- زوجي ، أحبه و يحبني و الحمد لله ،، لكن نقطة تعيبه ( الكسل و الإتكالية و التسويف و الإسراف ) ..
و هذا الشئ ممكن أتحمله و أمشيه و أأقلم نفسي عليه ،، في أي حالة أو وضع ..
لكن مع الضغوطات هذه ،، أحس إني ما أتحمل أبدا .. ما أقدر أتحمل مسؤوليات زيادة ..

- ولدي ،، ماشاء الله تبارك الله .. شعلة نشاط الله يحميه .. لو ألعب معاه من الصبح لحد الليل ،،
ما يمل و لا يكل .. و جيت بأسجله في الحضانة .. بس ما عجبني قلة الإهتمام عندهم ؟
و سعرهم أقل شئ في الشهر 4000 ريال .. و ما يعملوله شئ ؟ بس يجلس و يلعب ..

و لقيت رقم وحدة عربية و مسلمة تهتم بالأطفال و سعرها كويس و يمدحوا فيها - أبغاه يختلط بالأطفال
اللي بسنه لحد ما يتسجل بالمدرسة - .. و إن شاء الله بأوديه عندها من بكرة .. لو 3 ساعات يجلس
عندها و يقابل الأطفال و يتعلم الكلمات العربية منهم ..

- أمي .. عندها المرض الخبيث ،، الله يشفيها منه ..
و أنا هذا الشئ برضو كان متعب لي نفسيتي و ما رتحت غير يوم نزلت جلست معها ،،
بس ألحين الفترة هذه ، كل ما سمعت صوتها بكيت .. و هي صارت تتعب مني ..

-----------------------------------------------------------------------------------------------------

- شغالتي .. بأقول إيش حصل معها .. لإنه وجودها عندي متعب لي نفسيتي ..
بس مضطرة أخليها غصب ، و نفس الوقت ما أحب وجود شخص غريب في بيتي ؟؟؟؟؟
يعني متعبة نفسيا و معنويا ،، لكن مريحة جسديا فقط ..

اكتشفت إنها ( كذابة كبيرة و بإحتراف ) .. حصل موقف و جلست تكذبني فيه و تتكلم بكل ثقة ..
و يوم جبت لها البرهان و قلت لها ( ليه تكذبي ؟؟؟؟ ) ،،
انخرست و تلخبطت و قامت تقول ( ليه تكلميني كذا أول مرة بقسوة ؟؟؟ )

قلت لها ( شوفي حالك إيش بتعملي ؟؟؟؟ أنا عمري أذيتك بشئ ) ..

بعدين صارت تتبلى على أمي ..

و أمي قالت لي أصلا :
( بتكذب عليك ، أعطيني هي أسألها ) ..
بس قلت لأمي خلاص أخسريها .. ماني ناقصتها دحين ..
و أمي قالت لي : أصلا كانت طايرة من الفرحة يوم عرفت بتاخديها معاك .. إيش اللي قلبها دحين ؟؟؟؟


المهم ، تكلمت مع الشغالة بحزم و هدوء نفس الوقت و انا واقفة و عيني بعينها ..
و قلت لها كل شئ .. :
( قلت لها ، عاملتك زي أختي ،، ما عمري ظلمتك و لا زعلتك .. كم مرة زوجي يقول لي شغليها ،
شوفي البيت كيف ؟ بس أنا ما أرضى و أقوم اعمل بنفسي و إنتي شايفة بعينك .. و لإني ما أحب
أتأمر على أحد ، و أحب الشئ هذا يجي من الشخص نفسه .. مو حكاية ضعف أو خوف ..

أختي شوفيها كيف تعامل الشغالات و تذلهم ، و أنا أقدر أعمل مثلها و أكثر .. بس ما عمري عاملتك إلا
بالشئ اللي يرضي ربنا ثم ضميري .. لإنه أنا و إنت ما فيش أي فرق بيننا .. أنا و إنت سوى عند ربنا ..
يمكن إنت أحسن مني عند ربنا ؟ يمكن أنا ؟ كلنا في الأخير نروح في القبر تحت التراب ؟ كلنا زي بعض

اتفقت معاك تجي و تجلسي سنتين لحد ما أخلص دراستي و أدخل ولدي المدرسة .. جلستي
تتشرطي راتب و ما راتب و قلت لك طيب ،، و جيتي هنا و كل شوي أبغى أسافر ؟ خلاص سافري
ماحد ماسكك .. بس كنت قلتي من زمان ، كنت جبت وحدة غيرك .. مو توعدي و تخلفي وعدك ؟؟؟؟؟

و لا تحسبي إذا رحتي ما أقدر أتصرف .. خلاص ماني بحاجة لك و روحي الله معاك ،،
و حكاية أنا و زوجي ،، لا تتدخلي بيني و بينه ،، هذا زوجي و أنا أعرف كيف أتصرف و أتعامل معاه .. )

بعدين شرحت لها ، إنه العقد سنتين و الإتفاق اتفاق ،، و قلت لها ..
تخيلي يا فلانة إذا جيت و قلت لك ،، لا .. بأجلسك 4 سنوات مو سنتين ؟؟ إيش بيكون إحساسك ؟؟؟

نفس الشئ معاي .. العقد سنتين ،، و إنت أخليتي بشروط العقد ،،
و مو ذنبي أنا ، لإني سألتها و طلبت منها تفكر مضبوط ،، قبل لا أجيب وحدة غيرها ،، يعني ما غصبتها

أما حكاية الشرطة و السفارة ،، ؟؟؟ خير إيش بهم ..؟؟؟؟
المهم .. قلت لها ( إيش حكاية سفارة ؟؟؟؟ إنت تخيلي نفسك في السعودية ،، و ماشية كويس ..
و أجي بيوم و أقول لك ،، أنا بكرة أوديك الشرطة ؟ إيش بيكون إحساسك ؟؟؟؟

قامت تقول ..
( أنا أقصد إنه زوجك بيسرق فلووسك .. و لو في يوم اتهمني فأنا عندي سفارة أروح أشتكيهم .. )

قلت لها ،، على حكاية الفلوس اللي ضاعت من البيت .. فأنا ما عمري قلت عنك حرمية ..
و لا عمري اتهمتك و لا اتهمت أحد ،، لإنه عندي ( ربنا ) .. و فيه ( الله ) .. هو يشوف كل شئ ..
أنا أسامح ،، علشان ربنا ما يضيع شئ .. و مو أنا اللي أجي أحاسب مين اللي سرق ؟؟؟
خلاص ربي فيه و هو يشوف ..

