أيوا هذا هو بو راشد اللي أعرفه .... يسعدلي الروقان أنا

صدقني ما أنكرت صبرك لكنها برضه ما نست أنه أنت السبب أنه صار عندها المشكلة .... يعني أنت صبرت عليها الى أن حلت مشكلة وعقدة أنت كنت السبب فيها


ويجزاك كل الخير والبركات .... ترى لا تفكر أني بعدت لأني تعبت أو فقدت اهتمامي بمصلحتكم وأن تنحل مشكلتكم لكن صدق حاسه اني خلاص ما عندي شي أضيفه ... يئست .
وانقطاع لجين عني مدري سببه ..يمكن هي حست بموقفي هذا ..أو ممكن تعبانه صحيا وما تقدر تدخل النت أو ممكن حست اني مالي فايدة .. بكل الأحوال أتمنى لها ولك كل خير والله .. ولو بيدي شي أقدر أساعد فيه ما راح أتأخر .

بس كلمة أخيره أشوف من ردودك لسه نظرتك لها نظرة لطفل أو شخص غير مؤهل وغير صالح لاتخاذ ثرارات وهذا أكبر سبب لتعقيد مشكلتكم ..لأن لجين حاسه بنظرتك هذي وماحد يقبلها على نفسه من شريك حياته حتى لو كان يعشقه عشق .... ويمكن لاحظت تغير تعاملها معاك بالمرات القليلة اللي كنت تتعامل معها بنظرة غير وأظهرت لك حبها ..
ترى الانسان ما يظل طفل طول عمره والتجارب والحياة تنضجه ..ولجين نضجت بالسنتين هذولي كثير كثير بسبب الأحداث المهوله اللي مرت فيهم . انت بس اهدى شوي وروق معاها عشان تقدر تشوف لجين الجديدة .

وهي يوم صار نقاشها عصبي وكلامها يجرح بعد ما كانت هادية فهذا اولا من كثر الغليان اللي بداخلها .
وثانيا لأنها زمان كانت تشوف خالد الكبيييييير .. كانت تشوفك الزوج اللي صابر وهادي فتكبر بعيونها كل يوم ...
وأذكر بمواضيعها الأولى بالمنتدى كانت تظل تقول أنها تتمنى تصير بتدينك وقربك من الله وبأنك أحسن منها بهالناحية .. ويمكن قلت لك من قبل أنها ذكرت لي بأنها كانت تعشق تسمع صوتك وانت ترتل القرءان ..
فلما انت تغيرت (( وانا مقدرة حج الضغط عليك والأسباب اللي خلتك تتغير )) هي كمان تغيرت يا خالد .. ما عادت تشوف خالد الصابر واللي محتويها فتغيرت ...
صارت تفكر بأنه لو هي ما صرخت عشان حقوقها فما في أحد بيوقف لها . واخر كم مرة تقول لي أنا لازم أكون قوية عشان عيالي ... بكره بينظلموا لو ما كانت أمهم قوية ... ومعها حق ترى ... مو أنت اللي بتظلمهم بس أنت عارف طبايع الناس واللي مو قوي تصير حيطه هبيطة .

أنا مع البنات اللي تقول الحمل له تأثير كبيييييييير على نفسية الحرمة .. يمكن لهذا السبب ما يوقع الطلاق على الحامل ببضع المذاهب ... لأنها تكون بحاله متوترة وبتخلي زوجها يطلقها كل يوم
فرأيي أجل أي تفاهم وأي نقاش لبعد ما تربى ... وفترة الحمل الباقية تودد لها بالكلمة الطيبة والتعامل الطيب الى ان تربى وبعدها تفاهموا تكون لانت

ويوم تجلس مع أعمامها واخوانها تراك زوجها مو خصيمها ... المفروض أنه رغبتكم أنت وهي بإصلاح الحال أقوى من رغبتهم هم ... الأهل كثير مرات يسعوا لانهاء المشاكل مع البنت بأ اصبري وتحملي وانتي وانتي ... من باب انها الطرف الأضعف .. حط ببالك أنه مو شرط يكون تأييدهم لك معناه أنه أنت على حق ... تأييدهم مرات يكون لأنك الأقوى وما راح يقدروا يغيروا رأيك أنت والأسهل يجبروها هي لأنها الأضعف ويقدروا يجبروها على تقبل طلبك .
وممكن لأنه أنت ما شاء الله عنك متكلم وتقدر توضح حجتك بينما هي لا زالت تتعلم وما تقدر تحاجج مثلك .

فاسأل نفسك قبل تقعدوا ..هل انت جمعتهم عشان تملي شروطك وتوصل لهدنة معاها بينما أصل المشكلة لا زال موجود نار تحت الرماد ؟؟؟ أم أنت تبي فعلا تحل المشكلة من جذورها وتخلص منها ؟؟؟
اذا ناوي تملي شروط فتأكد أنك بتوصل للي تبيه بنص ساعة لكن بعد شهر وللا شهرين بنرجع لطير يللي .
الأفضل تفكر شو أصل المشكلة وكيف ممكن توصل لتوافق مع زوجتك وكيف ممكن تقدر تتفاهم معاها ...
تراها ذكية وحساسة جدا بحيث تقدر تفهم الناس وتعرف اللي بداخلهم من تعابير وجههم .