بسم الله الرحمن الرحيم


بعد تردد طويل لطرح المشكله
حقيقه هم مشكلتين واسمحوا لي اتحدث بالعامي اسهل لي لشرح الوضع

عمر ولدي شهرين حصل الطلاق قبل مااعرف بالحمل
كنت وقتها تركت بيتي لان طفح بي الكيل كنت مو قادره اتحمل وضعي النفسي سيء ولازال
كان وقتها مر على وفاة الوالد شهرين الله يرحمه

طوال فترة الحمل وانا كارهه له جدا جدا وادعي عليه تأذيت منه وانصدمت بزواجي منه بعد ماعرفت شذوذه الجنسي كنت احس طول الوقت انه متزوجني شكل بس قدام الناس ولامره حسيت بحب او عاطفه منه رغم اني انبسطت بأول زواجي وحسيت اخيرا بعيش الفرحه وانسى همي بعد طلاقي الاول
وهذي هي مشكلتي الثانيه


قبل مااكمل هل واضحه كتابتي بهذي اللهجه ؟

__________________
مع كل محطة من محطات حياتك …
تتغير نظرتك وعلاقتك بالأشياء والأشخاص…
وتعرف عن نفسك أمور لم تكن تعرفها من قبل !

اختي الكريمة اشكر لك ثقتك الغاليه واسال الله السداد
وان يفعل بك خير مماتحبين على مايحبه سبحانه ويرضاه ويتغمد والدك بفسيح جناته
نعم اختي الكريمة اللهجة واضحة جدا
واصلي

__________________
الحمد لله..اللهم صل على محمد و ال محمد

التفريغ المنهجي

اعتذر عالتأخير ولدي كان مريض والحمدلله تحسن

اكمل لكم

خلال الفترة اللي تركت البيت فيها ماكان بنيتي طلاق بس رحت ارتاح وابعد شوي وادور حل وتكلمت مع اخوي بمشاكلنا باستثناء الشذوذ
بعدها باسبوع تفاجأنا انا واهلي انه اتصل وقال طلقت تعالو خذو اغراضها
فالحقيقه انا حسيت بفرحه حسيت بالفرج كان ماودي بالطلاق لانه بيكون طلاقي الثاني بس دام جت منه وكنت ادعي اذا فيه خير يصلحه او يبعده عني

بعدها عرفت بالحمل وتضايقت وهو شكك بحملي
لحد ما تأكد من المستشفى وشاف التحاليل
مرت الاشهر الاولى وانا مدري عنه ولايدري عني
بالشهر الخامس امي اصرت اتكلم مع اخواني بمشكلته لاني لقيت لوم كبير اني تطلقت مره ثانيه
حسبنا الله ونعم الوكيل كأن التوفيق بيدي مو بيد رب العالمين

لجأت لأخوي وهو غير اللي اشتكيت له اول مره لانه يعتقد دائما اني مخطئه والرجال بريئين
صارحته بكل شي
من عرفت بالشذوذ وكيف عرفت وكيف حاولت اساعده يتعالج
مابي افصل فيها لانها مرحله مؤلمه اذا في سؤال اسألو
قال تبين اكلمه بهالمشكله قلت لا مابي احد يعرف فيها غيرك
اولا علشان طفلي بكرا محد يتكلم فيه او يعايره بأبوه
والسبب الثاني انه هو شخص ارعن بعصب ويزعل ومدري وش ممكن يتصرف اذا عرف اني بلغت اخوي

تكلم معاه باسلوب وحاول يصلح رد بانه مستعد يرجعني ونتفاهم
تكلمت معاه بعد انقطاع اشهر
ولاشفت نتيجه مرضيه نفس الشخص اللي تركت له البيت هو ماتغير مافي شي يشفع ارجع له
وانقطعت عنه بعد تفكير مده قررت عدم الرجوع نهائي لو ايش ماصار ورفضت احد يكلمني عنه وعن الرجوع

بشهري الثامن كلم احد اخواني وقال انا خطبت اذا تبغى ترجع مستعد اكنسل وارجعها يهدد بعد !
قلت له رد بكلمتين بس الله يوفقك
وقبل ولادتي باسبوعين اتصل وقال انا ابغى افتح صفحه جديده لو بترجع وتكلم عن السكن ووضعنا بعد الرجوع
استمريت بالرفض كانت مشاعري تجاهه جدا سلبيه غصب واستحقار وكره وعدم ثقه
ناقمه عليه ليه يتزوجني اذا هو مو وجه زواج ورغباته منحرفه وزد على ذلك الطلاق امره هين عنده
في نقطه بوضحها انا كنت احس بهالشعور تجاهه من عرفت شذوذه اي قبل الحمل ب6 اشهر تقريبا يعني مشاعري ماكانت بسبب الحمل فقط لكنها زادت الضعف مع الحمل
السبب بعدم تركي له من بدري هو اهلي رافضين رجوعي مطلقه مره ثانيه تحديدا امي كونها تعرف بالموضوع من بدايته ورجعتني يوم جيتها وقالت اصبري اضطريت اعيش معاه بجحيم وكانت نفسيتي صفرر بكاء عصبيه صراخ
اتصل على امي اقولها بجي ترفض تقول ماراح افتح لك

