والله يا أخت شوبارد أنا في مواضيع مصيرية عادة ما أحب أرد.. ليه ؟!! لاني أخاف أقول شي وربي يبليني لكن حسيتك محتاسة وتفكري كثير قلت يالله نفكر كلنا سوا زي ما نفكر أنا وصحباتي.. والله يستر.


أولا وأكيد طبعاً الإستخارة.. صليتيها ؟ بعدها أي شي يصير خير سواء قبول أو رفض.. طيب ؟


ثانياً إنت شفتيه لمحة صح ؟.. شوفي كل وحده مننا حاطة شي فبالها.. طول ، عرض المنكبين ، وزن ، ملامح.. قصدي ككل عجبك ولا لأ ؟ بصراحة.. حاسة إنو عجبك.. لانك بتعطي أعذار لكل عيب فيه.


ثالثا بالنسبة للطلاق.. عن نفسي دائما أقول أنا مو مطلقة ليش آخذ مطلق ؟؟!! لكن فيه أمثلة صارت قدامي أخوان اثنين مطلقين ما توفقوا في إختيارهم الأول لكن ما شاء الله مبسوطين وآخر سعادة ووفاق مع زوجاتهم الجدد وإثنينهم البنات ما سبق إنهم تزوجوا.. بس العائلات كلها تعرف يعض من زمان فالأولاد تاريخهم معروف وثقة.. لذلك.. إنت لازم ومن حقك إنك تصري وتعرفي سبب طلاقه.. حتى لو من ورا أهلك.. من معارفك صحباتك مثلا يمكن يعرفوا زوجته السابقة.. يمكن كان يضربها يمكن بخيل يمكن فيه مصيبة محد يعرفها إلا المقربين منه.. يا أختي إن صغيرة لا تتنازلي مرة وحدة..

رابعاً الطفلة إذا إنت عندك استعداد وبالك طويل وحطي خمسين خط تحت وإذا كان يستاهل وما عنده عيب في طبعه وأخلاقه بعدها ممكن تتحملي تصحيها كل يوم على المدرسة و تربيها كأنها بنتك تماماً..

خامساً أهلك إتبعوا اسلوب جديد وهو إرباكك ووضعك أمام الأمر الواقع.. صارحيهم إن هذا الأمر يزيد حيرتك و أن الرجل لو طلع ما يستاهلك بعد الزواج راح تلوميهم فاطلبي أن يمهلوكي حتى إنك توافقي عن قناعة.


سادساً الدخان والله مصيبة لو كان مدمن.. يعني على حسب الكمية لو ثلاث سجارات في اليوم ممكن فيه امل يبطل وانه شي عارض لان باله مشغول ويبي عروس.. زي أخوية الكبير كان أكثر شي أربع سجارات ويشربهم بمزاج مع قهوة ولمن يرجع البيت قبل ما يسلم على زوجته يسوك أسنانة والآن ما شاء الله بطل.. أما لو تحشيش وعلبه ونص في اليوم.. فهي مأساة بعينها.. شعرك دخان ملابسك دخان غير النفس من جد يع.. بالنسبة لي من شروطي إنه ما يكون مدخن لأن راح يكون عصبي ومزاجي وأسنانه تقرف. تأكدي من كمية تدخينه..

لو كنت مكانك وكانت اللمحة اللي شفتها ارضتني.. أعطي الموضوع فرصة وما ارفض على طول.. بمعني أشوفه الشوفة الشرعية لو أهلي كانو مستقتلين عليه.. صحبتي الروح بالروح دايما تهزئني تقلي شوفيييييييه لا ترفضي على الفاضي والمليان يمكن يعجبك وترتاحيله.. يعني لو هذا الشخص لنفرض إنك تحبيه قبل ما تعرفي مساوئة أكيد راح تقبلي بيه مثل ما هوه.. قصدي يمكن شخصيته جذابة يمكن زوجته الأولى ما فهمته أو تزوج بدري وبسرعة بعدين اكتشف إنهم غير متفاهمين.. المهم تلاقي الأرواح.. لازم تعرفي ملابسات الطلاق من كم سنه مطلق ؟ سبب الطلاق ؟ إيش مستواه التعليمي ؟ ناجح في عمله ولا لأ ؟ وإذا شفتيه وعجبك وحصلت الموافقة هل أهلك يقبولوا تكلميه ؟ مرة ولا مرتين ؟ حتى تشوفي طريقة تفكيره!.

