شاركنا بتسجيل معتقداتك الطفولية ومعتقدات أطفالك

13-08-2009, 06:45 AM

#11

*الماسة*

عضو مميز و مثالي

تاريخ التسجيل: Feb 2007

المشاركات: 1,126

الله يسعدك اخي عزوبي على هالموضوع الرااائع

شوقتني لأيام الطفولة والدلع

وضحكتني ردود الإخوة والأخوات مررة الله يسعدكم جميــعا

بالنسبة لي انا مثل ماذكروا الكثير اشوف المذيع في التلفزيون احسبه يطالعني واروح يمين يسار وهو مصر يشوفني لحد ما جات ماما يوم وعلمتني قالت ما يشوفك بس هو يشوف كاميرا قدامه بس وانتي تحسبيه يشوفك اقوم اقولها طيب فينها الكامير وادور ورا التلفزيون

والصراحة كنت مفترية اقول لأختي انتي جبناكي من المستشفى وماما وبابا حنو عليكي وربوكي عندنا
وهي تبكي وانا اضحك عليها

وصار لي موقف حقيقي كنا خارجين مع الأهل وانا من فرحتي سبقتهم ونزلت للشارع بس واقفة عند بابا الحوش ووقفت سيارة فيها رجال وحرمة ونزلت الحرمة وكلمتني قالت كيف حالك ورديت عليها انا طيبة اتفضلي كان عمري يمكن 9 او 10 سنوات وفجأة مسكتني بقوة من يدي وصارت تحاول تجرني للسيارة وانا ماسكة في الباب اصرخ ولما طفشت مني حاولت تجر البناجر الذهب من يدي وقطعت السلسة من رقبتي وطلع بابا يسمع صراخي وشردت بسرعة ركبت السيارة وراحوا بس اخذت السلسلة الله يسامحها
ومن بعدها وانا اكره الشارع ولا حتى اروح المدرسة وكل بنت اقابلها اقولها الحرمة حتجي وتاخذك

وكمان كنت دايما اتمنى اصير اميرة زي ليدي ليدي والبس فستان كبير وتاج

واتخيل نروح البحر ونضيع في جزيرة زي فلونة واقول لماما يارب يارب نضيع في البحر عشان نروح الجزيرة اللي فيها فلونة واسوي مغامرات

كنت احسب الشخصيات الكارتونية حقيقية واتمنى اقابلهم واحبهم بشكل جنوني واسمي نفسي بأساميهم

والى الأن اتفرجها

أما ولدي لما كنت حامل جاني وقال يا ماما ابغى النونو ولد قلت له ان شاء الله ربي هو اللي يجيبه
ولد أو بنت انت لما تروح المسجد مع بابا ادعي في الصلاة يارب ولد
صار يفكر ورجع قال يعني الله هو اللي يقدر على كيفو يجيب ولد قلت ايوا هو اللي يقدر بس قال خلاص انا بعطي الله فلوس(استغفر الله) عشان يعطينا ولد

طبعا جلسنا انا وابوه نفهمه اننا بالدعاء ربي بيستجيب لنا والحمدلله اقتنع وراح يوم المسجد ورجعوا هو وابوه واشوفه يضحك يضحك واقول اشفيك
يقول ولدك فضحنا الناس راكعة وهذا بأعلى صوت يارب اعطينا ولد يارب اعطينا ولد

وفي موقف كمان كنا زمان في رمضان في بيت جدتي في مكة حارات تعرفو الناس معلقة فوانيس ولمبات وزينة وكانت عمة ماما الله يرحمها ويغفر لها تسويلنا البليلة والبطاطس ونعبيها في علب ونجلس عند الباب نسوي بسطة ونبيع وكنت لما احد يشتري مني العلبة بريال ويقولولي زودي الخل اقولهم 3 ريال

ويشتروا المساكين وانا مبسوطة هههههههه

وفي لبانة يبيعها ولد خالتي معاية اسمها (شختك بختك) هي اظن تختار لبان ويطلع لك هدية ناسية صراحة وكنت ازيد في الأسعار طبعا

وعندنا بابا الله يخليه ويحفظه له حكايات كثييير بذكر موقفين بس عشان ما اطول عليكم

يقول مرة اعطته جارتهم تمر وكان معاه كثير وشافه عمي الصغير وقاله اعطيني تمر قال تبغى روح اضرب راسك في الجدار ويطلعلك تمر وصار عمي يضرب راسه في الجدار وبابا يرمي تمر من وراه وعمي فرحان تمر تمر وقال ابغى كثير قاله بابا اضرب راسك بقوة ويطلعلك كثيير ومسكين يضرب يضرب وبابا يرميلو هههههه تقول جدتي لحقنا عمك ولا كان انفجر راسه

وكمان مرة اتضارب هو عمي الصغير على حبحب (بطيخ) وكانت اخر حبة في الصحن وجدي الله يرحمه كان شديد وجاب وحدة كبيرة وقطعها وقالهم كلو وصاروا ياكلو ياكلو ويبكو يقولو خلاص وجدي يفتح الثانية ويقطعها ويغصبهم وهم ياكلو ويبكوا وما فكهم الا جدتي بعد محاولات ..بابا يقول بعدها حرمنا نتضارب على الأكل

واخر موقف لبابا يقول كان جدي الله يرحمه هو الوحيد في الحارة اللي كان يعرف يقرأ ويكتب وكان شديد مرررة وكان مجمع اولاده في الحوش يذاكروا وعيال الحارة في الغرفة ويطل عليهم كل شوي ومرة اتأخر عليهم وصاروا اعمامي يلعبوا ورموا كتبهم ولما سمعوا صوت جدي ارتبكوا وكل واحد اخذ كتاب ورجعوا مكانهم ولما دخل عليهم جا لبابا وقاله انت تذاكر قال ايوا وبابا يطالع في الكتاب قال جدي كيف وكتابك مقلوب وهات يا ضرب بالخيزران وبعدها راح لواحد من اعمامي قال انت بأي صف قال ثاني متوسط وهات ياضرب ليش معاك كتاب اولى متوسط وطبعا في الغرفة عيال الحارة خايفين ويرتجفوا دخل جدي عليهم وواحد منهم من الإرتباك طرح الشيشة حقت جدي برجوله وشرد يقول بابا ما عاد شفناه

سامحوني طولت عليكم
واذا اتذكرت شي برجع لكم ان شاء الله

تحيــــــــــــــــــــاتي

__________________

التعديل الأخير تم بواسطة *الماسة* ; 13-08-2009 الساعة 06:48 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه