السلام عليكم ورحمة الله وبركاته
انا ترددت كثير قبل لا اكتب موضوعي
انا عند اخت وش اقول عنها...احسها مو اختي تكرهني بشكل مو طبيعي..مع انها اختي من امي وابوي
بس ما ادري وش سر هالعداوه ,,هي اكبر مني بكثير هي عمرها 30 وانا عمري 22
لما كنا صغار اول ما طلق ابوي الوالده كانت مصيطره علينا بشكل مو طبيعي وكانت تضربني انا بالذات
واذا مانفذت اوامرها كانت تبلغ كل اخواني الي اكبر مني على شان يهاوشوني
ودارت الدنيا وكبرنا وصرنا كبار ونفهم وصرت ما اخليها تتحكم فيني مثل اول
وبعدها تزوجت وقدر الله وما كتب لي اني اتوفق معاه وتطلقت منه ..
وبعدها صارت بيني وبينها مشاكل وانا في عز ازمتي وفي عز انهياري
وكانت دائما تعايرني بطلاقي مع ان العيب مو مني والجميع يعرفون هذا الشي
فكانت تعايرني برفض زوجي لي دائما امام الجميع
وانا كنت على يقين بأن العيب منه هو ولله الحمد واني ما قصرت معه ..كنت في حاله لايعلم بها الا الله سبحانه
تعبت نفسيتي كثير كان كلامها لي مثل السم كانت كلامتها ترن بأذني ليه تكرهني كل هالكره انا وش اذنبت لها في حياتي..هل لانها عنست وانا تزوجت قبلها الارزاق بأيد الله واللله الشاهد كنت اتمنى لها الخير
كنت دائما ادعي ان الله ياخذ لي حقي من الي ظلمني واولهم زوجي واهله..
سبحان الله دارت الدنيا وملكت اختي هذي قبل شهر وحتى خطوبه ما خبرتني فيها خايفه اني احسدها..ما خبرتني الا قبل الملكه بثلاث ايام بس ..وبعد ملكتها بأسبوع نفس اليوم تطلقت!!!!!
تدرون ليش لانه كان لعاب وما كان جاد ابدا من البدايه وبعد كم مكالمه وبعد ما جلست معاه بالملكه ما ارتاحت له. ولانه اصلن ملك بغير علم اهله,,.وتم الطلاق بينهم
سؤالي هو هل هذي دعوة مظلوم انا الى الان مصدومه مش مصدقه الي حصل انا الحمدلله ايماني بالله كبير ,,بص خفت ما ادري ليه هل لان الله استجاب دعوتي؟؟ ما ادري شعور متلخبط انا ما ودي ان يصير لها الي صار مهما كان هذي اختي بس ما ادري وش اقوول .. احس ان معاملتها معي تغيرت كثير ما ادري وش السبب..!!