عزيزتي احلام في البداية خذي مني وردة ، واهداي

ثاني شي اسمعيني:

بداية استوقفتني جملة : ( فقطع النفقة الشهرية عنى التى كانت هى الشئ الوحيد الذى يربط بيننا وعندما سألته اجاب هذا مالك وانا اجمعه لكِ لكى تتزوجى به ) ما يصير يا قلبي هذا حقج ، انت الاعرف شلون تصرفينه، وعندنا في الخليج ان اهل الزوج هم اللي يجهزون العروس، مو هي اللي تجهز نفسها، انا ما احرضج على والدج بس هذي الحقيقة

وثاني شي ، وايد ركزتي على موضوع الزواج، ومحسسة نفسج انج كبيرة، لا .. انت بعدج صغيرة، لا توقفين سعادتج وتربطينها بشي معين، مهما كان كبر هذا الشي عندج، انت تستحقين تكونين سعيدة الحين، في هذي اللحظة، السعادة بيدج انت ، قومي الحين وقولي انا سعيدة، لا تنتظرين السعادة تجيج بعد شهور او سنة او حتى سنوات، اسعدي الحين، احمدي الله انج موجودة على وجه الكرة الارضية، احمدي الله انج تعيشين مع ام واهل طيبين بغض النظر عن الظروف اللي عشتيها وانت صغيرة.

فيه مثل قريته مرة يقول: الشي اللي ما صار بكل الايام ، لازم يصير بيوم من الايام.

والقصة اللي قريتها تقول: في رجل متزوج،وعنده اطفال، ويشتغل مدير شركة، والثاني عامل بسيط، وغير متزوج، اجتمعوا بيوم ، فقال المتزوج: انا تعيس، وقال الغير متزوج: انا في غاية السعادة، ولما سالوا الاثنين عن السر، قال المتزوج: انا انتظر السعادة، وقال غير المتزوج: انا وجدت السعادة من يوم ولدتني امي، يكفيني اني اقوم الصبح من سريري حتى اتاكد اني لا زلت على قيد الحياة، وان قناعتي باني سعيد هي السعادة الحقيقية.

عيشي السعادة اليوم، حتى اذا اتاج العريس باذن الله ما يلاقيج تعودتي على الحزن بحيث ما تعرفين بعدها شلون تطلعين منه.

وتذكري دايما: انت بعدج صغيرة

الله يوفقج