اخواني وخواتي

اذا قريتوا اخر المواضيع اللي كتبتها بتشوفون انها تتعلق بالمصروف والكل يقول لي وينصحني بالمصارحه والبعض يعطيني بعض الافكار والنصايح اللي اسويها عشان زوجي يصرف علي

بقولكم عن موقف صار امس بيني وبين زوجي وشوفوا كيف كان رد زوجي ويعدين انتوا احكموا

في البدايه احب اذكركم اني سنتين بعد مااتزوجت اشتغلت وفي ذيك الفتره كان زوجي يعطيني الف ريال كل شهر وحتى بعد ماجبت بنتي وكنت اعلب الاحيان انا اللي اصرف عليها كان يعطيني الف ريال ودايما كان يقول لي حاولي اتوفرين من المبلغ اللي اعطيج اياه ... قبل بنتي كانت الالف تكفيني واحاول ارتب نفسي حتى اخر الشهر احيانا كنت اطلب زياده ويعطيني لكن انا نادر مااطلب ... بعد بنتي كانت الالف مستحيل تكفيني وكان احيانا لما يكون معاي بالسوق هو اللي يدفع ... قبل لا اشتغل بشهر سألني : تبين الالف لما تشتغلين؟ قلت ماادري كيفك ماابي وكنت منحرجه .... وقبل ماينزل لي اول راتب راح البنك ووقف التحويله لحسابي كل شهر وكنت انا اللي اصرف على نفسي 100% وعلى اعيالي 80% ولما يسألني انتي شتسوين بالفلوس اقول له اني اشتري لعيالي الاثنين فيقول لي انتي ليش ماتطلبين مني للعيال ؟ انا بعطيج لهم واذا رحتي السوق وشريتي لهم شي قولي لي .... بس احيانا هو يكون معاي بالسوق لكن يبتعد وقت الحساب ... وانا اللي ادفع ... يعني معقوله ارجع البيت واقول له انا دفعت وهو يدري بهالشي .... بالهدايا بعد هو امقصر وهو يعترف لي بهالشي بحكم ان ماعنده ذوق ولا يعرف ايش يشتر لي وان ممكن مايعجبني

هالعيد قلت اكيد بيجيب لي هديه لكن قبل العيد باسبوع قال لي كم اتبين عيديه اتوزعينها على الاطفال فقلت له الف تكفيني للعيدين فقال لي : وين افلوسج عشان اجيب لج الخرده ( الفكه) قلت : لا والله ؟ ماصدقت انه يطلب مني وقلت يمزح بعد يومين جاب لي الف وخمسميه وقال لي هذي هديه ... انا فهمت انه مايبي مني افلوس فقلت له شكرا لكن بعدها استوعبت ان هذي هدية العيد لكن هو ما قال لي ... يعني يحسب علي الريال


المهم هذا الحوار اللي دار بيننا امس :

انا : انا اشتركت مع هلي ان انسوي جمعيه وانا بستلم الفلوس بشهر سبعه
هو : زين هذي الفلوس تنفع للسفر
انا : ولا ريال انا انت اللي اتسفرنا ليش انا اساعدك
هو: كل الزوجات يساعدون ريايلهم بالسفر
انا : انا مب امقصره اصرف على نفسي والعيال وبعد تبيني اساعدك بالسفر ؟
هو : اي عادي عليج بالتذاكر وانا السكن والصرف
انا : لا كفايه العام جمعت اول مااشتغلت عشان اشتر لي ساعه وبعدين قلت لي خلي الفلوس لمصروفج في فرنسا
هو : خلاص عيل لا اتسافرين
انا : ما ابي اسافر بسافر مع هلي
هو : مين بيسمح لج؟
ودار حوار طويل وبعدين قلت : انت ملزوم تصرف علي
هو : اي اصرف عليج بالماكل والمسكن والملبس
انا : انا اصرف على نفسي بالملبس
هو : خلاص بس مو لازم تشترين فستان باربع الاف لعرس اختج لان هذا مو اساسي انا بحدد لج السعر
انا : فستان عرس اختي خله علي انا اقول الملابس العاديه
هو: مو لازم تشترين من المجمعات الغاليه يعني انا بقول لج حدي قميص بميه او تنوره بميتين
انا : الله يخلي ابوي وامي ويغنيني عنك وانا الحمد لله عندي معاشي بس لا تنتظر اني بصرف على العيال ولا ريال
هو : عادي انا بصرف عليهم

انا طبعا منقهره وميته لانه يكلمني بهالاسلوب وعمره ماتوقعت ان يكون رده بهالطريقه

سكت بعدين قال : انتي تامرين يازوجتي العزيزه وانا حاضر

قلت : الله يغنيني عنك ماابي منك ولا ريال افلوسي تكفيني لي ولعيالي

اشرايكم ؟؟؟ هو ترى مقتدر وعنده الخير والحمد لله بس رده امس حسسني انه بخيل لأقصى درجه وحتى البخيل مايفكر بهالطريقه
بعد مانام كان في قلبي وايد كلام انا ماعرفت اقوله له في ذاك الوقت من شدة ماكنت منقهره وخفت ماامسك نفسي واصيح ... ادري انه كان يمزح بس بعد ادري انه مابيصرف علي

اشرايكم نفسيتي تعبانه وايد عطوني حل ؟