اسئله واحتاج لردود شافيه قطعيه - منتدى عالم الأسرة والمجتمع
logo

الملاحظات

المتزوجين مواضيع تهم المتزوجين من الرجال والنساء.

 
أدوات الموضوع
انواع عرض الموضوع
قديم 04-08-2006, 12:31 AM
  #1
مشكلتي اصدق
قلب المنتدى النابض
 الصورة الرمزية مشكلتي اصدق
تاريخ التسجيل: Jan 2006
المشاركات: 3,893
مشكلتي اصدق غير متصل  
sad2 اسئله واحتاج لردود شافيه قطعيه

السلام عليكم ورحمة الله وبركاته
كيف الجميع.....ان شاء الله طيبين


عندي كذا تساؤل وبصراحه الدنيا قافله معاي الان وصار لي كم يوم


اولا: قبل كم يوم زوجي جاب عشا مشاوي....وانا ما احب شي اسمه ريَش الخروف....فيها زنخه ما تختفي مع الطبخ....جربت كذا مطعم ومن قبل لا اتزوج....مافيه فايده ...صرت اكل اي شي الا الريَش ما اطيقها

طبعا في بو وليد طبع ..... لازم يعودني على اللي اكره....ما احب الربيان ولا الريش....وهو مصر الا اكل منهم واتعود عليهم.....لما جاب المشاوي وفيها ريش..... طالعني بنظره كلها حب مشاركه وعطاني وحده من الريَش وقال...بالله جربي وخليني انبسط...قلت يا بنت تشجعي وكلي منها وارضيه....قضمت قضمه....طبعا فيها زنخه....انا جيت على نفسي وقلت اخذ القضمه الثانيه.....الا بو وليد يطالعني بنص عين ويقول ....

هههههه....يا الخبله هذي ريَش جمل
انا وجهي صار الواااااااااااااااااااان.....واشكال.....وكل شي
قلت جمل ولا تعلمني.....وجمدت بالقطعه في يدي....مسكت نفسي لا اطلع اللي اكلته حتى من قبل ثلاثه ايام....اعتذر عن التدقيق بس ودي يا ناس تفهمون قد ايش انا تفرق معاي السالفه.........

قام مسكين يستدرك الغلطه الفادحه اللي سواها.....يعني مو كفايه ريَش وزنخه كمان تطلع جمل.....
قام يحلف انه يمزح ومو صادق.......وانا خلاص قرفت من حتى جلدي.....اتصل على المطعم قدامي وسألهم وقام الهندي يضحك من السؤال ....هي ريش جمل والا غنم؟وطبعا كانت خروف....

حطيت اللي بيدي على السفره وقمت اغسل....ورجعت...بس على الكباب ....
زعل اخونا في الله.....ليش تكبرين السالفه....انتي ما عندك ثقه فيني من اول ما تزوجنا(قام يخورها اخونا )
قلت له ...انت تدري ان اسمي في المنتدى(((((مشكلتي اصدق )))))ما جا من فراغ.....ليش دايما تلعب على هالوتر فيني...
انا فعلا مشكلتي اصدق كل شي وخصوصا اي شي يقوله زوجي الله يسامحه.....ما قمت افرق بين المزح والجد عنده...
هالشي مسبب لي ازمه مع نفسي ومعاه
كان يقول كلام كثير اول ما تزوجنا....واعترف بعدين انه يمزح ومو قصده....بس بعد ايش؟....بعد ما صدقته وتلفت نفسيتي

مثلا انه بيتزوج.... واني اطالع بغيره....وانه ما يحس اني احبه....وانه اخر اهتماماتي....وكلام كثير والله ما ينمزح فيه لا من قريب ولا بعيد....
كان بس يستفزني وانا الهبله اصدق....

صايره اصدقه بشكل فظيع....حتى لما قال ريَش جمل....مع اني في عقلي قلت المفروض تكون اكبر
بس مدري ليه اصدقه
اكذب عقلي واصدقه في كللللللللل شي وانا والله تعبت


ابغى اعرف قد ايش في الازواج مثلي ومثله؟
هل اللي يسويه عادي وانا مكبره الموضوع؟
هل هذا غباء مني؟
هل هو فيه قوه غريبه تقنعني ؟ قمت اعذره
ابغى اتعلم افرق بين الجد والمزح
ليش انا كذا؟
من جد تعبانه....هالموقف جا بعد مئات المواقف ومرات يصير في اليوم الواحد اكثر من موقفين...

كنت اقول حركات سخيفه بس اللي يصير اننا نتقاطع باليوم الكامل واول الزواج كنا نتقاطع والله الى اكثر من 3 ايام...
والسبه اني اصدق وهو يقول امزح وانتي تكبرين السالفه....


سؤال ثاني....لما الزوج يقول لولده في حالة غضب ومن غيره: اصلا لو امك مربيتك عدل ما كان هذا حالك...
هل انتي يا الزوجه تزعلين؟
كيف تتصرفين بالضبط؟
ايش المفروض يكون التصرف الافضل؟
تحاكمينه في وقتها والا بعدين والا ما تحاكمينه من الاساس؟
تقاطعينه؟
ايش تسوين؟

وللازواج لو الزوجه هي اللي قالت هالجمله للولد....يعني لو ابوك رباك عدل ماكان هذا حالك....شتسوي؟
سامحوني على الاطاله واتمنى ما ينظر للاسئله كلها انها سخيفه
لو سخيفه ما كنت تعبتكم معاي....
بس من جد تفرق معي واجد
واخيرا جزاكم الله خير
__________________
[/IMG]

التعديل الأخير تم بواسطة مشكلتي اصدق ; 04-08-2006 الساعة 12:34 AM
 

مواقع النشر


ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 07:26 PM.


images