بسم الله الرحمن الرحيم

شاف أحد الحكماء رجال وأحس انه فيه جمال مو طبيعي فسأل الرجال اش سر جمالك ؟؟؟ ( ترى من جد يعني ماكان فيه صابون وملمع جزم وشغلات زي كدا )
المهم قاله لأني اتربيت على : حب الفقراء وعلى كرم الأخلاق وعلى حسن التعامل مع الناس
فقاله الحاكم : والله هذه هي الرجولة وجمال وجهك هي إنعكاس لجمال أخلاقك مو أكثر

بصراحة يا أختي أوقات الرجال من جد حرام نقول عنهم رجال
لكن اش المصيبة ؟؟ انه حياتنا كلها مكملة لبعض
يعني صعبة يا " مشكلتي اصدق " انه يكون في رجال ( أو حرمة ) أمه وأبوه ربوه على السب والضرب وقلة الأدب وما اهتموا فيه وأهملوه ،،، صعبة يصير لمن يكبر ويتزوج انه انسان قمة في الأدب ومايحب يسب وهادي وأشياء حلوة كثيرة فيه ( طبعا إلا برحمة ربنا ) لكن بنتكلم بالنظرة العامية والمألوف

طيب ،، خلينا نتكلم بصراحة هؤلاء الرجال أو النساء اللي هذه أخلاقهم وكانت هذه تربيتهم ، فين راح نرميهم ؟؟ في الشارع خلاص مانزوجهم أبدا ؟؟؟؟
إلا أنا أشوف نزوجهم حرام هما يتحملوا ذنب آباءهم وأمهاتهم ...
بس كمان ما نزوجهم أي وحدة ( إذا كان رجال ) لازم نزوجه وحدة تكون له أم وأب وأخ وأخت وصاحبة وزوجة طبعا وبنته وكل شي

طيب مين فيه حرمة تستحمل هذا كله ؟؟ بصراحة طفش وحاجة تتعب مرة كثير (لأنه نحنا هنا كأننا بنطلب ونقول ، غيري زوجك تغير جذري)
فين الحرمة اللي تهلك نفسها وشبابها عشان واحد هو بصراحة ما يستاهل لكن الضريبة " أنه زوجها " برضوا الزوجة لها حياتها الخاصة ولها آمالها وأهدافها ( هي ما أتزوجت عشان تضيع وقتها في تغيير حياة زوجها )
وعلى فكرة حتى لو فكرت الزوجة انها تبذل كل جهدها في تغير زوجها ماراح يكون عندها الصبر الكافي
لأنه المسألة تحتاج وقت طويل يعني بالراحة سنوااات ( كأنك بتبدأي تربي طفل إلين ما يكبر )

طيب بأوقف في هذا الفاصل وراح أكمل في رد ثاني عشان لا يصير الرد طويل وتطفشي من كلامي
لكن في كل فاصل راح أقولك ليش انتي ملكة
أولا : انتي ملكة .... لأنك بإذن الله استخرتي قبل ما يتقدم لك ورضيت على نصيبك مع العلم انه نحنا قلنا مو أي وحدة تتزوجه
ثانيا: انتي ملكة .... لأنك اتزوجتيه ،، مع العلم انه يمكن في أشياء صغيرة وضحت لك أيام الملكة أو الخطوبة
ثالثا: انتي ملكة..... لأنك قوية وصبرتي عليه مدة والله ،، وآآآآه من هذا الزمن الصبر فيه صار صعب مرة
رابعا: انتي ملكة ....
آسف لأني طولت عليكي أكملك في ردي الثاني بس أحب أعرف كيف نفسيتك
الله يوفقك