السلام عليكم
بدي أحكيلكم عن مشكلتي مع زوجي

أنا زوجي مسافر .. أنا مقيمة حاليا في بيت أهلي
أزور أهل زوجي مرة أو مرتين في الأسبوع

بس المشكلة مع زوجي .. كل يوم تحقيق .. رحتي عند أهلي .. شفتيهم .. شو عملتو .. شو أكلتو .. كم مرة اتصلتي .. شو وشو
كل شي تحقيق .. كل يوم بيسأل .. رحتي عندهم .. بدو ياني كل يوم أروح .. يعني لو أروح كل يوم ما أعتقد راح يكون راضي .. مرتين بالأسبوع ما بيكفيه .. بس أنا كمان مابحب أزورهم أكتر من هيك .. بحس إنو حتى مرة كل أسبوعين كفاية .. بس مستحيل .. المتابعة من جهته يومية ومستمرة ولا يكل ولا يمل .. كل يوم .. من حوالي 5 شهور على نفس المنوال .. مرات بستجيب ومرات بعصب وبنزعل من بعض
أنا بقدر احترام الأهل .. بس والله هادا اذلال .. أنا بطبعي ما بحب أطلع من البيت كل يوم خصوصا إنو فترة النهار عندي دوام .. مش معقول كل يوم اربط حالي بزيارة أهل زوجي وما أفكر غير كيف بدي أرضيهم وأرضيه
بصراحة أنا مليت كتير من هالحالة
لا وكمان .. ممكن مرات آخدلهم غداء أو عشاء .. حتى هاي بيعترض عليها .. ليش أخدتي مناقيش .. ما أخدتي كذا .. ماني عارفة كيف أتصرف معاه ..

تصرفه هادا خلاني أكرههم وأبطل أحب أروح أزورهم لأني بحس حالي مجبرة على الزيارة
تكلمت معاه أكتر من مرة بالموضوع .. حاول يتركني فترة وبعدين رجعت ريما لعادتها القديمة

بصراحة أنا خبرته إنو إصرارو على موضوع زيارة أهله مش راح يزيد المحبة بيني وبينهم .. بالعكس ممكن أروح عندهم كل يوم بس أكون ساكتة وشاردة ومسكرة قلبي عنهم .. يعني العبرة مش بكثرة الزيارات

حتى مرات بيزعل لو ما نمت عندهم مثلا مع إني ما بحب أنام هيك بأي مكان أو على أي فراش .. يعني مرات بحس الموضوع صار موضوع كرامة

وأنا بطبعي ثقيلة .. ما بحب أندلق على الناس على حد تعبيرنا .. يعني ما بعرف أزور الناس كل يوم .. بمل وبطق كمان

يعني مش بيكفي مستحملة بعده عني .. ومحرومة من كل شي تقريبا .. كمان راح أنفجر من موضوع أهله

بدي رأيكم بصراحة عن هالموضوع
كيف المفروض تكون زياراتي لأهل زوجي وهل معقول أزورهم كل يوم أو كل يومين ؟؟ والله حرام وارهاق
كيف ممكن أتصرف معاه ؟؟