أبي أكتب لكم عن وضعي
أبي أفضفض لكم عن إللي بداخلي
ألم...وحده...حزن
أنا وصديقاتي صديقات المرحلة الثانوية..كنا شلة من 8 طالبات
ماتتخيلون كيف كانت علاقتنا قوية
كان صراخنا وضحكنا يوصل لآخر الساحة
كنا نتمشى مع بعض كلنا الثمانية
كنا كثير نتكلم عن الزواج وكيف بيكون زوج فلانة وكيف بتكون شخصيته<<<إستهبال بنات
كنا نتكلم عن أول مولود وش تحبين يكون بنت ولا ولد...إختلفنا في الرأي
إللي يقول أتمناها بنت وإللي ولد وإللي يقول عادي وش ما يكون
كنا نستهبل على بعض ونلقب بعض هذي أم عبدالله وهذي أم محمد وهذي أم خالد>>>برضو إستهبال بنات
مرت السنة الأولى من الثانوي كانت جد سنة ممتعة والحمدلله كلنا نجحنا إللي دخلت علمي وإللي دخلت أدبي
جينا على ثاني وصار فيها مثل ماصار في أولى
كنا نسأل بعض وش أهم شي تحبينه يكون بزوج المستقبل (شكلاً وشخصية)؟؟؟
أختلفت الآراء طبعاً ومن الحماس كل البنات إللي بالساحة يناظرونا وش فيكم وراكم تصارخون وش هالموضوع المهم؟؟
انتهت السنة الثانية..بالإجازة إللي بين ثاني وثالث بشرتنا وحده من الشلة بخبر زواجها ..طبعاً ماراح تكمل معنا بنفس المدرسة بتدرس بمدرسة قريبة من بيت زوجها
إللي راح لها وإللي بارك لها بمكالمة
في ثالث ثانوي بشرتنا وحده ثانية من الشلة بزواجها وهي نفس الشي بتنقل لمدرسة قريبة من بيت زوجها
كم صرنا؟؟<<<< بقى من الشلة 6
بعد ما تخرجنا من الثانوي مادخل الجامعة إلا أنا ووحده بس....البقية كلهم ما جابوا نسب وقعدوا بالبيت
في الأجازة إللي بعد الثانوي تزوجوا ثنتين من الشلة...بقينا 4 بس
أثناء دراستي الجامعية فرحنا بوحده من الشلة بس تضايقنا إنها بتروح لمدينة ثانية
كم بقى؟؟...بقيت أنا وثنتين من الشلة بدون زواج
بعد ما تخرجت من الجامعة تزوجت وحده من الشلة...يعني مابقى إلا أنا ووحده
كنا نتكلم كثير عن هالموضوع...طبيعي كنا خايفين يفوتنا القطار
بعد سنتين من التخرج بشرتني صديقتي بخبر زواجها...وقسم بالله فرحت لها حسيت إني ودي أطير من الفرحة عشانها
الآن أنا صارلي 4 سنوات متخرجة..أدق على هذي صوتها متغير ماتقدر تكلمني زوجها عندها
أدق على الثانية ..وأسمع أصوات أطفالها ينادونها (ماما) بعدين تعتذر مني معليش ماقدر أكلمك بشوف عيالي وش يبون
تأملت حالي وحالهم...هذي عندها زوجها وهذي حولها أطفالها
إللي جابت طفل وإللي طفلين وإللي بالطريق بالثالث......ماشاء الله تبارك الله
لكن أنا حالي هو حالي إللي تركوني عليه من أيام الثانوي بدخل على الـ27 الآن ووضعي ما تغير
أحس بألم مع أني والله ما ني من النوع المتشائم أبداً
بس لحظة ضعف ما أدري كيف أتخلص منها
( يمكن تقولون وش الهدف من الموضوع لكن للأسف أنا ما أدري ...مادري أحس شي في خاطري وحبيت أقوله)
دعواتكم الصادقة أحتاجها كثير