكون قبل الفرح بيومين على الأقل.

3. نامي على قد ما تقدري علشان ما يكونش شكلك مجهد في الفرح.

4. ما تفكريش كتير، وبلاش تتخيلي نفسك مثلاً بتتكعبلي في الفستان والناس بتضحك عليكِ والكلام اللي إنتِ عارفاه كويس.. خليكِ واثقة في نفسك وفي إنك أجمل عروسة، واعرفي إن من كرم ربنا علينا إنه بيهب البنت جمال فوق جمالها في يوم زفافها.

مبرووك النهارده الفرح

ساعات قليلة وتكوني على أعتاب حياة جديدة.. كلام كبير مش كده؟! ما تخافيش ربنا هيعديها على خير إن شاء الله...

1. ابدئي في وضع الماكياج قبل الفرح بوقت كافي علشان ما حدش يوترك ويا ريت ما يكونش في الأوضة غيرك وفردين كمان تثقي في ذوقهم وهدوئهم...

2. بعد الانتهاء من الماكياج تأكدي إن الفستان ما جاش عليه أي حاجة من الماكياج ولو -لا قدر الله- حصل ماتنزعجيش.. شوية مية يحلوا المشكلة..

3. اتأكدي إن الطرحة متثبتة كويس ومش مهم عدد الدبابيس اللي هتحطيها.. المهم تكوني مرتاحة...

4. عند التصوير ابتسمي ابتسامة طبيعية وبلاش الابتسامات العصبية..

نصيحة أخيرة... افرحي وعيشي فرحتك.. اليوم يومك وما يهمكيش من أي حاجة.. اعملي كل اللي نفسك فيه.. اضحكي، غني، ارقصى... ده فرحك وفرحتك إنت.. اوعي أي حاجة تعكنن عليكِ و...

ألف مبروك عليكِ يا أحلى عروسة.

المشاركة الأصلية كتبت بواسطة Crestalla [ (( ما تفكريش كتير، وبلاش تتخيلي نفسك مثلاً بتتكعبلي في الفستان والناس بتضحك عليكِ والكلام اللي إنتِ عارفاه كويس.. )) يا برنسيس كانك تقري افكاري انا الفتره الاخيره بس قاعده اتخيل لو طحت او اتكعبلت قدام الناس يا ساااااتر استر انتي عسللللللل هذا كل اللي اقدر اقوله..شكرا [

المشاركة الأصلية كتبت بواسطة روح الغالي ياعسل ربي يريح بالك طيب اذا كنت حابه اعمل زواج عائلي جدا جدا جدا جدا يعني كل المعازيم 20 شخص ياليت ياحبيبتي تعطينا كيف تجهيزات الزواج اذا كان عائلي بسيط بالبيت وربي يسخرلنا وييسر امرنا تسلمي ياعسل كل التقدير لمجهودك الرائع

المشاركة الأصلية كتبت بواسطة دااارين سلمت يمناكي أختي برنسيس , ملف شامل وكامل بارك الله فيكي أرق التحايا لكي .