( معليه عالأخطاء الإملائية ، لإني أكتب بالظلام .. ولدي الصغير نايم )

شغالتي تنقل لي كلامهم ، و اولاد الجيران ماهم عارفين إنها تنقل كل شي ..
تقول لي ( ولد الجيران الي عمره 11 .. يقول له ، إنت ألف مو باء )
يعني إنت ألف تسمع كلام أمك ..

المهم ، أنا أمنعه من أشياء مثلاً ..
هناك أرض فاضية خلف العمارة .. بعيدة و بعد عمارتين ..
يلعبوا الأولاد الكبار ، كرة قدم .. أولاد الجيران يبغوا ولدي يروح معاهم هناك ..
و أنا أمنعه .. و كلمته و أقنعته ..

----------------------------------------------


قبل أسبوع ، كنت حذرته من قبل إنه يطلع برة العمارة ،، و منعته يروح يلعب بالتراب اللي قدام العمارة ..
لإنه فيه عماير تتبني ، لإنه منطقتنا ، منطقة سكنية جديدة و فيه فلل و عماير كثير تتبني ..

و فيه سيارات تعدي من قدام العمارة .. و ولدي الصغير يروح يمشي ورا أخوه الكبير ..

المهم ، رجعوا و الصغير كل جسمه تراب .. و الكبير يقول مالي دخل ، و هو الي راح بنفسه ..
( يكذب علي )

الشغالة قالتلي الحكاية /
تقول لي ، مدام إنت كنت تنيمي البيبي ، و عبودي قال ودينا البقالة و قلتله أول شي مامتك توافق و تسألها
تقول ، قال دام ما تبغي تودينا البقالة .. أنا رايح عند التراب ألعب هناك ..

( منطقة بعيدة قدام العمارة ، و فيه ممكن عمال )

المهم ، تقول حذرته إني أقول لك ، و طنشني ..

.
.

طبعا منعته كمان يخرج يلعب طول اليوم ، و شلت الأيباد منه ..
و خليته يجلس بالغرفة و يحل الواجب ..

اشتكيته لأبوه و دقيت عليه .. أبوه خاصمه و قاله أجي و أكسر راسك ..
و اسمع كلام أمك و روح بوسها و قول لها أسف ..

جلس يبكي ولدي ( ويقول ، بابا يقول اكسر راسك )
أخدته و حطيته على حضني ، و قلت بداخلي يمكن يحس إني مشغولة مع أخوانه و مو فاضية له ؟
حضنته و بسته و مسحت على راسه ، و قلت له إنت ليش ما تسمع كلام ماما ؟
و قلت له ، شفت طيور الجنة ؟ فيه الأرنب اللي ما سمع كلام أمه و بعدين جاء الثعلب يبغى ياكله ؟
إنت زي الأرنب ، بعدين يجي حرامي ،، و ياخدك إنت و أخوك .. و أدور عليكم و ما ألاقيكم ..

المهم فهمته و شرحت له كل شي ..

و لما شفته حل واجب الرياضيات و عجبني ماشاء الله سرعة بديهته ، حل تمرين صعب ..
و الأستاذ كاتب له في دفتر الإملاء ممتاز يا بطل يا عبودي ..

قلت له ، خلاص روح العب شوية و ارجع .. بس ما تطلع برة العمارة ..

.
.

يرجع البيت ، بعد المغرب .. و يجلس يتضارب مع أخوه و يتمشكل معاه ؟

إيش الحل معاه ؟

-------------------------------------------------------

كمان قبل يومين ، أرسلته البقالة مع الشغالة و أخوه ..
يخرجوا طاقتهم شوي ، و يشتروا تسالي ..

أعطيته 5 ريال ، و أعطيت لأخوه 5 ريال ..
و قلت للشغالة تشتري بثلاثة ريالات للصغير ، و الكبير ..

حلاوة و شيبس و عصير ..

الكبير ، ولدي هذا سألني ( ماما .. إذا بقي من الخمسة ، أنا أجمعه لنفسي طيب ؟ قلت له طيب ..
قال طيب اشتري بس بريالين عشان يبقى لي ثلاثة ريالات .. قلت له طيب و قلت للشغالة )

تقول الشغالة في البقالة نقص الفلوس ، لإني قلت لها تشتري شي ..
تقول أخدت من عبودي الفلوس اللي معاه ، و قلت له خلاص في البيت مامتك تعطيك ..

تقول ما رضي ، و قام شد الطرحة حقتها و كشف شعرها قدام البياع ..

.
.


خاصمته طبعا بالبيت ، و جلس يبكي .. و يقول ليش تاخد فلوسي ؟

قلت له ، ما تشد مسفعها .. هي زي أختك الكبيرةو تحترمها ( طبعا الشغالة انبسطت لما قلتله كذا )
و قلتله ، ترجع البيت و تحكي لي و تتفاهم بالهداوة ، مو بالمضاربة و الطريقة هذه ..

.
.

الأسبوع هذا ، قررت الصراحة أضربه خلاص ،، و أمنعه من كم شغلة ..
بس أخاف يتعقد ..