[gdwl]
[read]
حبايبى اول مشاركه لى بوصفه مصريه للرز المعمر الفلاحى ويعتبر من الحلويات
اتمنى تعجبكم

المقادير

فنجان شاى كبير ارز مصرى مغسول
2 كيلو لبن كامل الدسم مغلى ولو عندكم اللبن بيتباع سايب لبن بلدى يعنى يبقى افضل لانه بيكون محتفظ بقشطته ومكوناته كلها
مقدار من السكر حسب الرغبه يعنى حسب الحلا اللى تحبونه
2 فنجان شاى قشطه بلدى( انا بشترى لبن سايب كتير وكل ما كنت باغلى اللبن واسيبه فى التلاجه لتانى يوم يعمل قشطه اشيلها بالمعلقه فى علبه فى الفريزر وكل ما احتاج منها اخد )
لو ما فيش قشده ممكن 4 ملعقه كبيره سمن بلدى او زبده صفرا

الطريقه سهله جدا جدا

هتجيبى طاجن فخار مستدير او بايركس مستدير عالى الجوانب
تحطى الرز وعليه اللبن المغلى بعد تحليته والقشطه او السمنه
الفرن يكون حامى تدخلى الطاجن ولاحظى ان الطاجن مايكونش مليان على الاخر عشان اللبن ما يفورش ويبهدل الدنيا

سيبيه مده ساعه تقريبا لحد ماتلاحظى ان الرز بدأ يبان من اللبن من على الوش والطاجن سطحه اخد لون بنى غامق
ماتخافيش من اللون ده هو لازم لونه يبقى كده
ممكن يتاكل بارد او ساخن حسب رغبتك
وبالهنا والشفا
[/read]
[/gdwl]