ماشاءالله اشوف الجماعه كلهم طابين في حلقك ياخوي وانت مستلمهم بعد

انا بس احب اعلق على هالكلمه وبكل وديه اذا سمحتلي.

تعليقي هو انه مبدأ "اللي معاه" تختلف من شخص لاخر, انا اعرف واحد من الشباب كان راعي مشاكل وحشيش وحالته صعبه لكن فجأه يوم من الايام عقل وتزوج وهو الحمد لله الان مرتاح "نوعا ما" وعنده بنت وهو قالي واقسم لي بالله ان مامعه ريال واحد يوم يخطب, طبعا انا ما اقول ان اللي سواه صحيح لكن ياخي الرسول صلى الله عليه قال (فيما معناه) انه ثلاثه كان حقا على الله ان يعينهم وذكر منهم من يريد الزواج ليعف نفسه.

ايضا هنا اذكرلك واحد اعرفه راتبه فوق 12000 ريال ويجي يتسلف مني رغم انه ماعنده ديون ولا قروض لكنه الله يهديه يصرف وشباب عندي فالعمل رواتبهم على 2500 ومتزوجين ومرتاحين "مره اخرى, نوعا ما"

وانا اكره هالكلمه حيل لاني موظف على قد حالي لكن عائلتي كلهم في مراكز مرموقه ويركبون احسن السيارات وعيالهم يلبسون اخر موديلات وكل واحد منهم يجلس يذب علي كل شوي يقاله يمزح "من وينلك يالمنتف تعرس؟" وبعض الاحيان يكون كلامهم جدي "حرام عليك تاخذ وحده وتعذبها معك وتعيشها في فقر" وكل مادروا اني ادور ولا بخطب قالوا "هاه عساك جمعت كم مئات الف فالبنك؟" رغم اني والحمدلله قادر على الزواج لاكن ماراح اسكن الا في شقه وسيارتي عاديه ولا اقدر اسافر اوروبا كل سنه... وهذا بالنسبه لهم هو الجحيم بعينه واني شخص ظالم ولازم اصبر الا ما اصير مثلهم. "والله من الخنبقه بس"

طبعا انا ما اقول انك انت من طينتهم وحكيك نفس حكيهم لكن انا بس ابي اوضح نقطه وجبت النقيضين لتسهيل الامر, وانا معك انه الواحد لازم يضغط على نفسه فترة الخطوبه لانها احلى فتره وحرام يخلي البنت تضيع هالفتره اللي كل زميلاتها مستانسين فيها. لكن بشرط انه مايحمّل نفسه فوق طاقته ولا يخلي البنت تتوقع اشياء بعدين راح تنصدم انها كانت مجرد نسج من الخيال.