بيوم ولادتي جاني المستشفى كونها اخر مره اشوفه قبل تنتهي العده تكلمت معه انهرت وبكيت رحمني وتكلم معي اذكر انه بكى وقال انه
تغير
لكن اسلوبه نفس ماهو جاف ودايم احس انه مستغني عنه واني ولاشي عنده
الحمدلله ولدت بالسلامه
طول ماكنت اولد كنت ادعي اذا فيه خير ربي يسخره لي
كنت تعبانه تعب نفسي وجسدي بس ابكي وهو تعامل معاي بلطف من باب الشفقه اظن
تغيرت مشاعري تجاهه لما شفت اهتمامه فيني وفأموري بالمستشفى بعكس اخواني جابوني وراحوا كنت لحالي طول الوقت لمده يومين لحد ماولدت وهو اصر لو احتجت اتصل لانه فرغ نفسه واخذ اجازه بس ماكنت اتصل عليه رغم حاجتي لبعض الاشياء حسيت بمذله اني احتجت بصراحه حسيت بقهر من اخواني اللي خلوني اضطر له عشان يخلص اوراقي
ضليت متواصله معاه طوال هالشهرين اللي فاتو تكلمنا تناقشنا وتصارحنا لكن لازال بقلبي الم لازلت مو مقتنعه اني بكمل حياتي مع هذا الشخص مو حاسه اني بعيش سعيده معاه
لكن شايله هم ولدي من بيهتم فيه ويشوف اموره لو احتاج شي لسى صغير
واهلي زي ماوضحت ماشافو طلباتي عشان يشوفون طلباته
هم مش سيئين جدا لكن الكل منشغل بنفسه وحياته لما اكون عندهم احس بالنقص مافي راحه نفسيه واهتمام يعني السبب مو مادي
الآ ن بدأت مشاعري السلبيه تجاه طليقي ترجع بالتدرج مو حابته وهذا بسبب خلاف بسيط وانا بعيده عنه كيف لو كنا فبيت واحد اتصور الوضع بيكون نفس ماكان سابقا اهمال ونقص عاطفي حاد
لاول مره فحياتي انظر لحياة غيري واغبطهم لاني محرومه من كلمه حلوه من والحب ماابغى ارجع وانا مرغمه او مضطره ابغى اكون راغبه فيه
احيانا احس براحه عجيبه لما اقول لنفسي ماراح ارجع بعيش بدونه
اخر مره كلمته قلت له زواجي منك ابتلاء قال ليش وش انتي مسويه يحسب مسويه غلط وربي عاقبني وانا قصدي ابتلاء يبتلى فيه المؤمن ليختبر صبره
دايم احس انه جاي من بيئه وسخه وفيها هبوط بالاخلاق من الفاظه وتصرفاته وسوء ظنه فيني وفالناس
مااتخيل ان هذا اب ولدي رغم انه اهله مختلفين
،،
راح ارجع اكمل مشكلتي الثانيه بعد مااشوف تعليقكم

__________________
مع كل محطة من محطات حياتك …
تتغير نظرتك وعلاقتك بالأشياء والأشخاص…
وتعرف عن نفسك أمور لم تكن تعرفها من قبل !

مساء الخير
اختي الكريمة لنتمكن من الحل نحتاج نرى مجمل ماتعانين منه
فارجوا ان تواصلي الكتابة في مشكلتك الثانيه حتى يسهل ربط خيوط المشكلة
كما اني اود سؤالك عن دلالات الشذوذ التي استندتِ بها
وفقك الله

__________________
الحمد لله..اللهم صل على محمد و ال محمد

التفريغ المنهجي

ارجو اغلاق الموضوع
وشكرا لوقتكم ،،

__________________
مع كل محطة من محطات حياتك …
تتغير نظرتك وعلاقتك بالأشياء والأشخاص…
وتعرف عن نفسك أمور لم تكن تعرفها من قبل !

يغلق

"

"

__________________




بيان إداري نأمل منكم الاطلاع

جديد المنتدى

هل تعرضتِ للابتزاز
هنا من ينقذك


مفضلة المتزوجين 2011-2014


مفضلة المقبلين على الزواج 2012- 2014