----------------------------------------------------------

المهم .. إذا بتكذب الشغالة ، بكيفها تكذب .. بس كانت تجي تحكي لي عن أشياء و تكذب فيه كمان
؟؟؟ لدرجة تشككني في زوجي و أهل زوجي ؟؟؟ مرة قالت لأمي ، أنا ما أبغى أروح بيت أهل زوج
مدام .. علشان أمهم - أم زوجي - تفتش شنطتها ؟؟؟ زي كذا تجيب حكاوي من راسها و أصدقها ،،
بس الغلط مني إني فتحت لها المجال .. و مرة تركتها عند بيت زميلتي و جات تقول لي : هذا رجال مو
كويس ؟؟؟

صرت ألحين أعرف متى هي تستغل الفرص علشان تكلمني و ما أعطيها مجال ، علشان ترمي السم..
أمس جالسة و ولدي يناديها تجلس معانا نتفرج على أفلام كرتون من اليوتيوب ،،
قصارت تتكلم و تنكت و تعلق على ولدي و تضحك ، و أنا ما أطالع فيها أبداااااا و لا كأنها موجودة ..
لحد ما فهمت و سكتت ..

و زوجي يقول ، غريبة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
أول مرة الشغالة تنظف المطبخ من حالها ؟ إيش النشاط اللي جاها فجأة ؟؟؟؟؟؟؟؟
قلت له ، من هذاك اليوم اللي تكلمت فيه معها لاحظت إنها تعدلت ..

حتى زمان كنت أناديها كم مرة و تطنشني و أدق باب غرفتها و تخسرني ..
بس من بعد هذاك اليوم .. بالغلط مرة قلت اسمها بدل ما أقول اسم ولدي ..
جريت و طلعت من غرفتها ،، تقول ( تبغي شئ مدام ؟ ناديتيني ؟؟؟؟ ) ..

-------------------------------------------------------

الزبدة :
قالت لي متى تبغيني أسافر ؟ قلت لها بكيفك .. ماني ماسكتك .. بتسافري من بكرة سافري ..
قالت خلاص بتجلس شهرين ،،

و طبعا انا في حيرة دحين ،، لإنه قانونيا هي المفروض تدفع قيمة تذكرتها إن أخلت بشروط العقد ..
و أنا أحزن عليها ، و أبغى أدفع لها ،، بس قيمة التذاكر غالية مرة مع قيمة تجديد الجواز تبعها ..
مع قيمة السفر إلى لندن و زي كذا .. و غير إنها إذا سافرت بأدفع لولدي لحد ما أخلص .. يعني الهدف
اللي جبتها علشانه ،، ما عملته .. و ما أستفدت من جيتها لهنا .. لإنه كن الإتفاق بس أخلص دراستي

زوجي يقول يا إنها تجلس لحد ما تكمل السنتين مثل ماهو مكتوب في العقد و نشتريلها كل شئ ..
و تتخرجي .. أو يا هي تدفع قيمة تذكرتها .. و مو ذنبي إنك تحزني عليها و ترحميها و الغلط
غلطها ..؟؟؟

و أمي تقول ، زوجك معاه حق ،،
و هي وافقت من البداية و دحين تورطك و تقول ما أبغى أجلس ،، خلاص هي تدفع تذكرتها ..

و زميلتي تقول ( قانونيا و كل شئ يقول .. إنها هي اللي تدفع تذكرتها ) ..

فقلت لزوجي ،، إنت و أمي تفاهموا معها خلاص ، طلعوني منها ..
بس ندفع لها نص قيمة التذكرة .. مسكينة ما تقدر تشيل قيمة التذكرة لوحدها ..
( أدري إني غبية أحيانا ،، بس ما أقدر )

و ألحين كمان طلعت لنا شغلة ، لازم نحجز بيوم علشان نجدد جواز سفرها ..

-----------------------------------------------------------------

إيه نسيت أقول ..

بعد ما خلصت من نقاشي الطويل معها .. كانت ماسكة نفسها من البكاء ..
و قلت لها ، أنا حاسة بك .. و جربت الغربة و جربت إنه ولدي يبعد عني ، و جربت كيف أمي تمرض و أنا
بعيدة عنها .. أنا حاسة بك و فاهمة كل شئ .. لا تحسبيني ما أحس ..

آخر شئ ،،
مديت يدي أصافحها ،، و تفاجآت هي و مدت يدها تصافحني .. ( هي قصيرة و دبدوبة ماشاء الله )
بعدين مسكتها و حضنتها بقوة ،، و جلست تبكييييييييييييييييييييي و تشهق من البكاء ..
و أطبطب على ظهرها ،، و صارت تصيح ( وو تقول و الله مدام أنا أحبك و أحب ولدك كثير مرة )

بعدين تركتها ،، و رحت الجامعة .. ما طالعت فيها ..
كيف الموقف الدرامي بس ..

و من يومها ، ماشية كويس معاي الحمد لله ..