حبيبتي الغالية و أختي اللي كنت مستنيه بجد إنها ترد عليّه ، لأن قد إيه عارفه إن كلامك مريح و عقلاني و حنووووووووون

بصي بقة يا بنت حتتي

للأسف أنا اتخطبت سنه و اتكتب كتابي من 3 سنين يعني المجموع النهائي = 4 سنوات
و خلال الفترة دي أنا مش شفت خطيبي فيها و لا عاشرته معاشره كامله (وجهاً لوجه) غير 3 شهور و الفترة دي طبعاً مش كافيه إني أحكم عليه حكم كامل

للأسف هو هيفضل مسافؤ لأنه لسه بيكمل دراسته بره ، و المفروض إني إن شاء الله أنا اللي هسافرله خلال الفترة اللي جايه

بالنسبة لأهلي فهو موقف مثالي جداً (اللي إنت عاوزاه اعمليه .. عاوزه تكملي ، عاوزه تسيبيه .. زي ما إنت عاوزة)
و رغم إن الرأي ده جميل في أوقات ، لكن وقت الأزمات بحس إنه موقف سلبي و بتمنى لو كانوا أهلي ناس دكتاتوريه تجبرني على وضع معين

لأني بصراحة ببقى خايفة من قراري و خايفة أندم عليه

آخر مشكلة حصلت ،، كان سببها تافه جداً جداً ، و صعد المشكلة لدرجة إننا انقطعنا عن بعض فترة طويلة كان في كلام ما بين الأهل فقط

و أعرب عن رغبته بإنه مش عاوزني ، و أنا قلت مش هشتري أبداً بايع

و من فترة بدأت ترجع الأمور مرة تانية (بعد محاولات من الأهل لإصلاح الوضع إما بالإنفصال أو بحل المشكلة)

و بعد ما كنت استقريت نفسياً على رأي و قرار معين ((الإنفصال)) اتفاجئت إن كل شئ بيرجع مرة تانية و بسرعة غريبة

و إن ورق استقدامي للدولة اللي هو فيها بدأ يتحرك (بعد تقريباً سنه و نص من تقديمه) ، و النقطة طبعاً دي مخوفاني جداً لأني في لحظة هكون معاه لوحدي

و كل ما استخير ربنا الحال يتصلح و الدنيا تبقى أفضل ... لكن برضه المشاكل موجوده ... صحيح هي عمرها ما وصلت لمشاكل في الدين أو الخلق ،، لكن كلها بسبب طريقته الجافه جداً في التعامل معايا و إحساسي إنه مش رحيم بيّه أو بحالي و إنكاره الدااااااائم لأي شئ كويس أنا بعمله


أنا عارفه إني طولت عليكي بس فعلاً كنت محتاجه أفضفض لحد يفهمني و فعلاً كنت مستنياكي إنت و بعض الأخوات اللي ربنا يعلم قد إيه همّه غالييين عليّه


جزاك الله كل خير و ربنا يسعد قلبك و يهنيك بزوجك و أولادك و يبعد عنكم العين و يرزقك بالذرية الصالحة عاجلاً غير آجل

__________________

	[blink]"و اصبر حتى يحكم الله و هو خير الحاكمين"[/blink]