جزاكم الله كل خير ..

يمكن ما كتبت مستجداتي من زمان و لا مستجدات زوجي ..
باختصار سريع :
تحول لانسان اخر بنسبة 80% و لله الحمد

صار عنده هدف بالحياة ، توقف عن اصدار المشاكل المالية له و لنا و يهتم في الحفاظ على عمله
و مرات يشتغل عدد ساعات زيادة .. أي ريال ياخده مني بيرجعه لي بدون مماطلة ..
يناقشني و يحلم في بناء مستقبله معايا و مع الأولاد و يفضفض لي مرات
متعلق جدا و الحمد لله فيا و في الأولاد و يخاف يخسرنا بأي لحظة ..
و لإنه ماعنده شي يربطه بالحياة غيرنا ..

و بيحاول خلال السنوات هذه يثبت لي إنه تغير لشخص اخر
و حتى شخصيته تعدلت بسبب الأشخاص الي صار يمشي معاهم في العمل ،.

بالنسبة لي ، الفترة الماضية ..
كنت انتظر أقل زلة ، و انفصل عنه مباشرة بدون تردد ..

و كنت أقول لنفسي مثل ما قلت يا أخوي لماذا نتزوج ..
( خليني بس ألاقي و احصل على قبول الدكتوراة + اضمن أولادي يكونوا معايا برة +
و نسافر أنا و أولادي ) و يصيييييير خير بعدين ..

و كنت الصراحة كارهته و قافلة على قلبي و كل شي و مو طايقته ،
و هو كان يحاول بأي طريقة يرضيني ، بس أنا كنت ماني مرتاحة معاه و أبغى أسافر و أقرب فرصة
انفصل عنه بس اضمن انه أولادي معايا و اضمن قبولي معاي و إني سافرت .. كنت أبغى انتقم و بس
أبغى أعذبه و بس .. ابغى أرد له الصاع صاعين و بس .. استغل وجوده معانا و ارميه بعدين و بس ..

لكن شفت الإنسان هذا ( فعلاً ) .. بيتغير ..
لدرجة قالي مرة ، لو أولع لك أصابعي العشرة شمع ، ما راح يعجبك شي و لا تشوفي شي
من اللي جالس اعمله عشانك .. و كان صادق فعلا ، لإني ما كنت طايقته و نفس الوقت شي بداخلي
متعلق به تعلق شديد ..

.
.

المهم ..

سافرت من غيره أنا و أولادي و الحمد لله و كنت محتاجة الفرصة هذه بقووووووووة و استناها ..
فرصة اننا نبعد عن بعض فترة طويلة ..

عشان أبغى اختبر نفسي تجاهه ، و عشان اعطي لنفسي فترة علاج من الدمار الي سببه بداخلي ..
و عشان اعتمد على نفسي اعتماد كامل 100% و ما أحس اني ضعيفة أو بحاجة لأحد ..

كنت مجبرة اعيش معاه بالسعودية عشان أولادي .. لكن دحين مافي شي يجبرني ..
ففرصتي اختبر احساسي ، و اختبره هو في صدق مشاعره تجاهنا لما نبعد عنه ..
و أعود نفسي إني اتخلص من مرض الشك الي صابني الوقت هذاك و تعب لي نفسيتي ..
و أوكل امري لله في خفايا الأمور و عليا أنا بالظاهر ..

و صار أي أحد يحاول يشككني بزوجي أو يثير فتن بيني و بينه ، مباشرة صرت أقفل الباب في وجهه
( أبغى أكون زي كذا قوية على طول و اللي ساعدني الصراحة زوجي إنه صاير يحكي لي )

و تخلص من الكذب بشكل كبير الحمد لله ،.
و تأكدت بطرق و أساليب ،.

.
.

بأركز قد ما أقدر على دراستي ..

لما وصلت هنا و بعد فترة من ابتعادنا عنه .. و تأكدت تماما من مشاعره تجاهنا و تجاهي خاصة ..
قررت إني ( أسامح و أنسى ) .. و أعطي فرصة حقيقية و احتسب الأجر عند ربنا مثل أمهاتنا و جداتنا ..
عشان خاطر الأولاد و أبو الأولاد .. 3 سنوات و نص تقريبا أقل شي ( عاقبته فيها بجمودي و قسوتي )

لما رجعت الآن اكلمه بحنان و طيبة و عطف و اهتمام .. ( لكن بذكاء و حرص ) و بدون تشكيك فيه ..
صار يتقرب مني أكثر ، و يفتح لي قلبه أكثر .. و هو معروف إنه جدا جدا كتوم و غامض ..

فكأني عرفت مفاتيحه .. لكن بالصدفة عرفتها ..
و صار بالطريقة هذه يسمع كلامي في أي شي أقوله أو اطلبه منه ..
بدون زعل و لا مشاكل و لا نكد ..

.
.

المشكلة ..
إنه الشيطان يفكرني كل شوي بكل حاجة قديمة ، و بأجاهد نفسي اني انسى و اتعوذ من أبليس
و احاول افتكر كل محاسنه و الأعمال الطيبة الي سواها لي السنوات الأخيرة و قدمها لي بصدق
و بدون أي مصلحة خاصة له ..

هو بيتقرب مني أكثر كل مرة .. لإني مسيطرة على حالي الآن ،.

( أبغى أوقف ابليس عن الوسوسة )

حتى سلفتي تحاول تثير فتن بيني و بين زوجي ..
و قطعت علاقتي بها نهائي بعد ما أعطيتها كلمتين خلتها تعرف حدود تعاملها معاي ..

كم مرة زوجي حذرني منها و ما كنت أسمع له ، لحد ما بنفسي لاحظت فعلا ..
و لما بعدت حال عنها ، ارسلت لي إنه زوجك من زمان يكرهني و يبغاكي تبعدي عني
عشان لا أطلع أسراره ، لكن أنا أخاف الله وما أفضح أي انسان ربي ستر عليه ..
( طبعا هي كذابة ..
لكن هذا أسلوبها في شحنها لي على زوجي أو أهله ، و بعدين تتفرج علي من بعيد )
بكل هدوء و احترام .. انهيت علاقتي بها ، إني ما رديت على رسايلها و تجاهلتها تماما ..

هذا فقط مثال على إني أحاول اتغير قدر المستطاع ..
و ما استغنى عن نصايحكم ..