السلام عليكم ورحمة الله وبركاته
أنا الآن في أمس الحاجة إليكم .أنا عايزاكم تفتحولى قلوبكم وتصبروا عليا شوية لانى هاحكيلكم من أول يوم الخطوبة.
أنا مخطوبة من شهر 2/2005 ومكتوب كتابي من شهر11 /2005 يعنى حوالي سنة ونصف
اتخطبت خطوبة تقليدية وبعد الخطوبة قلبي اتفتح لأول مرة لخطيبي وحبيب قلبي وكان أول حب في حياتي وأتمنى انه يكون الأخير .وعشنا فترة مليانة بالحب والأحلام الجميلة وفى شهر 6 خطيبي فاتح اهلى فىانه عايز يكتب الكتاب وحصل رفض في وقتها وادوله ميعاد في شهر 11 (آخى الكبير كان رافض أصلا كتب الكتاب علشان أسباب هو شافها من وجهة نظره يعنى زى ما ببقول علشان ميحطش أيديه تحت درس حد وعشان خطيبي ميتشرطش عليا أنا صممت على كتب الكتاب وماما كانت موافقة .
حصلت مشاكل ما بين ماما واخى .وما بين خطيبي واخى بسبب انه ليه رافض كتب الكتاب .وظل اخى رافض .ورفض انه يبقى وكيلي لان بابا متوفى وعمى هو اللى كان وكيلي .وقبل ما افرح بكتب كتابي حصل زعل ما بين ماما وخطيبي (زوجي)
وبعد كده سعيت لإصلاحهم والحمد لله اتفاهموا ولكن سرعان ما يرجعوا تانى لما كانوا عليه ومن ضمن المشاكل أنا حكيت لكم عليها وهى انىكنت مستنية خطيبي يجيلى في يوم وأنى اعتذرت له علشان اخى رجع من السفر وعزمنى وعجبنى رد الاخت سيدرا واللى كان(أنا برأيي تشدي شوي على خطيبك

خطيبك معاه حق نوعا ما ، لأن هو كان مستعد نفسيا لزيارتك أنو رح يشوفك وكان بقمة معينة من السعادة بس إنتي ولظروف طارئة نزلتي من هي القمة ، ومع هذا لابد أن يتحمل بعض المسؤولية ويتقبل الظروف الخارجية يعني إنتي عندك أخ رجع من السفر وأحرجك بعزومة قليلو أنا بمون عليك أكتر من أخي لأنك جزء مني وإزا ضل زعلان اتركيه شوي بس مو أكتر من يومين تلاتة ، وإزا حسيتيه بكلمك بقرف قوليله أنا مابحب أحكي معك وإنت هيك بتصير مو حلو خلص لما تروء كلمني ، ولاتزيدي عيار المحبة عشان مايطلع كتير فوق وإنتي كتير تنزلي لتحت ..

هذا والله يهنيكم ويوفقكم مع بعض)
المشكلة ديه عملي عليها حكاية ومقدرش اسفى ليه وبردوه عدت المشكلة ديه وجات غيرها يعنى باختصار من ساعة كتب الكتاب والمشاكل مش عايزة تسيبنا .وكنت لما بقع في مشكلة الجأ لاى حد من خلاني لانى لو حكيت لاخواتى هيشمتوا فيا علشان اللى كانوا خايفين منه حصل وهيحصل.

اللى أنا حكيت لكم عليه ده كله مش مشكلة بس كان لازم احكيه علشان تعرفوا اصل المشكلة
((أنا آسفة انى بحكي على التفا هات الصغيرة ولكنها هي السبب في المشكلة الكبيرة اللى أنا فيها ))

النهاردة احنا في منتصف شهر6 والمفروض يوم زفافي 24/8/2006 وحجزت فستاني الأبيض ورتبت كل امورى لزواجي إلا إن ظهرت لي مشكلة لم أكن في انتظارها. خطيبي مش عايز اخواتى يدخلوا في جوازي ولا يروحوا يشتروا الأثاث والعفش بتاعى وكمان عايزنى انسى اخواتى واهلى بعد جوازى.هو ما قلش كده ليا مباشرة ولكن أنا فهمت أنا واللى معايا من طريقة كلامه يعنى عايز يتجوزنى لوحدى كانى يتيمة اخدنى من ملجأ
**ياحماعة مهما حكيت مش قادرة اوصلكم ال عندى
خطيبي عايز يصغر باهلىوباخى بالذات علشان كان رافض كتب الكتاب وبماما علشان المشاكل الى كانت بتحصل ما بينهم
على فكرة والله انا كدة يادوب حكيت على نصف المشاكل اللى انا فيها
الى انا عايزة منكم دلوقتى تساعدونى. انا ما بين امرين كلاهما مر اما انى اختار خطيبى(زوجى)وابيع اهلى واصغر بيهم وديه حاجة مستحيلة بالنسبة ليا وإما اختار اهلى واسيب حب عمرى وغير كدة وكدة لو انفصلت عن خطيبى هابقى مطلقة وانا مش قادرة تخيلوا بعد ما كنت هارتدى فستانى بعد شهرين هابقى مطلقة انصحونى اعمل ايه اللى معايا من اصدقائى واهلى يزكرونى بان مابيني وما بين زوجى ورقة وما بينى وما بين اهلى دم.
انصحونى وربنا معايا

اسفة على عدم ترتيب الكلام على الطريقة العامية فيه وعلى الاطالة