موضوع الزواج عندنا معضله كبيره
الله يسره ويسهله
الرجل يدخل بتصورات
والمراه بتصورات
ومن اول اسبوع يبدا الصدام
عندنا المراه تجهز لعرسها شهور من مشتريات وعنايه وملابس كانها اول مره تعيش
والرجل يجهز البيت وحفله الرجال وحوسه العرس والمهر
كلها اشياء ماديه
كانه بيتزوج الكنب او الحفله
وهي كانها داخله عرض ازياء
محد يفكر وش بالعقل
وش التفكير
وش الخطط الاحلام
انا ايضا سبب انفصالي صدام كبير بالتوقعات والشخصيات
والسبب زواج امسح واربح بسبب قيود المجتمع
يعني في احسن حالات مجتمعنا
العروسه تسمع عن تفاصيل المعرس من امه واخته
وطلباته المحدده ويقعد معاها لمده 7 دقايق بالكثير بالشوفه الشرعيه
وخلاص بعدها تقرر توافق او لا
وهو كذلك
ميمو ذكرت تجارب ناجحه ماشاءالله
لما الاشخاص يختارو بعض
حنا الاختيار صعب وتعتمد على مايقدمه المجتمع لك
فتمشي عمرك عشان مايضيع عمرك

ميمو مجتمعهم يختلف كثيييرا عن مجتمعنا
مشكلتنا ماهى في الاختيار او قل الفرص
مشكلتنا برمجة المجتمع عندنا كيف وخاصه الشاب ..!
اغلب البنات الان مشت على مبدا انها تعرفه قبل الزواج ايش النتيجه ؟!
نتيجة مخزيه للاسف اغلب او كل الشباب اخذ هالبنت تسلية وتصبيره ووقت القرار
يرسل امه او اخته يختارون له وتبدا سلسلة الشوفات الشرعية والتحطيم ...
عندنا من يشوفها تكلمه او حتى يجلس معها او يشوف ملامحها الا توسوس له نفسه بما تم برمجته عليه
فينقلب الموضوع لمسار مختلف تمااااما ..
ماصادفت للان شاب تزوج بنت تعرف عليها الاغلب ينسحب باساليب وحجج سخيفه
وجملة ( الكل يتمناك واذا تقدم لك احد وافقي عليه ) مافيه بنت الا سمعتها .. 😊
طيب والاختبار ومعرفة الشخصيات و الخطط المستقبليه و التوافق الفكرى ..... اكبر سحبه منه
ياخذ بنت خالته 😂 والبنت المسكينه اللى تعلقت بسرعه تركها للى يتمناها !
هذا الفكر مثله مثل مواقع الزواج و اللى تحولت لمسارات اخرى ..
الرجل بشكل عام مايهمه الا الجسد و الجمال الخارجى مهما انكر هذا
لا فكر و لا دين و لا منطق يهمه .. بالعكس يغار الرجل من المراه ذات الفكر 😊

فعلا مجتمع ميمو مختلف تماما
الفتاة والشاب مختلطين ببعض كثير
في الدراسة و العمل و الحياة اليومية
(بغض النظر عن الاختلاط حرام ولايعني إني أؤيده )
الفتاة والشاب في مجتمعهم يقدروا يختاروا بعض
عن قناعة و حب وبعدها يجي دور الاهل، احنا عندنا
الاهل اولا وبعدين الفتاة و الشاب يختاروا بعض
وكأنه الاهم رأي الاهل أو كأنه الاهل هم اللي راح يتزوجوا!

عموما عجبني ردك فليكا و جدا واقعي
وفعلا عندنا نمط الزواج ماراح يتغير لأنه الشاب عقله(مهما حس نفسه مختلف ومتطور) هو مبرمج على شكل معين، ولو فكر يتزوج بشكل خارج عن برمجته تلقيه يتلخبط وينسحب ويتزوج مثل ما مخطط له المجتمع و يندم و يصير يخربط بالدس ولو كان انسان صالح تزوج الثانية في خلال سنة سنتين من زواجه الاول، وعذره كان زواجي تقليدي وماتناسبني : )

إضافة جميلة، أعتقد بأنه يجب أن يعي الزوجين أن دخولهما للحياة الزوجية الجميلة، مثل لو أن شخصين فكرا أن يبنيا حديقة مميزة ومرتبة، وهذه الحديقة تتطلب أن يعمل بجد ويفسرا عن ذراعيهما وأن يأخذ كل منهما شيئاً يحفر به تلك الأرض ويغرس الشجر وتتبلل يداه بالطين، وهما في الرحلة مستمتعان، إذا هناك جهد وتنازل والتزام وقليل من التعب من أجل الوصول إلى هذا الجمال، والمشكلة العويصة أن هناك القليييييل من يفهم هذا الأمر، وصراحة مستقبل الزواج في خطر، بل هو واقعٌ في الخطر.
أما الشوفة الشرعية أم سبع دقايق، فيجب تجاوزها لأنها غير صالحة ولن تفيد، وليس من المعقول أن تكون محوراً لاتخاذ القرار، لأنها غير منطقية ولاصالحة إلا لمن يريد أن يدس رأسه بالتراب ولايرى واقعه.

__________________
ياصبحِ لاتِقبل !!
عط الليل من وقتك..