خلاصة الكلام.. خلي الموضوع يمشي شوية ويطور بس على نار هادية.. ينطبخ.. استنيتي استنيتي.. فهو لازم يسنتى وياخذ الموضوع إجرائاته اللازمة.. وأكيد لو والدك ما ارتاح له وما كان من عائلة تناسب عائلتكم ما كان كبر الموضوع ووصله لكي ولا إيش رايك.. والدتك فهميها قليلها لا تفرح على حسابك و على حساب تعاستك لو كان ما يسحقك!! عادي قليلها هي بصريح العبارة لا تخجلي.. إنت اللي راح تعيشي معاه طول عمرك.. وعنده استعداد يطلق.. عشان كذة لازم تتاكدي إن سبب طلاقة مو سبب تافه.. سبب إستحال عيشته مع زوجته السابقة.. لأن إنسان تهون عليه بنته تعيش بدون جو عائلي صحي فهو شخص غير مسؤول..


أقلك شي فيه واحد نعرفه طلق زوجته وعنده بنت وأخته كمان مطلقة.. اتصلت فيه قالت تعالي نروح السوق نزلت لقيت أخوها المطلق في السيارة هو شاب وشكله مو بطال المهم وصلنا وشافني.. أنا انقهرت منه وعصبت لأنه جالس يضحك مع اخته ويكركر ولا كأنه عنده بنت في بلد ثانية بدون أب.. ولا تحسيه مقهور ولا شوية.. ولا أدنى إحساس بالمسؤولية قلبت وجهي عليهم ولا طالعت فيه وزعلت من البنت إنها كذبت عليه لمن سألتها معاكي أحد ؟ قالت لأ وكنت حاسة إنها جايبة أخوها يشوفني.. المهم حسستهم برفضي وقلبت وجهي وخليتهم يرجعوني بأسرع ما يمكن.. حكيت بابا قلي شاطرة زين ما سويتي.. هيهيهي.. حتى البنت بعدين حست إنها غلطانه واعتذرت بطريقة غير مباشرة.. لأني ما أحب الحركات هاذي.. رجعت البيت معصبة وقلبت الدنيا.. المهم أعطيتك مثال عن نفسي..


<<<<< تحمست وصارت تقول المهم كتبر بس والله شلت همك وحسيت إنك محتارة قلت يمكن أقدر أريح دماغك شويه,, عشان أنا كمان لمن أنخطب أدخل دوامة وأفكار عجيبة غريبة تجيني وأقلب الموضوع يمين شمال وأتخيل نفسي أم وعيال و مشاكل وأتخيله كيف راح يتصرف هل عنده إستعداد للتلطيش أو هادئ ويناقش.. عموماً أنا مو ندمانه على أي إنسان رفضته أو رفضني.. لأن فعلا ما وجدت الشخص اللي أندم عليه بعد!!


الدنيا صارت صعبة.. وإختيار الزوجة صار أغلبه مبني على أساس مصلحة.. وقليل إللي يبغى وحده عشانها هي.. والزواج من مطلق له إيجابيات وسلبيات.. وإنت شوفي لو طلب يكلمك أو لو سألك في الشوفة أسئلة كثيرة معناته يبغى وحده واعية وفاهمة يعوض فيها إللي فاته ويكون إختياره المرة هاذي صح.. الموضوع يحتاج تفكير عميق.. وتنازلات.. تأكدي إنه شخص يستحقك و يقدرك وما يأثر عليك سلبياً..


وفقك الله لما يحبه ويرضاه..

__________________

من وثق بالله أغناه

ومن توكل على الله كفاه

[CENTER]______________________________

كرروا معي يا بنات


أنا لؤلؤة.. داخل محارة.. في بحر عميق.. لن يكتشفها !!..

إلا غواص ماهر

[CENTER]قال علي بن أبي طالب للأشعث بن قيس:

إن صبرت جرى عليك القدر وأنت مأجور ، وإن جزعت جرى عليك القدر وأنت مأزور[/CENTER]

[/CENTER]