الله يجزاك خير أخي الكريم على التذكير ومهما حاولنا لابد يصير معانا قصور في هاذي الأشياءنسأل الله أن يعيننا على القيام بالأعمال الصالحه ويتقبلها مننا سبحانه وتعالي وبصراحه الأعمال إللي ذكرتها الإنسان لوطبقها بحذافيرها والله إنه يشوف بركتها في عياله وبعد إذنك أنا بذكر قصة صديقه مقربه مني جدا صديقتي هاذي أكبر مني بالعمر شوي في الأربعينات هاذي الحرمه لديها 13 من البنين والبنات ومن يوم ماعرفتها صيام الإثنين والخميس مايفوتها إلا بعذر شرعي وتصوم الأيام البيض من كل شهر وتصلي جميع النوافل بما فيها صلاة الوتر والضحى وعيالها ماشاء الله تبارك الله من صغرهم كل صلاواتهم بالمسجد ومسجلين في حلقات تحفيظ القرآن الكريم من الصف الأول إبتدائي ومايسجل البنت أوالولد بالمدرسه إلا وهو حافظ جزء عم عيالها الصغار من عرفتهم حافظين الأذكار كلها حتى ماينامون إلا على صوت القرآن الكريم سورة البقره عن طريق
المسجل تشغله ليليا في غرفة نومهم بصوت واطي وبعد ماينامون تقفله وزوجها عمله بمنطقه نائيه بعيد كان يجلس عندهم ثلاثه أيام وفي عمله أسبو ع كامل وأحيانا تمتد عشرة أيام عندها 7أولاد و 6 بنات أكبربنت متخرجه من الجامعه والثانية متخرجه من الجامعه وتدرس تحفيظ قرآن كريم والثالثه متخرجه من كلية التقنية والرابعه تدرس بالثانوية والخامسه صف أول إبتدائي والسادسه عمرها أربع سنوات باقي لها ثلاث صور وتختم جزء عم حفظ وأولادها أكبر واحد عسكري ويدرس بالجامعه والثاني صيدلي والثالث ممرض والرابع ضابط طيار بالجويه والخامس بالثانوية والسادس بالمتوسطه والسابع بعد بالمتوسطه وعيالها لما يتخرجون من الثانوي أقل واحد فيهم نسبته %94 وهاذي المرأة وش تتوقعون مستواها العلمي هي وزوجها والله إن ماعندها شهاده ولاعندها علم وزوجها عنده شهادة سادس نحو الأميه
وكانت تستقي معلوماتها الدينية عن طريق المحاضرات والمواعظ الدينيه بأشرطة الكاسيت بالمسجل كان المسجل رفيقها وأنيسها في غياب زوجها كنت أنا ساكنه بشقه بنفس العماره إللي هيه فيها وكان شقتي جنب شقتها دائما أسمع صوت المسجل في بيتها يامحاضرات يا قرآن كريم
كان كل مانزل شريط محاضره تشتريه وتسمعه وكنا نتبادل أنا وهيه بالأشرطه بس بصدق وصراحه أنا أشوف نفسي عندها ولاشئ إمرأة ناجحه ربة عيالها على الدين والأخلاق رغم كثرتهم وبصلاحها وأعمالها الطيبه نحسبها كذلك والله حسيبها والحين بعد ماعيالها كبروا وصاروا إللي متزوج وإللي خاطب منهم وطبعا ماعاد تحمل راحت سجلت بنحو الأمية وتد ر س بالصف الخامس إبتدائي نحو الأميه ومعليش يا أخي أطلت عليك بس حبيت أوضح إن العمل بالطاعات له أثر طيب على حياة الإنسان وعلى عياله
وبتقربه لربه بالطاعات يلقى أثره وبركته في عياله أعتذر أخي مرة أخرى وجزاك الله كل خير وأسأل الله أن يبارك لك في عصام وتشوفه مثل ماتتمنى
يارب ومبروك حمل زوجتك وربي يبارك لك فيها وفي إللي ببطنها وجعلهما الله لك قرة عين وأتم الله حمل زوجتك ويقومها لك بالسلامه إن شاء الله تعالى .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله